ಪೇಟಿಎಂ ಷೇರು ಮಹಾಕುಸಿತ ಕಾಣುವ ಮೊದಲೇ ಮಾರಿದರು: ವಿದೇಶಿ ಹೂಡಿಕೆದಾರರು ಜಾಣತನ ಮೆರೆದು ಅಪಾರ ನಷ್ಟದಿಂದ ಬಚಾವಾಗಿದ್ದು ಹೀಗೆ…

ಮುಂಬೈ: ಪೇಟಿಎಂ ಪೇಮೆಂಟ್ಸ್ ಬ್ಯಾಂಕ್‌ ವಿರುದ್ಧ ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ (ಆರ್‌ಬಿಐ) ನಿರ್ಬಂಧ ವಿಧಿಸಿದ ನಂತರ ಪೇಟಿಎಂ ಷೇರುಗಳು ಕಿಮ್ಮತ್ತು ಕಳೆದುಕೊಳ್ಳುತ್ತಿವೆ. ಪೇಟಿಎಂನ ಮೂಲ ಕಂಪನಿಯಾದ ಒನ್​97 ಕಮ್ಯೂನಿಕೇಶನ್ಸ್​ (One97 Communications) ಷೇರುಗಳ ಬೆಲೆ ಬುಧವಾರ ಫೆ. 14ರಂದು ಸಾರ್ವಕಾಲಿಕ ಕನಿಷ್ಠ ಮಟ್ಟವನ್ನು ತಲುಪಿದೆ. ಈ ಷೇರು ಲೋವರ್​ ಸರ್ಕ್ಯೂಟ್​ ತಲುಪಿ, ಶೇಕಡಾ 10ರಷ್ಟು ಕುಸಿತವನ್ನು ಕಂಡು 342.15 ರೂಪಾಯಿ ತಲುಪಿದೆ.

ಈ ಷೇರುಗಳ ಸಾರ್ವಕಾಲಿಕ ಗರಿಷ್ಠ ಬೆಲೆ 1,955 ರೂಪಾಯಿ ಆಗಿತ್ತು ಎಂಬುದು ಗಮನಾರ್ಹ. ಈ ಷೇರುಗಳ ಬೆಲೆ ಕಳೆದ ಒಂದು ವಾರದಲ್ಲಿ ಶೇ. 31, ಒಂದು ತಿಂಗಳಲ್ಲಿ ಶೇ. 50 ಹಾಗೂ 3 ತಿಂಗಳಲ್ಲಿ ಶೇ. 61ರಷ್ಟು ಕುಸಿತವನ್ನು ಕಂಡಿದೆ. ಹೀಗಾಗಿ, ಈ ಷೇರುಗಳಲ್ಲಿ ಹಣ ತೊಡಗಿಸಿದ ಹೂಡಿಕೆದಾರರು ಅಪಾರ ನಷ್ಟ ಅನುಭವಿಸುವಂತಾಗಿದೆ.

ಆದರೆ, ಸಾಕಷ್ಟು ವಿದೇಶ ಸಾಂಸ್ಥಿಕ ಹೂಡಿಕೆದಾರರು (ಫಾರೆನ್ ಇನ್​ಸ್ಟಿಟ್ಯೂಷನಲ್​ ಇನ್ವೆಸ್ಟರ್ಸ್​ – ಎಫ್‌ಐಐ) ಈ ಷೇರಿನ ಬೆಲೆ ಮಹಾಕುಸಿತ ಕಾಣುವ ಮೊದಲೇ ಮಾರಾಟ ಮಾಡುವ ಮೂಲಕ ಜಾಣ್ಮೆ ಮೆರೆದಿರುವ ಸಂಗತಿ ಈಗ ಬಹಿರಂಗವಾಗಿದೆ. ಇದು ಅವರ ದೂರದೃಷ್ಟಿಗೆ ಸಾಕ್ಷಿ ಎನ್ನುವಂತಿದೆ.
ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು (ಎಫ್‌ಐಐ) ಡಿಸೆಂಬರ್ ತ್ರೈಮಾಸಿಕದಲ್ಲಿ ಈ ಫಿನ್‌ಟೆಕ್ ಕಂಪನಿಗೆ ಎದುರಾಗಬಹುದಾದ ತೊಂದರೆಯನ್ನು ಅರಿತುಕೊಂಡು, ಈ ಕಂಪನಿಯ ಷೇರುಗಳನ್ನು ಮುಂಚಿತವಾಗಿ ಮಾರಾಟ ಮಾಡಿದ್ದಾರೆ.

ಪೇಟಿಎಂ ಹೊರತುಪಡಿಸಿ, ಮಾರುತಿ ಸುಜುಕಿ ಮತ್ತು ಪೆಟ್ರೋನೆಟ್ ಎಲ್‌ಎನ್‌ಜಿ ಷೇರುಗಳನ್ನು ಕೂಡ ಈ ಎಫ್‌ಪಿಐಗಳು ಮಾರಾಟ ಮಾಡಿದ್ದಾರೆ. ಎಫ್‌ಐಐಗಳು ಈ ಎರಡೂ ಕಂಪನಿಗಳ 3,000 ಕೋಟಿ ರೂ.ಗೂ ಹೆಚ್ಚು ಮೌಲ್ಯದ ಷೇರುಗಳನ್ನು ಮಾರಾಟ ಮಾಡಿದ್ದಾರೆ. ತ್ರೈಮಾಸಿಕದ ಅಂತ್ಯದಲ್ಲಿ ಮಾರುತಿ ಷೇರುಗಳು 3% ನಷ್ಟು ಕುಸಿದರೆ, ಪೆಟ್ರೋನೆಟ್ LNG ಷೇರುಗಳು ಈ ಅವಧಿಯಲ್ಲಿ 7% ಕ್ಕಿಂತ ಹೆಚ್ಚು ನಷ್ಟ ಕಂಡಿವೆ.

ತ್ರೈಮಾಸಿಕ ಆಧಾರದ ಮೇಲೆ, 689 ಎನ್‌ಎಸ್‌ಇ ಲಿಸ್ಟೆಡ್ ಕಂಪನಿಗಳಲ್ಲಿ ಎಫ್‌ಐಐಗಳು ತಮ್ಮ ಪಾಲನ್ನು ಕಡಿಮೆ ಮಾಡಿಕೊಂಡಿವೆ. ಎನ್‌ಎಸ್‌ಇಯಲ್ಲಿ ಪಟ್ಟಿ ಮಾಡಲಾದ ಕಂಪನಿಗಳಲ್ಲಿ ಎಫ್​ಐಐಗಳ ಷೇರುಗಳು ಸೆಪ್ಟೆಂಬರ್ ಅಂತ್ಯದಲ್ಲಿ 18.40% ರಿಂದ ಡಿಸೆಂಬರ್ ತ್ರೈಮಾಸಿಕದ ಅಂತ್ಯದಲ್ಲಿ 18.19% ಕ್ಕೆ ಇಳಿದವು. ಆದರೂ, ಹೂಡಿಕೆ ಮಾಡಿದ ರೂಪಾಯಿಗಳ ಪ್ರಕಾರ, ಎಫ್‌ಐಐಗಳ ಷೇರು 65.11 ಲಕ್ಷ ಕೋಟಿ ರೂ.ಗಳಷ್ಟಿದೆ. ಇದು ಹಿಂದಿನ ತ್ರೈಮಾಸಿಕಕ್ಕಿಂತ 12.69% ಹೆಚ್ಚಾಗಿದೆ. ಇದರರ್ಥ ಎಫ್‌ಐಐಗಳು ಕೆಲವು ಕಂಪನಿಗಳಲ್ಲಿ ತಮ್ಮ ಷೇರುಗಳ ಪ್ರಮಾಣ ಕಡಿಮೆಗೊಳಿಸಿದರೆ, ಇತರ ಕಂಪನಿಗಳಲ್ಲಿ ತಮ್ಮ ಷೇರುಗಳ ಪ್ರಮಾಣ ಹೆಚ್ಚಿಸಿದ್ದಾರೆ.

ಮುಖೇಶ್ ಅಂಬಾನಿಯವರ ಜಿಯೋ ಫೈನಾನ್ಷಿಯಲ್ ಸರ್ವಿಸಸ್ ಕಂಪನಿಯು ವಿದೇಶಿ ಹೂಡಿಕೆದಾರರು ಮಾರಾಟ ಮಾಡಿದ ನಾಲ್ಕನೇ ಅತಿ ಹೆಚ್ಚು ಮಾರಾಟವಾದ ಸ್ಟಾಕ್ ಆಗಿದೆ. ಡಿಸೆಂಬರ್ ತ್ರೈಮಾಸಿಕದಲ್ಲಿ ಈ ಕಂಪನಿಯ 2,355 ಕೋಟಿ ರೂಪಾಯಿ ಮೌಲ್ಯದ ಷೇರುಗಳನ್ನು ಮಾರಾಟ ಮಾಡಲಾಗಿದೆ.

ಕುತೂಹಲಕಾರಿಯಾಗಿ, FII ಗಳು Paytm ನಲ್ಲಿ ಲಾಭವನ್ನು ಕಾಯ್ದಿರಿಸಿದ್ದಾರೆ. ಇದೇ ಸಮಯದಲ್ಲಿ, ಜನವರಿ 31 ರಂದು ಆರ್‌ಬಿಐ ಘೋಷಣೆಯ ನಂತರ, ಸಣ್ಣ ಹೂಡಿಕೆದಾರರು ಭಾರಿ ಹೊಡೆತವನ್ನು ಅನುಭವಿಸಿದ್ದಾರೆ. ಚಿಲ್ಲರೆ ಹೂಡಿಕೆದಾರರು ವಿಜಯ್ ಶೇಖರ್ ಶರ್ಮಾ ಅವರ ಈ ಕಂಪನಿಯಲ್ಲಿ ತಮ್ಮ ಪಾಲನ್ನು ತೀವ್ರವಾಗಿ ಹೆಚ್ಚಿಸಿದರು ಹಾಗೂ ಡಿಸೆಂಬರ್ ತ್ರೈಮಾಸಿಕದಲ್ಲಿ ಅಂದಾಜು 2.89 ಕೋಟಿ ಷೇರುಗಳನ್ನು ಖರೀದಿಸಿದರು.

Paytm ಮಾತ್ರವಲ್ಲ. ಜಿಯೋ ಫೈನಾನ್ಶಿಯಲ್, ಸುಜ್ಲಾನ್ ಎನರ್ಜಿ ಮತ್ತು ಮಾರುತಿ ಸುಜುಕಿ ಕಂಪನಿಗಳಲ್ಲಿ ಚಿಲ್ಲರೆ ಹೂಡಿಕೆದಾರರು ಹೆಚ್ಚಾಗಿ ಖರೀದಿಸಿದ್ದಾರೆ. ಎಫ್‌ಐಐಗಳು ಇವುಗಳನ್ನು ಮಾರಾಟ ಮಾಡಿದ್ದಾರೆ. ಇತ್ತೀಚಿನ ಹೊರಹರಿವುಗಳ ಹೊರತಾಗಿಯೂ, Paytm (63.72%) ಮತ್ತು ದೆಹಲಿವರಿ (62.70%) ಅತ್ಯಧಿಕ FII ಹಿಡುವಳಿ ಹೊಂದಿರುವ ಅಗ್ರ ಕಂಪನಿಗಳಾಗಿ ಉಳಿದಿವೆ.

ಆಕ್ಸಿಸ್ ಬ್ಯಾಂಕ್ ಷೇರುಗಳಿಂದ ಗಳಿಕೆಗೆ ಅವಕಾಶ: ತಜ್ಞರ ವಿವರಣೆ ಹೀಗಿದೆ…

ಕರಡಿಯ ಕುಣಿತ ತಡೆದು ಗುಟುರು ಹಾಕಿದ ಗೂಳಿ: ಬೆಳಗ್ಗೆ ಕುಸಿದ ಷೇರು ಸೂಚ್ಯಂಕ ಮಧ್ಯಾಹ್ನ ಚೇತರಿಕೆ ಕಂಡಿದ್ದೇಕೆ?

ರಸ್ತೆ ನಿರ್ಮಾಣ ಕಂಪನಿ ಷೇರು ಒಂದೇ ದಿನದಲ್ಲಿ 20% ಏರಿಕೆ: ಅಪ್ಪರ್ ಸರ್ಕ್ಯೂಟ್ ಹಿಟ್​ ಹಿಂದಿದೆ ಪ್ರಮುಖ ಕಾರಣ