ಇಡೀ ಜಗತ್ತು ಕರೊನಾ ವಿರುದ್ಧ ಹೋರಾಟದಲ್ಲಿ ತೊಡಗಿದೆ. ಈ ವೈರಸ್ ಹರಡದಂತೆ ತಡೆಯಲು ಸದ್ಯಕ್ಕಂತೂ ಯಾವುದೇ ಲಸಿಕೆ ಲಭ್ಯವಿಲ್ಲ. ಆದರೆ, ಮನೆಯಲ್ಲಿದ್ದುಕೊಂಡು ಉಳಿದವರಿಂದ ದೂರವಿರುವುದೇ ಇದಕ್ಕೆ ಮದ್ದು. ಇದಕ್ಕಾಗಿ ಲಾಕ್ಡೌನ್ ಅನಿವಾರ್ಯ.
ಆದರೆ, ತಿಂಗಳುಗಟ್ಟಲೇ ಲಾಕ್ಡೌನ್ ಸ್ಥಿತಿಯನ್ನು ಯಾವ ದೇಶದ ಆರ್ಥಿಕತೆಯೂ ಸಹಿಸಿಕೊಳ್ಳುವುದು ಕಷ್ಟಸಾಧ್ಯ. ಹಾಗೆಂದು ಕರೊನಾ ಸೋಂಕು ವ್ಯಾಪಿಸುತ್ತಿದ್ದರೆ, ಅದನ್ನು ತಡೆಗಟ್ಟದೇ ಬದುಕುವುದು ಸಾಧ್ಯವಿಲ್ಲ.
ಹೀಗಾಗಿ ಲಾಕ್ಡೌನ್ ವಿಧಿಸದೇ ಕರೊನಾವನ್ನು ತಡೆಗಟ್ಟುವ ಉಪಾಯವನ್ನು ಬ್ರಿಟನ್ ನಗರವೊಮದು ಕಂಡುಕೊಂಡಿದೆ. ಸದ್ಯ ಬ್ರಿಟನ್ನಲ್ಲಿ 2.27 ಲಕ್ ಜನರಿಗೆ ಸೋಂಕು ತಗುಲಿದೆ ಹಾಗೂ 32 ಸಾವಿರ ಜನರು ಮೃತಪಟ್ಟಿದ್ದಾರೆ. ಅಲ್ಲಿನ ಸರ್ಕಾರ ಕೂಡ ಜೂನ್ ಅಂತ್ಯದವರೆಗೆ ಲಾಕ್ಡೌನ್ ವಿಸ್ತರಿಸುವ ಚಿಂತನೆ ನಡೆಸಿದೆ.
ಇದನ್ನೂ ಓದಿ; ವಿಶಾಖಪಟ್ಟಣ ವಿಷಾನಿಲ ದುರಂತಕ್ಕೆ ಯಾರೂ ಕಾರಣರಲ್ಲ…!
ಆದರೆ, ಲಂಡನ್ನಿಂದ 100 ಮೈಲಿ ದೂರವಿರುವ ನಾರ್ವಿಚ್ ಪಟ್ಟಣದ ಜನರಿಗೆ ಈ ತೊಂದರೆಯೇ ಇಲ್ಲ. ಏಕೆಂದರೆ ಅಲ್ಲಿ ಲಾಕ್ಡೌನ್ ವಿಧಿಸದಿರಲು ಸ್ಥಳೀಯಾಡಳಿತ ನಿರ್ಧರಿಸಿದೆ. ಅದರ ಬದಲು, ಅಲ್ಲಿರುವ 1.40 ಲಕ್ಷ ಜನರಿಗೆ ಪ್ರತಿವಾರ ಕೋವಿಡ್-19 ಪರೀಕ್ಷೆ ನಡೆಸಲಿದೆ. ಪೌರ ಕಾರ್ಮಿಕರು, ಟ್ಯಾಕ್ಸಿ ಚಾಲಕರು ಹಾಗೂ ಪೊಳಿಸ್ ಮೀಸಲು ಪಡೆಯನ್ನು ಈ ಉದ್ದೇಶಕ್ಕೆ ಬಳಸಿಕೊಳ್ಳಲಿದೆ. ಇಂಥದ್ದೊಂದು ಕ್ರಮ ಕೈಗೊಳ್ಳಲಿರುವ ಬ್ರಿಟನ್ನಿನ ಮೊದಲ ನಗರ ಎಂಬ ಹೆಗ್ಗಳಿಕೆಗೂ ನಾರ್ವಿಚ್ ಪಾತ್ರವಾಗಲಿದೆ.
ಕೋವಿಡ್-19 ಕಾಯಿಲೆ ನಿಯಂತ್ರಕ್ಕೆ ಲಸಿಕೆ ದೊರೆಉಯುವವರೆಗೆ ಇದು ಜನರಿಗೆ ಹೆಚ್ಚಿನ ಸ್ವಾತಂತ್ರ್ಯವನ್ನು ನೀಡಲಿದೆ. ಪ್ರತಿಯೊಬ್ಬರ ಗಂಟಲು ದ್ರವವನ್ನು ಸಂಗ್ರಹಿಸಿ ಪ್ರಯೋಗಾಲಯಕ್ಕೆ ಕಳುಹಿಸಲಾಗುತ್ತದೆ. ಒಂದು ವೇಳೆ ಸೋಂಕಿತರಾದರೆ ಪ್ರತ್ಯೇಕವಾಗಿರಿಸಿ ಚಿಕಿತ್ಸೆ ನೀಡಲಿದೆ.
ಇದನ್ನೂ ಓದಿ; 13 ವರ್ಷಗಳ ಕನಸಿನೊಂದಿಗೆ ಆತ ಹುಟ್ಟೂರಿಗೆ ಕೊಂಡೊಯ್ದದ್ದು ಏನು?
ಮೂರು ತಿಂಗಳವರೆಗೆ ಪ್ರತಿವಾರ ಪ್ರತಿಯೊಬ್ಬರನ್ನೂ ಕೋವಿಡ್ ಟೆಸ್ಟ್ಗೆ ಒಳಪಡಿಸಲು ಅಂದಾಜು 18 ಕೋಟಿ ರೂ. ಖರ್ಚಾಗಲಿದೆ ಎಂದು ಅಂದಾಜಿಸಲಾಗಿದೆ. ಇದಲ್ಲದೇ, ಸೌತ್ ಹ್ಯಾಂಪ್ಟನ್ ನಗರವೂ ಕೂಡ ಇಂಥದ್ದೇ ಪ್ರಸ್ತಾವನೆಯನ್ನು ಆರೋಗ್ಯ ಇಲಾಖೆ ಮುಂದಿರಿಸಿದೆ. ಒಂದು ವೇಳೆ ಇದು ಯಶಸ್ವಿಯಾದಲ್ಲಿ ಇಡೀ ದೇಶಾದ್ಯಂತ ವಿಸ್ತರಿಸುವ ಚಿಂತನೆಯನ್ನು ಹೊಂದಲಾಗಿದೆ.