ನವದೆಹಲಿ: ಚೀನಾದ ವುಹಾನ್ನಿಂದ ಆರಂಭವಾದ ಕೋವಿಡ್-19 ಪಿಡುಗು ವಿಶ್ವವ್ಯಾಪಿಯಾಗಿ ಹಬ್ಬಿದೆ. ಈ ನಡುವೆ ಒಂದು ರಾಷ್ಟ್ರ ಮಾತ್ರ ತಾನು ಕೋವಿಡ್-19 ಮುಕ್ತವಾಗಿರುವುದಾಗಿಯೂ, ಸೋಂಕು ನಿಯಂತ್ರಣಕ್ಕೆ ತಾನು ಜಾರಿಗೊಳಿಸಿದ್ದ ಎಲ್ಲ ನಿರ್ಬಂಧಗಳನ್ನು ರದ್ದುಗೊಳಿಸಿರುವುದಾಗಿ ಒಂದು ರಾಷ್ಟ್ರ ಘೋಷಿಸಿದೆ. ಅದುವೇ ನ್ಯೂಜಿಲೆಂಡ್ ರಾಷ್ಟ್ರವಾಗಿದೆ.
ಸರ್ಕಾರದ ಈ ನಿರ್ಧಾರವನ್ನು ಪ್ರಕಟಿಸಿರುವ ನ್ಯೂಜಿಲೆಂಡ್ ಪ್ರಧಾನಿ ಜೆಸಿಂಡಾ ಆರ್ಡೆನ್, ಭಾನುವಾರ ಮಧ್ಯರಾತ್ರಿ 12 ಗಂಟೆಯಿಂದ ಕೋವಿಡ್ ನಿರ್ಬಂಧಗಳೆಲ್ಲವನ್ನೂ ರದ್ದುಗೊಳಿಸಿರುವುದಾಗಿ ಹೇಳಿದ್ದಾರೆ. ಹೊಸ ನಿಯಮಗಳ ಪ್ರಕಾರ ನ್ಯೂಜಿಲೆಂಡ್ನಲ್ಲಿ ಇನ್ಮುಂದೆ ದೈಹಿಕ ಅಂತರ ಕಾಯ್ದುಕೊಳ್ಳುವ, ಸಾರ್ವಜನಿಕ ಸಭೆ, ಕಾರ್ಯಕ್ರಮಗಳು ಮತ್ತು ಸ್ಥಳಗಳಲ್ಲಿ ಇಷ್ಟೇ ಸಂಖ್ಯೆಯ ಜನರು ಇರಬೇಕು ಎಂಬ ನಿಯಮ ಸೇರಿ ಎಲ್ಲ ಕೋವಿಡ್ ನಿರ್ಬಂಧಗಳನ್ನು ಹಿಂಪಡೆದಿರುವುದಾಗಿ ತಿಳಿಸಿದ್ದಾರೆ.
ಇದನ್ನೂ ಓದಿ: ಮದುವೆಯಾಗಿ 12 ದಿನ ಬಳಿಕ ತವರಿಗೆ ಬಂದಾಕೆ ಹೆಣವಾದಳು ಏಕೆ?
ಸಂತೋಷದಿಂದ ಕುಣಿದೆ: ಕಳೆದ ಎರಡು ವಾರಗಳಿಂದ ನ್ಯೂಜಿಲೆಂಡ್ನಲ್ಲಿ ಯಾವುದೇ ಕೋವಿಡ್-19 ಪ್ರಕರಣಗಳು ಪತ್ತೆಯಾಗಿಲ್ಲ. ಹಾಗಾಗಿ ತಮ್ಮ ರಾಷ್ಟ್ರ ಕೋವಿಡ್ ಮುಕ್ತವಾಗಿದೆ ಎಂಬ ಸಂಗತಿ ಕೇಳಿ ತಾವು ಸಂತೋಷದಿಂದ ಕುಣಿದಾಡಿದ್ದಾಗಿ ಹೇಳಿದ್ದಾರೆ.
ರಾಷ್ಟ್ರ ಈಗ ಸುರಕ್ಷಿತವಾಗಿದ್ದು, ಬಲಿಷ್ಠವಾದ ಸ್ಥಾನದಲ್ಲಿದೆ. ಆದರೂ ಕೋವಿಡ್ ಪೂರ್ವದ ಪರಿಸ್ಥಿತಿಗೆ ಹಿಂದಿರುಗಲು ಸಾಕಷ್ಟು ಕಷ್ಟಪಡಬೇಕಾಗುತ್ತದೆ. ಆರೋಗ್ಯಕರವಾದ ನ್ಯೂಜಿಲೆಂಡ್ ನಿರ್ಮಾಣಕ್ಕೆ ಒತ್ತು ಕೊಟ್ಟ ರೀತಿಯಲ್ಲೇ ಆರ್ಥಿಕ ಪುನರುತ್ಥಾನಕ್ಕೂ ಹೆಚ್ಚಿನ ಒತ್ತು ನೀಡಿ ಕೆಲಸ ಮಾಡಲಾಗುವುದು ಎಂದು ಆರ್ಡೆನ್ ಹೇಳಿದ್ದಾರೆ.
ಥ್ಯಾಂಕ್ಯೂ ನ್ಯೂಜಿಲೆಂಡ್: ಕೋವಿಡ್ ಪಿಡುಗಿನ ಪ್ರಭಾವದಿಂದಲೂ ದೇಶ ಸುಧಾರಿಸದ ಹೊರತು ಏನೊಂದು ಸಾಧನೆ ಮಾಡಿದಂತಾಗುವುದಿಲ್ಲ. ಆದರೂ ಇದೊಂದು ಮೈಲಿಗಲ್ಲು ಎಂಬುದರಲ್ಲಿ ಎರಡು ಮಾತಿಲ್ಲ. ಆದರೆ ಪರಿಸ್ಥಿತಿ ಸುಧಾರಿಸಲು ಸರ್ಕಾರದೊಂದಿಗೆ ಕೈಜೋಡಿಸಿ ಕೆಲಸ ಮಾಡಿ ಸಹಕರಿಸಿದ್ದಕ್ಕಾಗಿ ನಿಮ್ಮೆಲ್ಲರಿಗೂ ಧನ್ಯವಾದ ಅರ್ಪಿಸಲು ಬಯಸುತ್ತೇನೆ. ಥ್ಯಾಂಕ್ಯೂ ನ್ಯೂಜಿಲೆಂಡ್ ಎಂದು ಜೆಸಿಂಡಾ ಹರ್ಷದಿಂದ ನುಡಿದಿದ್ದಾರೆ.