ದುಬೈ: ಮಕ್ಕಳು ತಪ್ಪು ಮಾಡಿದಾಗ ಶಿಕ್ಷಿಸುವ ಅಧಿಕಾರ ತಂದೆಗೆ ಇರುತ್ತದೆ. ಪುತ್ರ ವಾತ್ಸಲ್ಯಕ್ಕೆ ಕಟ್ಟು ಬೀಳದೆ, ತಪ್ಪು ಮಾಡಿದ ಮಗನನ್ನು ಶಿಕ್ಷಿಸುವ ಮೂಲಕ ಇಂಗ್ಲೆಂಡ್ನ ಕ್ರಿಸ್ ಬ್ರಾಡ್ ಕೂಡ ಕರ್ತವ್ಯ ಪ್ರಜ್ಞೆ ಮೆರೆದಿದ್ದಾರೆ! ಪ್ರವಾಸಿ ಪಾಕಿಸ್ತಾನ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯದಲ್ಲಿ ಇಂಗ್ಲೆಂಡ್ ವೇಗಿ ಸ್ಟುವರ್ಟ್ ಬ್ರಾಡ್, ಯಾಸಿರ್ ಷಾ ವಿರುದ್ಧ ಅನುಚಿತ ಪದ ಬಳಕೆ ಮಾಡಿದ್ದರು. ಈ ಘಟನೆ ಸಂಬಂಧ ಪಂದ್ಯದ ಮ್ಯಾಚ್ ರೆಫ್ರಿಯಾಗಿದ್ದ ಕ್ರಿಸ್ ಬ್ರಾಡ್ ಅವರು ಪುತ್ರ ಸ್ಟುವರ್ಟ್ ಬ್ರಾಡ್ಗೆ ದಂಡ ಶಿಕ್ಷೆ ವಿಧಿಸಿದ್ದಾರೆ.
ಮ್ಯಾಂಚೆಸ್ಟರ್ನಲ್ಲಿ ನಡೆದ ಪಂದ್ಯದಲ್ಲಿ ಶನಿವಾರ ಪಾಕಿಸ್ತಾನದ 2ನೇ ಇನಿಂಗ್ಸ್ನ 46ನೇ ಓವರ್ ವೇಳೆ ಸ್ಟುವರ್ಟ್ ಬ್ರಾಡ್ ಅವರು ಪಾಕ್ ಸ್ಪಿನ್ನರ್ ಯಾಸಿರ್ ಷಾ ವಿಕೆಟ್ ಕಬಳಿಸಿದ ಬಳಿಕ ಅನುಚಿತ ಪದ ಪ್ರಯೋಗ ಮಾಡಿದ್ದರು. ಈ ಮೂಲಕ ಸ್ಟುವರ್ಟ್ ಬ್ರಾಡ್ ಅವರು ಐಸಿಸಿ ನೀತಿ ಸಂಹಿತೆ 2.5 ವಿಧಿಯ ಉಲ್ಲಂಘನೆ ಮಾಡಿದ್ದಾರೆ ಎಂದು ಮ್ಯಾಚ್ ರೆಫ್ರಿ ಕ್ರಿಸ್ ಬ್ರಾಡ್ ಪರಿಗಣಿಸಿದ್ದಾರೆ. ಇದಕ್ಕಾಗಿ ಸ್ಟುವರ್ಟ್ ಬ್ರಾಡ್ಗೆ ಪಂದ್ಯ ಸಂಭಾವನೆಯ ಶೇ. 15ರಷ್ಟು ದಂಡ ಶಿಕ್ಷೆ ವಿಧಿಸಲಾಗಿದೆ. ಜತೆಗೆ 1 ಡಿಮೆರಿಟ್ ಅಂಕದ ಶಿಸ್ತುಕ್ರಮವನ್ನೂ ತೆಗೆದುಕೊಳ್ಳಲಾಗಿದೆ. ಮ್ಯಾಚ್ ರೆಫ್ರಿ ಸಾಮಾನ್ಯವಾಗಿ ತಟಸ್ಥ ದೇಶಕ್ಕೆ ಸೇರಿದವರಾಗಿರುತ್ತಾರೆ. ಆದರೆ ಈ ಬಾರಿ ಕರೊನಾ ವೈರಸ್ ಹಾವಳಿಯಿಂದ ಅಂತಾರಾಷ್ಟ್ರೀಯ ಪ್ರಯಾಣ ನಿರ್ಬಂಧಗಳಿರುವ ಕಾರಣದಿಂದಾಗಿ, ಆತಿಥೇಯ ದೇಶದವರನ್ನೇ ಅಂಪೈರ್ ಮತ್ತು ಮ್ಯಾಚ್ ರೆಫ್ರಿಗಳನ್ನಾಗಿ ನೇಮಿಸಲು ಐಸಿಸಿ ಅವಕಾಶ ನೀಡಿದೆ.
ಸ್ಟುವರ್ಟ್ ಬ್ರಾಡ್ ಅವರು ಕಳೆದ 24 ತಿಂಗಳ ಅವಧಿಯಲ್ಲಿ 2ನೇ ಬಾರಿ ಐಸಿಸಿ ನೀತಿ ಸಂಹಿತೆಯನ್ನು ಉಲ್ಲಂಘಿಸಿದ್ದಾರೆ. ಇದರಿಂದಾಗಿ ಅವರ ಒಟ್ಟು ಡಿಮೆರಿಟ್ ಅಂಕಗಳ ಸಂಖ್ಯೆ ಈಗ 3ಕ್ಕೇರಿದೆ. ಈ ಹಿಂದೆ ಜನವರಿಯಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧದ ವಾಂಡರರ್ಸ್ ಟೆಸ್ಟ್ ಪಂದ್ಯದ ವೇಳೆಯೂ ಅವರು ಐಸಿಸಿ ನೀತಿ ಸಂಹಿತೆ ಉಲ್ಲಂಘಿಸಿದ್ದರು. ಅದಕ್ಕೆ ಮುನ್ನ 2018ರ ಟ್ರೆಂಟ್ ಬ್ರಿಡ್ಜ್ ಟೆಸ್ಟ್ನಲ್ಲಿ ಪ್ರವಾಸಿ ಭಾರತ ತಂಡದ ವಿರುದ್ಧವೂ ಅನುಚಿತ ವರ್ತನೆ ತೋರಿದ್ದರು.
ಇದನ್ನೂ ಓದಿ: ಲಂಕಾ ಪ್ರೀಮಿಯರ್ ಲೀಗ್ ದಿಢೀರ್ ಮುಂದೂಡಿಕೆ, ಕ್ವಾರಂಟೈನ್ ನಿಯಮವೇ ಕಾರಣ!
ಐಸಿಸಿ ಮ್ಯಾಚ್ ರೆಫ್ರಿ ಕ್ರಿಸ್ ಬ್ರಾಡ್ ಎದುರು ನಡೆದ ವಿಚಾರಣೆಯ ವೇಳೆ ಸ್ಟುವರ್ಟ್ ಬ್ರಾಡ್ ತಮ್ಮ ತಪ್ಪನ್ನು ಒಪ್ಪಿಕೊಂಡಿದ್ದಾರೆ. ಮೈದಾನದ ಅಂಪೈರ್ಗಳಾದ ರಿಚರ್ಡ್ ಕಿಟ್ಟೆಲ್ಬೊರೋ ಮತ್ತು ರಿಚರ್ಡ್ ಎಲ್ಲಿಂಗ್ವರ್ತ್ ಮತ್ತು ತೃತೀಯ ಅಂಪೈರ್ ಮೈಕೆಲ್ ಗೋವ್ ಅವರು ಸ್ಟುವರ್ಟ್ ಬ್ರಾಡ್ ವರ್ತನೆಯ ವಿರುದ್ಧ ಮ್ಯಾಚ್ ರೆಫ್ರಿಗೆ ದೂರು ಸಲ್ಲಿಸಿದ್ದರು. ಈ ಪ್ರಕರಣದಲ್ಲಿ ಸ್ಟುವರ್ಟ್ ಬ್ರಾಡ್ಗೆ ಗರಿಷ್ಠ ಶೇ. 50ರಷ್ಟು ದಂಡ ವಿಧಿಸಲು ಅವಕಾಶವಿತ್ತು ಎನ್ನಲಾಗಿದೆ.