ಬೆಂಗಳೂರು: ಸ್ಯಾಂಡಲ್ವುಡ್ನ ಡ್ರಗ್ಸ್ ನಂಟಿನ ಕುರಿತು ದಿಗಂತ್ ಮತ್ತು ಐಂದ್ರಿತಾ ರೇ ಅವರನ್ನು ಸಿಸಿಬಿ ಪೊಲೀಸರು ವಿಚಾರಣೆ ಮಾಡುತ್ತಾರೆ ಎಂಬ ಸುದ್ದಿ ಹೊರಬೀಳುತ್ತಿದ್ದಂತೆಯೇ, ಅವರ ಮುಂದಿನ ಚಿತ್ರಗಳ ಕಥೆಯೇನು ಎಂಬ ಪ್ರಶ್ನೆ ತಲೆದೋರಿತ್ತು. ಡ್ರಗ್ಸ್ ಮಾಫಿಯಾಗೆ ಸಂಬಂಧಿಸಿದಂತೆ ದಿಗಂತ್ ಅವರ ಹೆಸರು ತುಳುಕು ಹಾಕಿಕೊಂಡಿರುವುದರಿಂದ ಅವರ ಚಿತ್ರಗಳ ಚಿತ್ರೀಕರಣಕ್ಕೆ ಸಮಸ್ಯೆ ಎದುರಾಗಬಹುದು ಎಂದು ಭಯ ಅವರ ಚಿತ್ರಗಳ ನಿರ್ಮಾಪಕರಿಗಿತ್ತು.
ಆದರೆ, ಈ ಸಮಸ್ಯೆಯಿಂದ ದಿಗಂತ್ ಯಶಸ್ವಿಯಾಗಿ ಹೊರಬಂದಿದ್ದಷ್ಟೇ ಅಲ್ಲ, ಇದೀಗ ‘ಮಾರಿ ಗೋಲ್ಡ್’ ಎಂಬ ಚಿತ್ರದ ಚಿತ್ರೀಕರಣವನ್ನೂ ಮುಗಿಸಿದ್ದಾರೆ.
ಇದನ್ನೂ ಓದಿ: ಡಿ. 21ಕ್ಕೆ ಐರಾವನ್ ಚಿತ್ರದ ಟೀಸರ್; ಜೆಕೆ ಸಿನಿಮಾಕ್ಕೆ ಕಿಚ್ಚ ಸುದೀಪ್ ಸಾಥ್
ಲಾಕ್ಡೌನ್ಗಿಂತ ಮುನ್ನ ದಿಗಂತ್, ‘ಗಾಳಿಪಟ 2’ ಮತ್ತು ‘ಮಾರಿ ಗೋಲ್ಡ್’ ಚಿತ್ರಗಳಲ್ಲಿ ನಟಿಸುತ್ತಿದ್ದರು. ಎರಡೂ ಚಿತ್ರಗಳ ಸ್ವಲ್ಪ ಭಾಗದ ಚಿತ್ರೀಕರಣವಾಗಿತ್ತು. ಅಷ್ಟರಲ್ಲಿ ಲಾಕ್ಡೌನ್ ಘೋಷಣೆಯಾಯಿತು. ಹಾಗಾಗಿ ಎರಡೂ ಚಿತ್ರಗಳ ಚಿತ್ರೀಕರಣ ನಿಂತಿತ್ತು. ಲಾಕ್ಡೌನ್ ತೆರವಾಗಿ ಇನ್ನೇನು ‘ಮಾರಿ ಗೋಲ್ಡ್’ ಚಿತ್ರದ ಚಿತ್ರೀಕರಣ ಶುರುವಾಗಬೇಕು ಎನ್ನುವಷ್ಟರಲ್ಲೇ ಡ್ರಗ್ಸ್ ಜಾಲದಲ್ಲಿ ದಿಗಂತ್ ಹೆಸರು ಕೇಳಿಬಂದಿತ್ತು.
ಆದರೆ, ಈ ವಿಷಯವಾಗಿ ಯಾವುದೇ ಭಯ ಬೇಡ ಎಂದಿದ್ದ ದಿಗಂತ್, ಸೆಪ್ಟೆಂಬರ್ 18ರಿಂದ ‘ಮಾರಿ ಗೋಲ್ಡ್’ ಚಿತ್ರದ ಚಿತ್ರೀಕರಣದಲ್ಲಿ ಭಾಗವಹಿಸಿದ್ದರು. ಈಗ ಆ ಚಿತ್ರದ ಚಿತ್ರೀಕರಣ ಯಶಸ್ವಿಯಾಗಿ ಮುಗಿದಿದ್ದು, ಚಿತ್ರಕ್ಕಾಗಿ ಕುಂಬಳಕಾಯಿ ಒಡೆಯಲಾಗಿದೆ. ರಾಘವೇಂದ್ರ ನಾಯಕ್ ನಿರ್ದೇಶಿಸಿರುವ ‘ಮಾರಿ ಗೋಲ್ಡ್’ ಚಿತ್ರವು ಕ್ರೈಮ್ ಥ್ರಿಲ್ಲರ್ ಆಗಿದ್ದು, ಸಾಕಷ್ಟು ಹಾಸ್ಯಮಯ ಅಂಶಗಳು ಸಹ ಇವೆ ಎಂದು ಹೇಳಲಾಗುತ್ತಿದೆ.
ಇದನ್ನೂ ಓದಿ: ದೊಡ್ಡ ಗಣಪತಿ ದೇವಸ್ಥಾನದಲ್ಲಿ ಚಿತ್ರೀಕರಣ ಮುಗಿಸಿದ ‘ಬನಾರಸ್’ ತಂಡ
‘ಮಾರಿ ಗೋಲ್ಡ್’ ಚಿತ್ರದಲ್ಲಿ ದಿಗಂತ್ಗೆ ನಾಯಕಿಯಾಗಿ ಸಂಗೀತ ಶೃಂಗೇರಿ ನಟಿಸುತ್ತಿದ್ದು ಮಿಕ್ಕಂತೆ ಸಂಪತ್, ಯಶ್ ಶೆಟ್ಟಿ, ‘ಸಿದ್ಲಿಂಗು’ ಶ್ರೀಧರ್, ‘ಕಾಕ್ರೋಚ್’ ಸುಧಿ ಮುಂತಾದವರು ನಟಿಸುತ್ತಿದ್ದಾರೆ. ರಘುವರ್ಧನ್ ನಿರ್ಮಿಸುತ್ತಿರುವ ಈ ಚಿತ್ರಕ್ಕೆ ವೀರ್ ಸಮರ್ಥ್ ಸಂಗೀತ ಸಂಯೋಜಿಸಿದ್ದಾರೆ.