ಪಣಜಿ: ಹಳೆ ಕಾಲದಲ್ಲಿ ಕಳೆದು ಹೋದ ವಸ್ತುಗಳನ್ನು ಪತ್ತೆ ಹಚ್ಚಲು ಪೊಲೀಸ್ ಠಾಣೆ, ದೇವಸ್ಥಾನ, ಜೋತಿಷ್ಯಗಳ ಮೊರೆ ಹೋಗುತ್ತಿದ್ದರು. ಆದರೆ ಈಗಿನ ತಂತ್ರಜ್ಞಾನ ಯುಗದಲ್ಲಿ ಕಳೆದು ಹೋದ ವಸ್ತುಗಳನ್ನು ಹುಡುಕುವುದು ಅತೀ ಸುಲಭ.
ಫೇಸ್ಬುಕ್, ಇನ್ಸ್ಟಾಗ್ರಾಮ್, ಎಕ್ಸ್ನಲ್ಲಿ ಸೇರಿದಂತೆ ಸಾಮಾಜಿಕ ಜಾಲತಾಣಗಳಲ್ಲಿ ಆ ವಸ್ತುವಿನ ಫೋಟೋ ಅದರ ವಿವರ ಬರೆದರೆ ಕ್ಷಣಾರ್ಧದಲ್ಲಿ ಆ ಮಾಹಿತಿ ಜನರಿಗೆ ತಲುಪುತ್ತದೆ. ಕಳೆದು ಹೋದ ವಸ್ತು ಇನ್ನೆಂದೂ ಸಿಗದು ಎಂಬ ನೋವಿನಲ್ಲಿ ದಿನಕಳೆಯುತ್ತಿರುವಾಗ ಒಂದು ದಿನ ಈ ವಸ್ತು ಸಿಕ್ಕರೆ ಆಗ ಆಗುವ ಅನುಭವ ಎಂತಹದ್ದು…? ಇದನ್ನು ಬರೀ ಪದಗಳಲ್ಲಿ ಕಟ್ಟಿಕೊಡಲು ಸಾಧ್ಯವಿಲ್ಲ. ಇದೇ ಘಟನೆ ಇಲ್ಲಿ ಆಗಿದ್ದು ನೋಡಿ….
ಮುಂಬೈ ಮೂಲದ ನಿಖಿಲ್ ಜೈನ್ ಎಂಬವರು ಇತ್ತೀಚೆಗೆ ಕೇರಳಕ್ಕೆ ಭೇಟಿ ನೀಡಿದ್ದ ಸಂದರ್ಭದಲ್ಲಿ ಏರ್ಪಾಡ್ಸ್ಗಳನ್ನು ಕಳೆದುಕೊಂಡಿದ್ದರು. ಈ ಬಗ್ಗೆ ಸಾಮಾಜಿಕ ಜಾಲತಾಣ ಎಕ್ಸ್ನಲ್ಲಿ ಪೋಸ್ಟ್ವೊಂದನ್ನು ಹಾಕಿದ್ದರು. ಇದಕ್ಕೆ ಸ್ಪಂದಿಸಿರುವ ಪೊಲೀಸರು ಕಳೆದುಹೋಗಿದ್ದ ಏರ್ಪಾಡ್ಸ್ಅನ್ನು ಪತ್ತೆ ಹಚ್ಚಿ ನಿಖಿಲ್ ಜೈನ್ಗೆ ತಲುಪಿಸುವಲ್ಲಿ ಯಶಸ್ವಿಯಾಗಿದ್ದಾರೆ.
ಕೇರಳದಲ್ಲಿ ಕಳೆದುಕೊಂಡ ಏರ್ಪಾಡ್ಸ್ ಗೋವಾದಲ್ಲಿ ಪತ್ತೆ ಹಚ್ಚಿ ಮರಳಿ ಪಡೆದಿದ್ದಾರೆ. ಸಾಮಾಜಿಕ ಜಾಲತಾಣ ಬಳಸಿಕೊಂಡು ವ್ಯಕ್ತಿಯು ಪೊಲೀಸರ ಸಹಾಯದಿಂದ ಏರ್ಪಾಡ್ಸ್ ಪತ್ತೆ ಹಚ್ಚಿದ್ದಾರೆ. ಏರ್ಪಾಡ್ಸ್ ಟ್ರಾಕಿಂಗ್ ಮಾಡುತ್ತಿದ್ದಾಗ ಗೋವಾದ ಮಾರ್ಗಾಂವ್ ಪೊಲೀಸ್ ಠಾಣೆಯಲ್ಲಿರುವುದು ಪತ್ತೆಯಾಗಿದೆ ಎಂದು ತಮ್ಮ ಎಕ್ಸ್ ಖಾತೆಯಲ್ಲಿ ಮಾಹಿತಿ ಹಂಚಿಕೊಂಡಿದ್ದಾನೆ. ಹುಡುಕಿಕೊಟ್ಟ ಪೊಲೀಸರಿಗೆ ಧನ್ಯವಾದ ಹೇಳಿದ್ದಾರೆ.
ಎರಡು ದಿನಗಳ ಹಿಂದೆ ಕೇರಳದಲ್ಲಿ ಏರ್ಪಾಡ್ಸ್ ಕಳೆದುಕೊಂಡಿದ್ದೇನೆ. ಅನಾಮಿಕ ವ್ಯಕ್ತಿಯೊಬ್ಬ ಗೋವಾದಲ್ಲಿ ಏರ್ಪಾಡ್ಸ್ನೊಂದಿಗೆ ಕಳೆದ ಎರಡು ದಿನಗಳಿಂದ ಸಂಚರಿಸುತ್ತಿದ್ದಾನೆ. ದಕ್ಷಿಣ ಗೋವಾದ ಸಾಲ್ಸೆಟೆಯ ಡಾ.ಅಲ್ವಾರೊ ಡಿ ಲೊಯೊಲಾ ಫುರ್ಟಾಡೊ ರಸ್ತೆಯಲ್ಲಿ ಆ ವ್ಯಕ್ತಿ ಸಂಚರಿಸುತ್ತಿದ್ದಾನೆ. ಏರ್ಪಾಡ್ಸ್ ಪಡೆಯಲು ಸಹಾಯ ಮಾಡಿ ಎಂದು ನಿಖಿಲ್ ತಮ್ಮ ಎಕ್ಸ್ ನಲ್ಲಿ ಬರೆದುಕೊಂಡಿದ್ದ.