ಬೆಂಗಳೂರು: ಕ್ರಿಕೆಟ್ ಆಟ ಮತ್ತು ಜಾಹೀರಾತುಗಳ ಜತೆಜತೆಯಲ್ಲೇ ಇನ್ಸ್ಟಾಗ್ರಾಂ ಪೋಸ್ಟ್ಗಳ ಮೂಲಕವೂ ಹಣ ಸಂಪಾದನೆ ಮಾಡುತ್ತ ಬಂದಿರುವ ಟೀಮ್ ಇಂಡಿಯಾ ನಾಯಕ ವಿರಾಟ್ ಕೊಹ್ಲಿ ತಮ್ಮ 1000ನೇ ಪೋಸ್ಟ್ ಅನ್ನು ವಿಶೇಷ ರೀತಿಯಲ್ಲಿ ಸಂಭ್ರಮಿಸಿದ್ದಾರೆ. ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ 12 ವರ್ಷಗಳ ಕಾಲ ಆಡುತ್ತ ಸಾಕಷ್ಟು ಕಲಿತಿರುವೆ ಎಂದು ಅವರು ಈ ಪೋಸ್ಟ್ ಮೂಲಕ ತಿಳಿಸಿದ್ದು, ತಮ್ಮೊಂದಿಗೆ ತಾವೇ ಬ್ಯಾಟಿಂಗ್ ಮಾಡುತ್ತಿರುವ ರೀತಿಯಲ್ಲಿ ತಮ್ಮದೇ 2 ಚಿತ್ರಗಳು ಎಡಿಟ್ ಮಾಡಿ ಪ್ರಕಟಿಸುವ ಮೂಲಕ ಗಮನಸೆಳೆದಿದ್ದಾರೆ.
‘2008-2020. ಈ ದಾರಿಯಲ್ಲಿ ಸಾಕಷ್ಟು ಕಲಿತಿದ್ದೇನೆ. ನಿಮ್ಮ ಪ್ರೀತಿ ಮತ್ತು ಬೆಂಬಲಕ್ಕೆ ನಾನು ಚಿರಋಣಿಯಾಗಿದ್ದೇನೆ. ಇದು ನನ್ನ 1000ನೇ ಪೋಸ್ಟ್’ ಎಂದು ವಿರಾಟ್ ಕೊಹ್ಲಿ ಗುರುವಾರದ ಪೋಸ್ಟ್ನಲ್ಲಿ ತಿಳಿಸಿದ್ದಾರೆ. ಇದರಲ್ಲಿ ಅವರು 2008ರಲ್ಲಿ ತಾವು ಪದಾರ್ಪಣೆ ಮಾಡಿದ ಸಮಯದ ಬ್ಯಾಟಿಂಗ್ ಚಿತ್ರ ಮತ್ತು ಈಗ ಟೀಮ್ ಇಂಡಿಯಾ ನಾಯಕರಾಗಿರುವ ಸಮಯದ ಬ್ಯಾಟಿಂಗ್ ಚಿತ್ರಗಳನ್ನು ವಿಲೀನ ಮಾಡಿದ್ದಾರೆ. ಕೊಹ್ಲಿ ಇನ್ಸ್ಟಾಗ್ರಾಂನಲ್ಲಿ ಸರ್ವಾಧಿಕ 69.4 ದಶಲಕ್ಷ ಹಿಂಬಾಲಕರನ್ನು ಹೊಂದಿರುವ ಭಾರತೀಯರಾಗಿದ್ದಾರೆ. ಇನ್ಸ್ಟಾಗ್ರಾಂನ ವಾಣಿಜ್ಯ ಪೋಸ್ಟ್ಗಳ ಮೂಲಕ ಅತ್ಯಧಿಕ ಹಣ ಸಂಪಾದನೆ ಮಾಡುತ್ತಿರುವ ವಿಶ್ವ ಅಗ್ರ 10 ಕ್ರೀಡಾಪಟುಗಳ ಪಟ್ಟಿಯಲ್ಲಿ ಅವರು ಏಕೈಕ ಕ್ರಿಕೆಟಿಗರಾಗಿದ್ದಾರೆ.
ಇದನ್ನೂ ಓದಿ: ಚಾಹಲ್ 30ನೇ ಬರ್ತ್ಡೇಗೆ ಕಾಲೆಳೆಯುತ್ತಲೇ ಶುಭಾಶಯ ಹೇಳಿದ ಯುವರಾಜ್
31 ವರ್ಷದ ವಿರಾಟ್ ಕೊಹ್ಲಿ 2008ರಲ್ಲಿ ಅಂತಾರಾಷ್ಟ್ರೀಯ ಕ್ರಿಕೆಟ್ ಪ್ರವೇಶಿಸಿದ್ದರು. ಇದುವರೆಗೆ 86 ಟೆಸ್ಟ್, 248 ಏಕದಿನ ಮತ್ತು 82 ಟಿ20 ಪಂದ್ಯಗಳನ್ನು ಆಡಿದ್ದಾರೆ. ಇದರಲ್ಲಿ ಕ್ರಮವಾಗಿ 7240, 11867 ಮತ್ತು 2794 ರನ್ ಬಾರಿಸಿದ್ದಾರೆ. ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ 70 ಶತಕಗಳನ್ನೂ (ಟೆಸ್ಟ್ನಲ್ಲಿ 27, ಏಕದಿನದಲ್ಲಿ 43)ಸಿಡಿಸಿದ್ದು, ಐಸಿಸಿ ರಾಂಕಿಂಗ್ನಲ್ಲಿ ಈಗ ಏಕದಿನದಲ್ಲಿ ನಂ. 1, ಟೆಸ್ಟ್ನಲ್ಲಿ ನಂ. 2 ಮತ್ತು ಟಿ20ಯಲ್ಲಿ ನಂ. 10 ಬ್ಯಾಟ್ಸ್ಮನ್ ಆಗಿದ್ದಾರೆ.
2030ರವರೆಗೆ ಮುಂದುವರಿಯಿರಿ ಎಂದ ಹರ್ಭಜನ್
ಇನ್ಸ್ಟಾಗ್ರಾಂ ಪೋಸ್ಟ್ ಜತೆಗೆ ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ 12 ವರ್ಷ ಪೂರೈಸಿರುವುದನ್ನು ನೆನಪಿಸಿಕೊಂಡಿರುವ ವಿರಾಟ್ ಕೊಹ್ಲಿಗೆ 2030ರವರೆಗೂ ಮುಂದುವರಿಯುವಂತೆ ಹಿರಿಯ ಸ್ಪಿನ್ನರ್ ಹರ್ಭಜನ್ ಸಿಂಗ್ ಶುಭಹಾರೈಸಿದ್ದಾರೆ. 2008ರಲ್ಲಿ 19 ವಯೋಮಿತಿ ವಿಶ್ವಕಪ್ ಜಯಿಸಿದ ಬೆನ್ನಲ್ಲೇ ಕೊಹ್ಲಿ ಅಂತಾರಾಷ್ಟ್ರೀಯ ಕ್ರಿಕೆಟ್ ಪ್ರವೇಶಿಸಿದ್ದರು.
ಕೊಹ್ಲಿ ಪೋಸ್ಟ್ಗೆ ನಟ ಡ್ಯಾನಿಷ್ ಸೇಠ್ ತಮಾಷೆಯಾಗಿ ಪ್ರತಿಕ್ರಿಯೆ ನೀಡಿದ್ದು, ಕಳೆದ ರಾತ್ರಿ ಕುಡಿದ ನಶೆ ಇನ್ನೂ ಇಳಿದಿಲ್ಲ ಎಂದು ಭಾವಿಸಿದ್ದೆ. ಇಲ್ಲ, ನಿಜಕ್ಕೂ ಚಿತ್ರದಲ್ಲಿ ಇಬ್ಬರು ವಿರಾಟ್ ಇದ್ದಾರೆ ಎಂದು ಕಮೆಂಟ್ ಹಾಕಿದ್ದಾರೆ. ಕೊಹ್ಲಿ ಪತ್ನಿ ಅನುಷ್ಕಾ ಕೂಡ 2 ಹೃದಯದ ಇಮೋಜಿಗಳ ಮೂಲಕ ಈ ಪೋಸ್ಟ್ಗೆ ಕಮೆಂಟ್ ಹಾಕಿದ್ದಾರೆ.