ಮುಂಬೈ: ಬಾಲಿವುಡ್ನಲ್ಲಿ ಬೇಡಿಕೆಯ ನಟಿ ಯಾರು ಎಂದರೆ, ಮೊದಲು ಬರುವ ಹೆಸರು ಕಿಯಾರಾ ಅಡ್ವಾನಿ ಅವರದ್ದು. ಈಗಾಗಲೇ, ‘ಜುಗ್ ಜುಗ್ ಜೀಯೋ’, ‘ಭೂಲ್ ಬುಲ್ಲಯ್ಯಾ 2’, ‘ಶೇರ್ಷಾ’ ಮುಂತಾದ ಚಿತ್ರಗಳಲ್ಲಿ ನಟಿಸುತ್ತಿರುವ ಕಿಯಾರಾ, ಇದೀಗ ಹೊಸ ಚಿತ್ರವೊಂದನ್ನು ಒಪ್ಪಿಕೊಂಡಿದ್ದಾರೆ.
ಇದನ್ನೂ ಓದಿ: ನಟ ಚಂದು ಗೌಡ ಆ್ಯಂಡ್ ಗ್ಯಾಂಗ್ಗೆ ಹೊಡೆಯಿತು ಜಾಕ್ಪಾಟ್!
ಅಂದಹಾಗೆ, ಕಿಯಾರಾ ಒಪ್ಪಿರುವ ಹೊಸ ಚಿತ್ರದ ಹೆಸರು ‘ಕರ್ರಂ ಕುರ್ರಂ’. ಈ ಹೆಸರನ್ನು ಎಲ್ಲೋ ಕೇಳಿದ ಹಾಗಿದೆಯಲ್ಲಾ ಎಂಬ ಪ್ರಶ್ನೆ ಬರುವುದು ಸಹ. ಲಿಜ್ಜತ್ ಪಾಪಡ್ ಜಾಹೀರಾತಿನಲ್ಲಿ ‘ಕರ್ರಂ ಕುರ್ರಂ’ ಎಂಬ ಹಾಡು ಕೇಳಿರುತ್ತೀರಿ. ಈಗ ಅದೇ ಹೆಸರಿನಲ್ಲಿ ಸಿನಿಮಾ ಆಗುತ್ತಿದೆ.
ಬರೀ ಜಾಹೀರಾತು ಮತ್ತು ಹಾಡಷ್ಟೇ ಅಲ್ಲ, ಇದು ಶ್ರೀ ಮಹಿಳಾ ಗೃಹ ಉದ್ಯೋಗ್ ಎಂಬ ಮಹಿಳಾ ಸಹಕಾರ ಸಂಘದ ಕುರಿತಾದ ಚಿತ್ರವಾಗಿದೆ. ಹಲವು ವರ್ಷಗಳ ಹಿಂದೆ ಗುಜರಾತಿನ ಆರು ಮಹಿಳೆಯರು ಈ ಸಂಸ್ಥೆಯನ್ನು ಹುಟ್ಟುಹಾಕಿ, ಲಿಜ್ಜತ್ ಪಾಪಡ್ ಮಾರುವುದಕ್ಕೆ ಶುರು ಮಾಡಿದರೆ. ಹೀಗೆ ಶುರುವಾದ ಸಣ್ಣ ಸಂಸ್ಥೆಯೊಂದು ಹೇಗೆ ದೇಶಾದ್ಯಂತ ಬೆಳೆದು ಹೆಸರು ಮಾಡಿತು ಎಂಬ ಕಥೆ ಈ ಚಿತ್ರದಲ್ಲಿದೆ.
ಶ್ರೀ ಮಹಿಳಾ ಗೃಹ ಉದ್ಯೋಗ್ ಎಂಬ ಮಹಿಳಾ ಸಹಕಾರ ಸಂಘದ ಹುಟ್ಟಿಗೆ ಕಾರಣರಾದ ಮಹಿಳೆಯ ಪಾತ್ರದಲ್ಲಿ ಕಿಯಾರಾ ಅಡ್ವಾಣಿ ನಟಿಸುತ್ತಿದ್ದು, ‘ಕರ್ರಂ ಕುರ್ರಂ’ ಚಿತ್ರದಲ್ಲಿ ಅವರು ಹಪ್ಪಳ ಮಾಡುವ ಮತ್ತು ಮಾರುವ ಗೃಹಿಣಿಯಾಗಿ ಕಾಣಿಸಿಕೊಳ್ಳುತ್ತಿರುವುದು ವಿಶೇಷ. ಇಲ್ಲಿಯವರೆಗೂ ಗ್ಲಾಮರ್ ಗೊಂಬೆಯಾಗಿ ಕಾಣಿಸಿಕೊಂಡಿದ್ದ ಅವರು, ಈ ಚಿತ್ರದಲ್ಲಿ ವಿಭಿನ್ನ ಪಾತ್ರವೊಂದರಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ.
ಇದನ್ನೂ ಓದಿ: ಅಯೋಧ್ಯೆಯಲ್ಲಿ ‘ರಾಮ್ ಸೇತು’ ಶೂಟಿಂಗ್ ವಿಚಾರ: ಅಕ್ಷಯ್ ಬೇಡಿಕೆಗೆ ಸಿಎಂ ಆದಿತ್ಯನಾಥ ಏನಂದ್ರು?
ಈ ಚಿತ್ರವನ್ನು ನಿರ್ಮಿಸುತ್ತಿರುವವರು ಬಾಲಿವುಡ್ನ ಜನಪ್ರಿಯ ನಿರ್ಮಾಪಕ ಅಶುತೋಶ್ ಗೊವಾರಿಕರ್. ಈ ಹಿಂದೆ ಅವರ ಜತೆಗೆ ಸಹಾಯಕ ನಿರ್ದೇಶಕರಾಗಿ ಕೆಲಸ ಮಾಡಿದ್ದ ಗ್ಲೆನ್ ಬರೆಟ್ಟೋ ಮತ್ತು ಅಂಕುಶ್ ಮೊಹ್ಲಾ, ಈ ಚಿತ್ರಕ್ಕೆ ಕಥೆ-ಚಿತ್ರಕಥೆ ಬರೆದು ನಿರ್ದೇಶನ ಮಾಡುತ್ತಿದ್ದಾರೆ. ಮುಂದಿನ ವರ್ಷ ಈ ಚಿತ್ರ ಪ್ರಾರಂಭವಾಗಲಿದೆ.