ಮುಂಬೈ: ಬಾಲಿವುಡ್ನಲ್ಲಿ ಹಳೆಯ ಹಿಟ್ ಚಿತ್ರಗಳ ರೀಮೇಕ್ ಪರ್ವ ಮುಂದುವರೆದಿದೆ. ಇತ್ತೀಚೆಗಷ್ಟೇ, ‘ಅಂಗೂರ್’ ಚಿತ್ರದ ರೀಮೇಕ್ ಆಗಿದ್ದ ‘ಸರ್ಕಸ್’ ಬಿಡುಗಡೆಯಾಗಿ ಹೇಳಹೆಸರಿಲ್ಲದಂತೆ ಮಾಯವಾಗಿದೆ. ‘ರಾಮ್ ಲಖನ್’ ಚಿತ್ರದ ರೀಮೇಕ್ ಚರ್ಚೆ ನಡೆಯುತ್ತಲೇ ಇದೆ. ಇದರ ಮಧ್ಯೆ, ಬಾಲಿವುಡ್ನ ಸೂಪರ್ ಹಿಟ್ ಚಿತ್ರಗಳ ಪೈಕಿ ಒಂದಾದ ‘ತೇಜಾಬ್’ ಸಹ ಈಗ ರೀಮೇಕ್ ಆಗುತ್ತಿದೆ ಎಂಬ ಸುದ್ದಿ ಜೋರಾಗಿ ಕೇಳಿಬರುತ್ತಿದೆ.
ಇದನ್ನೂ ಓದಿ: ಧಮ್ ಇದ್ರೆ ಹೊಡಿ ನನ್ನ, ದಿಲ್ ಇದ್ರೆ ತಡಿ ನನ್ನ … ಡಾಲಿ ಹೀಗೆ ಹೇಳಿದ್ದು ಯಾರಿಗೆ?
2021ರಲ್ಲೇ ‘ತೇಜಾಬ್’ ರೀಮೇಕ್ ಆಗಬಹುದು ಎಂಬ ಸುದ್ದಿ ಇತ್ತು. ಸಿನಿ 1 ಸ್ಟುಡಿಯೋಸ್ನ ಮುರಾದ್ ಖೇತಾನಿ ನಿರ್ಮಿಸುತ್ತಿರುವ ಈ ಚಿತ್ರದಲ್ಲಿ ಕಾರ್ತಿಕ್ ಆರ್ಯನ್ ಮತ್ತು ಶ್ರದ್ಧಾ ಕಪೂರ್ ನಟಿಸಬಹುದು ಎಂದು ಹೇಳಲಾಗಿತ್ತು. ಈಗ ಈ ಜಾಗಕ್ಕೆ ರಣವೀರ್ ಸಿಂಗ್ ಮತ್ತು ಜಾಹ್ನವಿ ಕಪೂರ್ ಬರಬಹುದು ಎಂದು ಹೇಳಲಾಗುತ್ತಿದೆ.
80ರ ದಶಕದಲ್ಲಿ ಬಿಡುಗಡೆಯಾದ ‘ತೇಜಾಬ್’ ಚಿತ್ರದಲ್ಲಿ ಅನಿಲ್ ಕಪೂರ್, ಮಾಧುರಿ ದೀಕ್ಷಿತ್, ಚಂಕಿ ಪಾಂಡೆ, ಅನುಪಮ್ ಖೇರ್ ಮುಂತಾದವರು ನಟಿಸಿದ್ದರು. ಈ ಚಿತ್ರದ ‘ಏಕ್ ದೋ ತೀನ್’ ಹಾಡು ಸೂಪರ್ ಹಿಟ್ ಆಗುವ ಮೂಲಕ ಮಾಧುರಿ ದೀಕ್ಷಿತ್ಗೆ ಸ್ಟಾರ್ ಸ್ಟೇಟಸ್ ತಂದುಕೊಟ್ಟಿತ್ತು. ಆ ನಂತರ ‘ಏಕ್ ದೋ ತೀನ್ ಗರ್ಲ್’ ಎಂದೇ ಜನಪ್ರಿಯವಾದ ಮಾಧುರಿ ದೀಕ್ಷಿತ್, ಮತ್ತೆಂದೂ ಹಿಂದಿರುಗಿ ನೋಡಲಿಲ್ಲ.
ಇದನ್ನೂ ಓದಿ: ಮಹಿಳೆಯ ಆರೋಗ್ಯದ ಜವಾಬ್ದಾರಿ ಆಕೆಗೆ ಮಾತ್ರ ಸೀಮಿತವಾಗಿಲ್ಲ! ವಿದ್ಯಾ ಬಾಲನ್ ಮಾತಿನ ಆಶಯವೇನು?
ಈಗ ಈ ಸೂಪರ್ ಹಿಟ್ ಚಿತ್ರ ಮತ್ತೊಮ್ಮೆ ರೀಮೇಕ್ ಆಗುತ್ತಿದ್ದು, ಅನಿಲ್ ಕಪೂರ್ ಮತ್ತು ಮಾಧುರಿ ದೀಕ್ಷಿತ್ ಅವರ ಪಾತ್ರಗಳಿಗೆ ರಣವೀರ್ ಸಿಂಗ್ ಮತ್ತು ಜಾಹ್ನವಿ ಹೆಸರು ಕೇಳಿ ಬರುತ್ತಿದೆ. ರಣವೀರ್ ಮತ್ತು ಜಾಹ್ನವಿ ಇದುವರೆಗೂ ಒಟ್ಟಾಗಿ ನಟಿಸಿಲ್ಲ, ಅವರಿಬ್ಬರೂ ಒಟ್ಟಾಗಿ ನಟಿಸಿದರೆ ಸೂಪರ್ರಾಗಿರುತ್ತದೆ ಎಂಬುದು ಅಭಿಮಾನಿಗಳ ಅಭಿಪ್ರಾಯವಾದರೂ, ಅವರಿಬ್ಬರೂ ಒಟ್ಟಿಗೆ ನಟಿಸುತ್ತಾರಾ ಎಂಬುದು ಇನ್ನಷ್ಟೇ ಕಾದು ನೋಡಬೇಕಿದೆ.
ಹುಟ್ಟುಹಬ್ಬಕ್ಕೆ ಹೊಸ ಚಿತ್ರದ ಘೋಷಣೆ ಇಲ್ಲ; ಅಭಿಮಾನಿಗಳಿಗೆ ‘ರಾಕಿಂಗ್ ಸ್ಟಾರ್’ ಪತ್ರ