VIDEO| ಆಸ್ಪತ್ರೆಯಿಂದ ಬಂದ ಪತಿಯನ್ನು ಡ್ಯಾನ್ಸ್​ ಮಾಡಿ ಸ್ವಾಗತಿಸಿದ ಪತ್ನಿ; ವೃದ್ಧ ದಂಪತಿಯ ಪ್ರೀತಿಗೆ ನೆಟ್ಟಿಗರು ಫಿದಾ

ನವದೆಹಲಿ: ಪ್ರೀತಿಗೆ ವಯಸ್ಸಿಲ್ಲ. ಈ ವಾಕ್ಯಕ್ಕೆ ವೃದ್ಧ ದಂಪತಿ ನಿಜವಾದ ಅರ್ಥ ಬರೆದಿದ್ದಾರೆ. ಪತಿ ಆಸ್ಪತ್ರೆಯಿಂದ ವಂತವಾಗಿ ಮರಳಿ ಬಂದ ಖುಷಿಯಲ್ಲಿ ಪತ್ನಿ ನೃತ್ಯ ಮಾಡಿರುವ ವಿಡಿಯೋ ಇದೀಗ ನೆಟ್ಟಿಗರ ಮನಸ್ಸನ್ನು ಕದ್ದಿದೆ.

ನಿವೃತ್ತ ವಿಂಗ್​ ಕಮಾಂಡರ್ ಆಗಿರುವ ಅವಿನಾಶ್​ ದಿವಾನ್​ 10 ದಿನಗಳ ಕಾಲ ಅನಾರೋಗ್ಯದಿಂದ ಆಸ್ಪತ್ರೆಯಲ್ಲಿ ದಾಖಲಾಗಿದ್ದರು. ಐಸಿಯುನಲ್ಲಿ ಅವರಿಗೆ ಚಿಕಿತ್ಸೆ ನೀಡಲಾಗಿತ್ತು. ಆಸ್ಪತ್ರೆಯಲ್ಲಿ ಗುಣಮುಖರಾಗಿ ಮನೆಗೆ ಮರಳಿದ ಅವರಿಗೆ ಅವರ ಪತ್ನಿ ರಾಜ್​ಕಮಲ್​ ದಿವಾನ್​ ವಿಶೇಷ ರೀತಿಯಲ್ಲಿ ಸ್ವಾಗತ ಕೋರಿದ್ದಾರೆ.

ಮನೆಯ ಕೋಣೆಯ ಹಾಸಿಗೆ ಮೇಲೆ ತನ್ನ ಪತಿಯನ್ನು ಕೂರಿಸಿ, 1998ರಲ್ಲಿ ಬಿಡುಗಡೆಗೊಂಡ ಜಖ್ಮ್​ ಚಿತ್ರದ ಗಲಿ ಮೇ ಆಜ್​ ಚಾಂದ್​ ನಿಕ್ಲಾ ಹಾಡಿಗೆ ನೃತ್ಯ ಮಾಡಿದ್ದಾರೆ. ಇಳಿ ವಯಸ್ಸಿನಲ್ಲಿ ಸುಂದರ ಹಾಡಿಗೆ ಹೆಜ್ಜೆ ಹಾಕುವುದರ ಜತೆ ತಾವೂ ಹಾಡನ್ನು ಹಾಡಿದ್ದಾರೆ. ಪ್ರೀತಿಯ ಪತ್ನಿ ತನಗೋಸ್ಕರ ನೃತ್ಯ ಮಾಡುವುದನ್ನು ಕಾಣುತ್ತಾ ಕುಳಿತ ಅವಿನಾಶ್​ ದಿವಾನ್​ ಕುಳಿತಲ್ಲೇ ತಾವೂ ಸಹ ಹಾಡಿಗೆ ಕೈಗಳಲ್ಲೇ ನೃತ್ಯ ಮಾಡಿದ್ದಾರೆ. ತನ್ನ ಗಂಡ ಆಸ್ಪತ್ರೆಯಿಂದ ಮರಳಿದ್ದಕ್ಕೆ ಹೇಗೆ ಸಂತಸ ವ್ಯಕ್ತ ಪಡಿಸಬೇಕು ಎನ್ನುವುದೇ ನನಗೆ ತಿಳಿಯಲಿಲ್ಲ. ನನಗಾಗಿದ್ದ ಸಂತಸಕ್ಕೆ ನಾನು ನೃತ್ಯ ಮಾಡಿದೆ ಎಂದು ರಾಜ್​ಕಮಲ್​ ಹೇಳಿಕೊಂಡಿದ್ದಾರೆ.

ಅವಿನಾಶ್​ ಮತ್ತು ರಾಜ್​ಕಮಲ್​ ದಾಂಪತ್ಯ ಜೀವನವನ್ನು ಆರಂಭಿಸಿ 46 ವರ್ಷಗಳು ಕಳೆದಿವೆ. ಅವಿನಾಶ್​ ಭಾರತೀಯ ಸೇನೆಯಲ್ಲಿ ಸೇವೆ ಸಲ್ಲಿಸಿದ್ದರೆ, ಆತನ ಪತ್ನಿ 60 ವರ್ಷ ವಯಸ್ಸಿನವರೆಗೆ ಶಿಕ್ಷಣ ಕ್ಷೇತ್ರದಲ್ಲಿ ಸೇವೆ ಸಲ್ಲಿಸಿದ್ದಾರೆ. ಈ ದಂಪತಿಯ ವಿಡಿಯೋ ಟ್ವಿಟ್ಟರ್​ನಲ್ಲಿ ಹರಿದಾಡುತ್ತಿದ್ದು ಇವರ ಪ್ರೀತಿಗೆ ಜನ ಮನಸೋತಿದ್ದಾರೆ. ಪ್ರೀತಿಸಿದರೆ ಇವರಂತೆ ಪ್ರೀತಿಸಬೇಕು ಎಂದು ಹೇಳಲಾರಂಭಿಸಿದ್ದಾರೆ. (ಏಜೆನ್ಸೀಸ್​)

https://www.vijayavani.net/50-percent-of-central-govt-employees-have-been-ordered-to-work-from-home/