ಮುಂಬೈ: ಕರೊನಾ ಕರಿಛಾಯೆ ಜಗತ್ತಿನ ಆರ್ಥಿಕತೆಯನ್ನು ವ್ಯಾಪಿಸಿದ್ದು, ಷೇರುಪೇಟೆಯ ವಹಿವಾಟಿನ ಮೇಲೂ ವ್ಯತಿರಿಕ್ತ ಪರಿಣಾಮ ಬೀರಿದೆ. ಸೋಮವಾರ ಬೆಳಗ್ಗೆ ಭಾರತೀಯ ಷೇರುಪೇಟೆ ಆರಂಭಿಕ ವಹಿವಾಟಿನಲ್ಲೇ ಭಾರಿ ಆಘಾತ ಅನುಭವಿಸಿದೆ. ಬಾಂಬೆ ಸ್ಟಾಕ್ ಎಕ್ಸ್ಚೇಂಜ್ನ ಸೂಚ್ಯಂಕ ಸೆನ್ಸೆಕ್ಸ್ 1,700ಕ್ಕೂ ಹೆಚ್ಚು ಅಂಶ ಕುಸಿದ ಕಾರಣ ಷೇರುಪೇಟೆಯಲ್ಲಿನ ಹೂಡಿಕೆದಾರರು ಭಾರಿ ನಷ್ಟ ಅನುಭವಿಸಿದ್ದಾರೆ. ಇದೇ ವೇಳೆ ನಿಫ್ಟಿ ಕೂಡ ಕುಸಿತ ದಾಖಲಿಸಿದ್ದು, 9,500 ಅಂಶದ ಕೆಳಕ್ಕೆ ಕುಸಿದು ವಹಿವಾಟು ಮುಂದುವರಿಸಿತ್ತು.
ಇದನ್ನೂ ಓದಿ: ಕವುಚಿ ಬಿದ್ದ ಸೆನ್ಸೆಕ್ಸ್- ಆರಂಭಿಕ ವಹಿವಾಟಿನಲ್ಲಿ 1,500ಕ್ಕೂ ಹೆಚ್ಚು ಅಂಶ ಕುಸಿತ, ನಿಫ್ಟಿ 9,500ರ ಕೆಳಕ್ಕೆ…
ಆರಂಭಿಕ ವಹಿವಾಟಿನ ಈ ಆಘಾತದ ಪರಿಣಾಮ ಹೂಡಿಕೆದಾರರು ಬರೋಬ್ಬರ 5.5 ಲಕ್ಷ ಕೋಟಿ ರೂಪಾಯಿ ನಷ್ಟ ಅನುಭವಿಸಿದ್ದಾರೆ. ಆರಂಭಿಕ ವಹಿವಾಟಿನಲ್ಲಿ ಸೆನ್ಸೆಕ್ಸ್ ಪಟ್ಟಿಯಲ್ಲಿ ಬಹುತೇಕ ಷೇರುಗಳು ನಷ್ಟವನ್ನೇ ತೋರಿಸಿದ್ದವು. ಈ ಅವಧಿಯಲ್ಲಿ ಸೆನ್ಸೆಕ್ಸ್ 1,752.55 ಅಂಶ ಕುಸಿದು 31,965.07 ಅಂಶ ತಲುಪಿತ್ತು. ಈಕ್ವಿಟಿ ಮಾರುಕಟ್ಟೆಯ ಬಿಎಸ್ಇ ಲಿಸ್ಟೆಡ್ ಕಂಪನಿಗಳ ಷೇರುಗಳ ಮೌಲ್ಯ 5,15,308.99 ಕೋಟಿ ರೂಪಾಯಿಯಿಂದ 1,24,26,311.83 ಕೋಟಿ ರೂಪಾಯಿಗೆ ಕುಸಿದಿದೆ.
ಇದನ್ನೂ ಓದಿ: ವಲಸೆ ಕಾರ್ಮಿಕರಿಗೊಂದು ಗುಡ್ನ್ಯೂಸ್: ಉಚಿತ ಬಸ್ ಪ್ರಯಾಣದ ಸೌಲಭ್ಯ ಇನ್ನೂ ಎರಡು ದಿನ ವಿಸ್ತರಣೆ
ಸೆನ್ಸೆಕ್ಸ್ ಪಟ್ಟಿಯಲ್ಲಿ ಮೂವತ್ತು ಷೇರುಗಳ ಪೈಕಿ ಐಸಿಐಸಿಐ ಬ್ಯಾಂಕ್ ಷೇರು ಶೇಕಡ 9 ಕುಸಿತ ಕಂಡರೆ, ನಂತರದ ಸ್ಥಾನದಲ್ಲಿ ಇಂಡಸ್ಇಂಡ್ ಬ್ಯಾಂಕ್, ಬಜಾಜ್ ಫೈನಾನ್ಸ್, ಟಾಟಾ ಸ್ಟೀಲ್, ಎಚ್ಡಿಎಫ್ಸಿ ಕಂಪನಿಗಳ ಷೇರುಗಳು ನಷ್ಟ ಅನುಭವಿಸಿವೆ. ಕಳೆದ ವಾರದ ಅವಧಿಯಲ್ಲಿ ರಜೆ ಬಂದ ಕಾರಣ ವಹಿವಾಟಿನ ದಿನ ಕಡಿತವಾಗಿತ್ತು. ಆದರೂ, ಸೆನ್ಸೆಕ್ಸ್ 2,390.40 ಅಂಶ ಏರಿಕೆ ದಾಖಲಿಸಿದೆ. (ಏಜೆನ್ಸೀಸ್)