ದುಬೈ : ಭಾರತೀಯ ವಿದ್ಯಾರ್ಥಿಯೊಬ್ಬಳಿಗೆ ಯುನೈಟೆಡ್ ಅರಬ್ ಎಮಿರೆಟ್ಸ್(ಯುಎಇ)ನ ಅತಿಅಪೇಕ್ಷಿತ ಗೋಲ್ಡನ್ ವೀಸಾ ಲಭಿಸಿದೆ. ಸಾಮಾನ್ಯವಾಗಿ ಪ್ರಮುಖ ಜಾಗತಿಕ ವ್ಯಕ್ತಿತ್ವ ಹೊಂದಿರುವವರಿಗೆ ಇಲ್ಲವೇ ಶ್ರೀಮಂತ ಹೂಡಿಕೆದಾರರಿಗೆ ಈ ಅವಕಾಶ ಮತ್ತು ಗೌರವವನ್ನು ನೀಡಲಾಗುತ್ತದೆ. ಆದರೆ, ಕೇರಳದ ತಸ್ನೀಮ್ ಅಸ್ಲಂ ಎಂಬ ವಿದ್ಯಾರ್ಥಿನಿಗೆ ಅವಳ ಶೈಕ್ಷಣಿಕ ಪ್ರತಿಭೆಯನ್ನು ಗುರುತಿಸಿ ಪ್ರದಾನಿಸಲಾಗಿದೆ.
‘ಅಸಾಧಾರಣ ವಿದ್ಯಾರ್ಥಿ’ ಎಂಬ ಕ್ಯಾಟಗರಿಯಲ್ಲಿ 10 ವರ್ಷಗಳ ಗೋಲ್ಡನ್ ವೀಸಾ ಲಭಿಸಿರುವ ತಸ್ನೀಂಗೆ, 2031 ರವರೆಗೆ ಯಾವುದೇ ಪ್ರಾಯೋಜಕತ್ವವಿಲ್ಲದೆ ದುಬೈನಲ್ಲಿ ನೆಲೆಸುವ ಅವಕಾಶ ನೀಡಲಾಗಿದೆ. ಶಾರ್ಜಾದ ಅಲ್ ಖಾಸಿಮಿಯ ಯೂನಿವರ್ಸಿಟಿಯಲ್ಲಿ ಇಸ್ಲಾಮಿಕ್ ಶರಿಯ ಅಧ್ಯಯನ ಮಾಡಿದ ತಸ್ನೀಂ, 72 ದೇಶಗಳ ಅನೇಕ ವಿದ್ಯಾರ್ಥಿಗಳಿದ್ದ ತನ್ನ ತರಗತಿಗೆ ಮೊದಲನೇ ಸ್ಥಾನ ಗಳಿಸಿದ್ದಾಳೆ. ಅವಳ ಗ್ರೇಡ್ ಪಾಯಿಂಟ್ ಆ್ಯವರೇಜ್ (ಜಿಪಿಎ) 4 ಕ್ಕೆ 3.94 ಆಗಿದೆ ಎನ್ನಲಾಗಿದೆ.
ಇದನ್ನೂ ಓದಿ: ಇಂಜಿನಿಯರಿಂಗ್‌ನಲ್ಲಿ ಪದವಿ ಮುಗಿಸಿರುವಿರಾ? ಬಿಇಎಲ್ನಲ್ಲಿ ವಿವಿಧ ಹುದ್ದೆಗಳಿಗೆ ಅರ್ಜಿ ಆಹ್ವಾನ
ಆಟೋಮ್ಯಾಟಿಕ್ ಆಗಿ ನವೀಕರಿಸಲ್ಪಡುವ 5 ಅಥವಾ 10 ವರ್ಷಗಳ ಗೋಲ್ಡನ್ ವೀಸಾವನ್ನು 2019 ರಿಂದ ಯುಎಇ ಸರ್ಕಾರ ಪ್ರದಾನಿಸುತ್ತಿದೆ. ಈ ದೀರ್ಘಕಾಲೀನ ವಸತಿ ವೀಸಾಗಳು ವಿದೇಶೀಯರು ನ್ಯಾಷನಲ್ ಸ್ಪಾನ್ಸರ್ ಇಲ್ಲದೆ ಯುಎಇಯಲ್ಲಿ ನೆಲೆಸಲು, ಕೆಲಸ ಮಾಡಲು ಮತ್ತು ಅಧ್ಯಯನ ಕೈಗೊಳ್ಳಲು ಅವಕಾಶ ನೀಡುತ್ತವೆ. ಹೆಚ್ಚಾಗಿ ಯುಎಇಯಲ್ಲಿ ವಾಸಿಸುವ ಅವಕಾಶಕ್ಕೆ ಬದಲಿಯಾಗಿ ಭಾರೀ ಹೂಡಿಕೆ ಮಾಡುವಂಥ ಶ್ರೀಮಂತರಿಗೇ 10 ವರ್ಷದ ಗೋಲ್ಡನ್ ವೀಸಾ ನೀಡಲಾಗುತ್ತದೆ.
ಉದ್ಯಮಿಗಳಲ್ಲದೆ, ವೈದ್ಯರು, ಸಂಶೋಧಕರು, ವಿಜ್ಞಾನಿಗಳು ಮತ್ತು ಕಲಾವಿದರಂತಹ ವಿಶೇಷ ಪ್ರತಿಭೆಗಳಿರುವ ವ್ಯಕ್ತಿಗಳು ಸಹ ಈ ವೀಸಾಕ್ಕೆ ಅರ್ಜಿ ಸಲ್ಲಿಸಬಹುದಾಗಿದೆ. ಅಸಾಧಾರಣ ಪ್ರೌಢಶಾಲಾ ವಿದ್ಯಾರ್ಥಿಗಳು ಮತ್ತು ವಿಶ್ವವಿದ್ಯಾಲಯದ ವಿದ್ಯಾರ್ಥಿಗಳು ಯುಎಇಯಲ್ಲಿ 5 ವರ್ಷಗಳ ರೆಸಿಡೆನ್ಸಿ ವೀಸಾಕ್ಕೆ ಅರ್ಹರಾಗಿದ್ದಾರೆ ಎನ್ನಲಾಗಿದೆ. ಇತ್ತೀಚೆಗೆ ಬಾಲಿವುಡ್ ನಟ ಸಂಜಯ್ ದತ್ಗೆ ಯುಎಇ ಸರ್ಕಾರ ಗೋಲ್ಡನ್ ವೀಸಾ ಪ್ರದಾನಿಸಿ ಗೌರವಿಸಿತ್ತು. (ಏಜೆನ್ಸೀಸ್)
‘ಫ್ರೆಂಡ್ಸ್’ ಪುನರ್ಮಿಲನ ! 17 ವರ್ಷಗಳ ನಂತರ ಅದೇ ಸೆಟ್ನಲ್ಲಿ ತಾರೆಗಳು !