ರಾಯ್ಪುರ: ಸದ್ಯ ಇದನ್ನು ಮಾರಣಾಂತಿಕ ಮೇಲ್ಸೇತುವೆ ಎಂದರೂ ಅತಿಶಯೋಕ್ತಿ ಏನಲ್ಲ. ಏಕೆಂದರೆ ಮುಂದೇನು ಎಂಬ ಅರಿವಿರದೆ ಈ ಫ್ಲೈಓವರ್ನಲ್ಲಿ ಸಾಗಿದರೆ ಸಾವೇ ಗತಿ. ಅಷ್ಟಕ್ಕೂ ಮುಗಿಯದ ಈ ಫ್ಲೈಓವರ್ ಇಬ್ಬರ ಬದುಕನ್ನೇ ಮುಗಿಸಿ ಹಾಕಿದೆ. ಮಾತ್ರವಲ್ಲ, ಬಾಲಕಿಯೊಬ್ಬಳ ಪರಿಸ್ಥಿತಿ ಗಂಭೀರವಾಗಿದ್ದು, ಒಂದು ಕಾರು, ಒಂದು ಬೈಕ್ ಜಖಂಗೊಂಡಿದೆ.
ಛತ್ತೀಸ್ಗಢದ ರಾಯ್ಪುರದಿಂದ 17 ಕಿ.ಮೀ. ದೂರದಲ್ಲಿ ಕುಮ್ಹರಿ ಎಂಬಲ್ಲಿ ಈ ಫ್ಲೈಓವರ್ ನಿರ್ಮಾಣಗೊಳ್ಳುತ್ತಿದ್ದು, ಇನ್ನೂ ಅಪೂರ್ಣ ಸ್ಥಿತಿಯಲ್ಲಿದೆ. ಅದಾಗ್ಯೂ ಇಲ್ಲಿ ಆ ಬಗ್ಗೆ ಯಾವುದೇ ಎಚ್ಚರಿಕೆ ಫಲಕ ಇಲ್ಲವೇ ಬ್ಯಾರಿಕೇಡ್ ಹಾಕಿಲ್ಲ. ಹೀಗಾಗಿ ಇದರ ಅರಿವಿರದೆ ಶುಕ್ರವಾರ ರಾತ್ರಿ ಈ ಫ್ಲೈಓವರ್ ಮೇಲೆ ಬೈಕ್ನಲ್ಲಿ 12 ವರ್ಷದ ಪುತ್ರಿಯೊಂದಿಗೆ ತೆರಳಿದ ದಂಪತಿ ಮುಂದೆ ಫ್ಲೈಓವರ್ನ ಅಪೂರ್ಣ ತುದಿಯಿಂದ 30 ಅಡಿ ಕೆಳಕ್ಕೆ ಬಿದ್ದು ಸಾವಿಗೀಡಾಗಿದ್ದಾರೆ. ಪುತ್ರಿ ಗಂಭೀರವಾಗಿ ಗಾಯಗೊಂಡಿದ್ದು ಆಕೆಯನ್ನು ರಾಯ್ಪುರದ ಏಮ್ಸ್ಗೆ ದಾಖಲಿಸಲಾಗಿದೆ.
ಸಾವಿಗೀಡಾದ ದಂಪತಿಯನ್ನು ಆಜುರಾಮ್ ದೇವಾಂಗನ್ (45) ಮತ್ತು ನಿರ್ಮಲಾ ಎಂದು ಗುರುತಿಸಲಾಗಿದೆ. ಇವರು ಭಿಲಾಯಿ ಎಂಬಲ್ಲಿ ನಡೆದ ಮದುವೆಗೆ ಹಾಜರಾಗಿ ಮರಳಿ ರಾಯ್ಪುರಕ್ಕೆ ತೆರಳುವಾಗ ಈ ಘಟನೆ ನಡೆದಿದೆ. ಇರುಳಿನ ಜತೆ ಮಂಜು ಕವಿದ ವಾತಾವರಣ ಇದ್ದಿದ್ದರಿಂದ ಫ್ಲೈಓವರ್ ಅಪೂರ್ಣವಾಗಿ ಇದ್ದಿದ್ದು ಇವರ ಗಮನಕ್ಕೆ ಬಂದಿರಲಿಲ್ಲ ಎನ್ನಲಾಗಿದೆ.
ಅದಾಗಿ ಎರಡು ಗಂಟೆಗಳ ಬಳಿಕ ಕಾರೊಂದು ಇದೇ ಫ್ಲೈಓವರ್ ಮೇಲೆ ಸಾಗಿ, ಅಪೂರ್ಣ ತುದಿಯಿಂದ ಕೆಳಕ್ಕೆ ಬಿದ್ದಿದು ಜಖಂಗೊಂಡಿದ್ದರೂ ಏರ್ಬ್ಯಾಗ್ನಿಂದಾಗಿ ಚಾಲಕ ಪ್ರಾಣಾಪಾಯದಿಂದ ಪಾರಾಗಿದ್ದಾನೆ. ಅಷ್ಟಾದರೂ ಸೂಕ್ತ ಫಲಕ ಅಳವಡಿಸಲಿಲ್ಲ ಎನ್ನಲಾಗಿದೆ. ಪ್ರಕರಣದ ಕುರಿತಂತೆ ಸಂಬಂಧಿತ ನಿರ್ಮಾಣ ಸಂಸ್ಥೆ ವಿರುದ್ಧ ಪೊಲೀಸರು ಕೇಸು ದಾಖಲಿಸಿಕೊಂಡಿದ್ದಾರೆ.
ರೈಲ್ವೇ ಪ್ಲ್ಯಾಟ್ಫಾರ್ಮ್ನಲ್ಲೇ ಬಿದ್ದಿತ್ತು 100 ಗ್ರಾಂ ಚಿನ್ನಾಭರಣವಿದ್ದ ಬಾಕ್ಸ್; ಆಮೇಲಾಗಿದ್ದೇನು?
ಬೇಕರಿ ಪ್ರಕರಣದ ಹಿಂದೆ ಸುಪಾರಿ!; ಎಲ್ಲ ಆರೋಪಿಗಳನ್ನೂ ಬಂಧಿಸುವಂತೆ ಆಗ್ರಹ, ತಪ್ಪಿದರೆ ಮತ್ತೆ ಪ್ರತಿಭಟನೆ ಎಚ್ಚರಿಕೆ