ಮುಂಬೈ: ಸಾಮಾಜಿಕ ಜಾಲತಾಣದಲ್ಲಿ ಪರಿಚಯವಾದ ಯುವತಿಯನ್ನು ಭೇಟಿ ಮಾಡಲು ಪಾಕಿಸ್ತಾನಕ್ಕೆ ಪ್ರವೇಶಿಸಲು ಯತ್ನಿಸಿದ ಮಹಾರಾಷ್ಟ್ರದ ಮೂಲದ 20 ವರ್ಷದ ಇಂಜಿನಿಯರ್ ವಿದ್ಯಾರ್ಥಿಯನ್ನು ಗುಜರಾತಿನ ರಾನ್-ಆಫ್-ಕಚ್ ಗಡಿಯಲ್ಲಿ ಗಡಿ ಭದ್ರತಾ ಪಡೆಯ ಯೋಧರು (ಬಿಎಸ್ಎಫ್) ಬಂಧಿಸಿರುವುದಾಗಿ ಅಧಿಕಾರಿಗಳು ಶುಕ್ರವಾರ ಮಾಹಿತಿ ನೀಡಿದ್ದಾರೆ.
ಬಂಧಿತನನ್ನು ಝಿಶನ್ ಮೊಹಮ್ಮದ್ ಸಿದ್ದಿಖಿ ಎಂದು ಗುರುತಿಸಲಾಗಿದ್ದು, ಈತ ಮಹಾರಾಷ್ಟ್ರದ ಒಸ್ಮಾನಾಬಾದ್ ನಗರದ ಖ್ವಾಜಾಂಗರ್ ಏರಿಯಾದ ನಿವಾಸಿ. ಗುರುವಾರ ರಾತ್ರಿ ಆತನನ್ನು ಬಂಧಿಸಿದ ಬಿಎಸ್ಎಫ್ ಯೋಧರು ಸ್ಥಳೀಯ ಪೊಲೀಸ್ ಠಾಣೆಯ ವಶಕ್ಕೆ ಒಪ್ಪಿಸಿರುವುದಾಗಿ ಪೂರ್ವ ಕಚ್ನ ಪೊಲೀಸ್ ವರಿಷ್ಠಾಧಿಕಾರಿ ಪರಿಕ್ಷಿತಾ ರಾಥೋಡ್ ತಿಳಿಸಿದ್ದಾರೆ.
ಇದನ್ನೂ ಓದಿರಿ: ಟ್ರೋಲ್ ಆಗುವ ಬಗ್ಗೆ ಮೊದಲೇ ಗೊತ್ತಿತ್ತಂತೆ: ಹೋಟೆಲ್ ಮಾಲೀಕ-ಪ್ರತಾಪ್ ನಡುವೆ ನಡೆದಿತ್ತು ರೋಚಕ ಮಾತುಕತೆ!
ಗುರುವಾರ ಸಂಜೆ ರಾನ್-ಆಫ್-ಕಚ್ ವ್ಯಾಪ್ತಿಯ ಧೋಲವಿರಾ ಗ್ರಾಮದ ಬಳಿ ಮಹಾರಾಷ್ಟ್ರ ನೋಂದಣಿಯ ಬೈಕ್ ಪತ್ತೆಯಾದ ಬೆನ್ನಲ್ಲೇ ಪೊಲೀಸರು ಎಚ್ಚರಿಕೆ ನೀಡಿದ್ದರು. ಅದೇ ದಿನದಂದು ರಾತ್ರಿ ಪಾಕಿಸ್ತಾನಕ್ಕೆ ಪ್ರವೇಶಿಸಲು ಗಡಿಯತ್ತ ನಡೆದು ಬರುತ್ತಿದ್ದ ಝಿಶನ್ನನ್ನು ಬಿಎಸ್ಎಫ್ ಯೋದರು ಬಂಧಿಸಿರುವುದಾಗಿ ರಾಥೋಡ್ ಹೇಳಿದ್ದಾರೆ.
ಮಹಾರಾಷ್ಟ್ರದ ಪೊಲೀಸ್ ಅಧಿಕಾರಿಗಳ ಪ್ರಕಾರ ಸಿದ್ದಿಖಿ ಜುಲೈ 11ರಂದು ಒಸ್ಮಾನಾಬಾದ್ನಲ್ಲಿರುವ ತಮ್ಮ ಮನೆಯನ್ನು ಬಿಟ್ಟಿದ್ದ. ಲಾಕ್ಡೌನ್ ಹಿನ್ನೆಲೆಯಲ್ಲಿ ಯಾವುದೇ ಸಾರ್ವಜನಿಕ ಸಂಚಾರ ವ್ಯವಸ್ಥೆ ಇಲ್ಲದೇ ಇರುವುದರಿಂದ ಬೈಕ್ ಮೂಲಕ ಝಿಶನ್ ಹೊರಟ್ಟಿದ್ದ. ಕುಚ್ಗೆ ತೆರಳಿದ ಆತ ಬೈಕ್ ಮರಳಿನಲ್ಲಿ ಸಿಲುಕಿಕೊಂಡಿದ್ದರಿಂದ ಅಲ್ಲಿಯೇ ಬಿಟ್ಟು ಪಾಕಿಸ್ತಾನದ ಕಡೆಗೆ ನಡೆದುಕೊಂಡು ಸಾಗಿದ್ದಾನೆ.
ಕಳೆದ ಕೆಲ ದಿನಗಳಿಂದ ಝಿಶನ್ ಕಾಣದಿದ್ದಾಗ ಪಾಲಕರು ಒಸ್ಮಾನಾಬಾದ್ ನಗರ ಪೊಲೀಸ್ ಠಾಣೆಗೆ ನಾಪತ್ತೆ ಪ್ರಕರಣವನ್ನು ದಾಖಲಿಸಿದ್ದರು. ಝಿಶನ್ ಹುಡುಕಲು ಆರಂಭಿಸಿದ ಪೊಲೀಸರು ಮೊದಲು ಆತನ ಸಾಮಾಜಿಕ ಜಾಲತಾಣ ಖಾತೆಯಲ್ಲಿ ಜಾಲಾಡಿದ್ದಾರೆ. ಕಳೆದ ಕೆಲವು ತಿಂಗಳಿಂದ ಝಿಶನ್ ಪಾಕ್ ಯುವತಿಯೊಂದಿಗೆ ಸಂಪರ್ಕದಲ್ಲಿರುವುದು ತಿಳಿದಿದೆ. ಯುವತಿಯನ್ನು ಭೇಟಿ ಮಾಡಲು ಪಾಕಿಸ್ತಾನಕ್ಕೆ ತೆರಳಿದ್ದಾನೆ ಎಂಬುದು ಸಹ ಗೊತ್ತಾಗಿದೆ. ಬಳಿಕ ಮೊಬೈಲ್ ದಾಖಲೆಗಳ ಮೂಲಕ ಆತನ ಜಾಡು ಪತ್ತೆಹಚ್ಚಲು ಪ್ರಯತ್ನಿಸಿದಾಗ ಕಚ್ ಬಳಿ ಇರುವುದು ತಿಳಿದು, ಆತನ ಮಾಹಿತಿಯನ್ನು ಗುಜರಾತ್ ಪೊಲೀಸರಿಗೆ ನೀಡಿದ್ದಾಗಿ ಒಸ್ಮಾನಾಬಾದ್ನ ಪೊಲೀಸ್ ವರಿಷ್ಠಾಧಿಕಾರಿ ರಾಜ್ತಿಲಕ್ ರೋಷನ್ ಮಾಹಿತಿ ನೀಡಿದರು.
ಇದನ್ನೂ ಓದಿ: ಮೀತಿ ಮೀರುತ್ತಿದ್ದೀರಿ ಜೋಕೆ ಎಂದು ಡ್ರೋನ್ ಪ್ರತಾಪ್ ಎಚ್ಚರಿಕೆ ನೀಡಿದ್ಯಾರಿಗೆ?
ಬಳಿಕ ಗುಜರಾತ್ ಪೊಲೀಸರು ಝಿಶನ್ ಮಾಹಿತಿಯನ್ನು ಬಿಎಸ್ಎಫ್ಗೂ ಸಹ ಶೇರ್ ಮಾಡಲಾಗಿತ್ತು. ಹೀಗಾಗಿಯೇ ಝಿಶನ್ ಅನ್ನು ಗುರುವಾರ ರಾತ್ರಿ ಬಿಎಸ್ಎಫ್ ಹಿಡಿದುಹಾಕಿದೆ. ಇನ್ನೇನು ಪಾಕ್ ಗಡಿಗೆ ಕಾಲಿಡಬೇಕು ಎನ್ನುವಷ್ಟರಲ್ಲಿ ಝಿಶನ್ ಬಂಧಿಯಾಗಿದ್ದಾನೆ. ಅಂದಹಾಗೆ ಝಿಶನ್ ಗೂಗಲ್ ಮ್ಯಾಪ್ ಸಹಾಯದಿಂದ ಗಡಿ ದಾಟಲು ತೆರಳಿದ್ದ ಎಂದು ತಿಳಿದುಬಂದಿದೆ. ಯುವತಿ ಮತ್ತು ಝಿಶನ್ ನಡುವಿನ ಮೊಬೈಲ್ ಸಂದೇಶಗಳು ನಮ್ಮ ಬಳಿ ಇವೆ ಎಂದು ಒಸ್ಮಾನಾಬಾದ್ ಪೊಲೀಸರು ತಿಳಿಸಿದ್ದು, ಒಂದು ತಂಡ ಆತನನ್ನು ಕರೆತರಲು ಇದೀಗ ಕಚ್ಗೆ ತೆರಳಿದೆ.
ಬಿಎಸ್ಎಫ್ ಝಿಶನ್ ಹಿಡಿದ ಬೆನ್ನಲ್ಲೇ ಆತ ಮಾತನಾಡಿದ್ದು, ಕರಾಚಿ ಮೂಲದ ಯುವತಿಯೊಂದಿಗೆ ಪ್ರೇಮಾಂಕುರವಾಗಿದೆ. ನಾನು ಪಾಕಿಸ್ತಾನಕ್ಕೆ ಹೋಗಲು ಬಯಸಿದ್ದೇನೆಂದು ಹೇಳಿದ್ದಾನೆ. ಸಂಚಾರ ಮಾರ್ಗಕ್ಕಾಗಿ ಗೂಗಲ್ ಮ್ಯಾಪ್ ಬಳಸಿದ್ದಾನೆ. ಆತನನ್ನು ಬಂಧಿಸಿದಾಗ ನಿತ್ರಾಣ ಸ್ಥಿತಿಯಲ್ಲಿದ್ದ. ಅಲ್ಲದೆ, ರನ್ ಅಲ್ಲಿ ಸುಮಾರು ಎರಡು ಗಂಟೆಗಳ ಕಾಲ ಪ್ರಜ್ಞೆಯಿಲ್ಲದೇ ಬಿದ್ದಿದೆ ಎಂತಲೂ ಝಿಶನ್ ಹೇಳಿಕೊಂಡಿದ್ದಾನೆ. (ಏಜೆನ್ಸೀಸ್)