ಚಂಡೀಗಢ : ಪಂಜಾಬ್ ಸರ್ಕಾರವು 18 ರಿಂದ 44 ವರ್ಷದ ಸಾರ್ವಜನಿಕರಿಗೆ ಸರ್ಕಾರಿ ಲಸಿಕಾ ಕೇಂದ್ರಗಳಲ್ಲಿ ನೀಡಬೇಕಾದ ಕೋವಾಕ್ಸಿನ್ ಲಸಿಕೆಯ 42,000 ಡೋಸ್ಗಳನ್ನು, ಲಾಭಕ್ಕಾಗಿ ಖಾಸಗಿ ಆಸ್ಪತ್ರೆಗಳಿಗೆ ಮಾರಿದೆ. ಈ ಬಗ್ಗೆ ವಿರೋಧ ಪಕ್ಷಗಳು ಎತ್ತಾಡಿ ಮುಖಭಂಗವಾದ ಮೇಲೆ ಇದೀಗ ತನ್ನ ತಪ್ಪನ್ನು ತಿದ್ದಿಕೊಳ್ಳುವ ಪ್ರಯತ್ನದಲ್ಲಿದ್ದು, ಖಾಸಗಿ ಆಸ್ಪತ್ರೆಗಳಿಂದ ಲಸಿಕೆ ಡೋಸ್ಗಳನ್ನು ವಾಪಸ್ ಪಡೆಯಲು ಮುಂದಾಗಿದೆ.
ಮೇ 27 ರಂದು ಭಾರತ್ ಬಯೋಟೆಕ್ ಕಂಪೆನಿಯಿಂದ 1.14 ಲಕ್ಷ ಕೋವಾಕ್ಸಿನ್ ಡೋಸ್ಗಳನ್ನು ಪ್ರತಿ ಡೋಸ್ಗೆ 420 ರೂ.ಗಳಂತೆ ಖರೀದಿಸಿದ್ದ ರಾಜ್ಯದ ಕಾಂಗ್ರೆಸ್ ಸರ್ಕಾರ, ಅದರಲ್ಲಿ ನ 42,000 ಡೋಸ್ಗಳನ್ನು 20 ಖಾಸಗಿ ಆಸ್ಪತ್ರೆಗಳಿಗೆ 1,060 ರೂ. ಬೆಲೆಯಲ್ಲಿ ಮಾರಿತ್ತು. ಹಲವು ರಾಜ್ಯಗಳಲ್ಲಿ ಈ ಲಸಿಕೆಗಳನ್ನು ಜನರಿಗೆ ಉಚಿತವಾಗಿ ನೀಡಲಾಗುತ್ತಿದ್ದರೆ, ಪಂಜಾಬ್ನ ನಾಗರೀಕರಿಗೆ ಸದರಿ ಖಾಸಗಿ ಆಸ್ಪತ್ರೆಗಳು ಪ್ರತಿ ಡೋಸ್ಗೆ 1,560 ರೂ.ಗಳನ್ನು ಚಾರ್ಜ್ ಮಾಡಲು ಆರಂಭಿಸಿದ್ದವು.
ಇದನ್ನೂ ಓದಿ: ಮನವಿ ಮಾಡಿದ್ರೂ ಜಮೀನಿನಲ್ಲಿ ವಿದ್ಯುತ್ ಕಂಬ ಅಳವಡಿಕೆ: ವಿಷಯ ತಿಳಿದ ರೈತ ಹೃದಯಾಘಾತದಿಂದ ಸಾವು
ಲಸಿಕೆಗಳನ್ನು 3.20 ಕೋಟಿ ರೂ.ಗಳಿಗೆ ಖರೀದಿಸಿ, 8.48 ಕೋಟಿ ರೂ.ಗಳಿಗೆ ಮರುಮಾರಾಟ ಮಾಡಿ, ಪಂಜಾಬ್ ಸರ್ಕಾರ 5.28 ಕೋಟಿ ರೂಪಾಯಿ ಲಾಭ ಮಾಡಿಕೊಂಡಿತ್ತು ಎನ್ನಲಾಗಿದೆ. ಒಂದೆಡೆ ಲಸಿಕೆ ಕಂಪೆನಿಗಳಿಗೆ ಮತ್ತೊಂದೆಡೆ ಜನಸಾಮಾನ್ಯರೊಂದಿಗೆ ಮೋಸದಾಟ ಆಡಿದ ಸರ್ಕಾರದ ನಡೆಯ ಬಗ್ಗೆ ಎರಡು ದಿನಗಳಿಂದ ಅಕಾಲಿ ದಳ ಮತ್ತು ಬಿಜೆಪಿ ನಾಯಕರು ಹುಲ್ಲೆಬ್ಬಿಸಿದ್ದರು.
ಇದೀಗ ಈ ವಿವಾದಕ್ಕೆ ಮುಕ್ತಾಯ ಹಾಡುವ ಪ್ರಯತ್ನದಲ್ಲಿ ರಾಜ್ಯದ ಲಸಿಕಾಕರಣದ ನೋಡಲ್ ಅಧಿಕಾರಿ ವಿಕಾಸ್ ಗಾರ್ಗ್ ಅವರು, ಖಾಸಗಿ ಆಸ್ಪತ್ರೆಗಳಿಗೆ ಲಸಿಕೆಯ ಡೋಸ್ಗಳನ್ನು ಸರ್ಕಾರಕ್ಕೆ ಹಿಂತಿರುಗಿಸುವಂತೆ ಆದೇಶ ಹೊರಡಿಸಿದ್ದಾರೆ. “ಖಾಸಗಿ ಆಸ್ಪತ್ರೆಗಳ ಮೂಲಕ 18-44 ವರ್ಷ ವಯಸ್ಸಿನ ಜನಸಂಖ್ಯೆಗೆ ಒಂದು ಬಾರಿ ಸೀಮಿತ ಲಸಿಕೆ ಡೋಸ್ಗಳನ್ನು ನೀಡುವ ಆದೇಶವನ್ನು ಸರಿಯಾದ ಮನೋಭಾವದಿಂದ ತೆಗೆದುಕೊಳ್ಳಲಾಗಿಲ್ಲ ಮತ್ತು ಈ ಮೂಲಕ ಹಿಂಪಡೆಯಲಾಗುತ್ತದೆ. ಇದಲ್ಲದೆ, ಖಾಸಗಿ ಆಸ್ಪತ್ರೆಗಳು ತಮ್ಮೊಂದಿಗೆ ಲಭ್ಯವಿರುವ ಎಲ್ಲಾ ಲಸಿಕೆ ಡೋಸ್ಗಳನ್ನು ಕೂಡಲೇ ಮರಳಿಸಬೇಕು ಎಂದು ನಿರ್ಧರಿಸಲಾಗಿದೆ… “ಎಂದು ಈ ಹೊಸ ಆದೇಶದಲ್ಲಿ ಹೇಳಲಾಗಿದೆ.
ಇದನ್ನೂ ಓದಿ: 3 ವರ್ಷದ ಹೆಣ್ಣು ಮಗುವಿನ ಕೊಲೆ ಪ್ರಕರಣ ಬೆನ್ನತ್ತಿ ಹೋದ ಪೊಲೀಸರಿಂದ ಸ್ಫೋಟಕ ರಹಸ್ಯ ಬಯಲು!
ಪಂಜಾಬ್ ಆರೋಗ್ಯ ಸಚಿವ ಬಲ್ಬೀರ್ ಸಿಂಗ್ ಸಿಧು ಅವರು, “ಒಮ್ಮೊಮ್ಮೆ ಯಾವುದೇ ತಪ್ಪು ಉದ್ದೇಶವಿಲ್ಲದೆ ತಪ್ಪು ನಿರ್ಣಯಗಳನ್ನು ತೆಗೆದುಕೊಳ್ಳಲಾಗುತ್ತದೆ. ನಾವು ಈ ಬಗ್ಗೆ ತನಿಖೆ ನಡೆಸುತ್ತೇವೆ” ಎಂದಿದ್ದಾರೆ. ಖಾಸಗಿ ಆಸ್ಪತ್ರೆಗಳು ಲಸಿಕೆಗಾಗಿ ಸರ್ಕಾರಕ್ಕೆ ಜಮಾ ಮಾಡಿದ್ದ ಹಣವನ್ನು ಹಿಂದಿರುಗಿಸಲಾಗುವುದು ಎಂದಿದ್ದಾರೆ. “ಸರ್ಕಾರ ಮಾರಿದ 42,000 ಡೋಸ್ಗಳಲ್ಲಿ ಆಸ್ಪತ್ರೆಗಳು ಈಗಾಗಲೇ 600 ಡೋಸ್ಗಳನ್ನು ನೀಡಿಬಿಟ್ಟಿದ್ದು, ಉಳಿದ 41,400 ಡೋಸ್ಗಳು ಇಂದು ಸಂಜೆ ಮತ್ತು ನಾಳೆ ಬೆಳಿಗ್ಗೆ ವೇಳೆಗೆ ನಮ್ಮನ್ನು ತಲುಪಲಿವೆ” ಎಂದಿರುವ ಸಿಧು, ಈ ಲಸಿಕೆಗಳನ್ನು ಸರ್ಕಾರಿ ಲಸಿಕಾ ಕೇಂದ್ರಗಳಲ್ಲಿ ಉಚಿತವಾಗಿ ಜನರಿಗೆ ನೀಡಲಾಗುವುದು ಎಂದಿದ್ದಾರೆ.
ವಿಪರ್ಯಾಸವೆಂದರೆ ಲಸಿಕೆ ಅಭಾವವಿದೆ ಎಂಬ ಕಾರಣ ಒಡ್ಡಿ, ಪಂಜಾಬ್ ಸರ್ಕಾರವು ಸರ್ಕಾರಿ ಲಸಿಕಾ ಕೇಂದ್ರಗಳಲ್ಲಿ 18-44 ವರ್ಷ ವಯೋಮಾನದ ಆಯ್ದ ಆದ್ಯತೆಯ ಗುಂಪುಗಳಿಗೆ ಮಾತ್ರ ಲಸಿಕಾ ಸೌಲಭ್ಯವನ್ನು ತೆರೆದಿತ್ತು. ಲಸಿಕೆ ಕೊರತೆಯ ಮಾತಾಡಿ ಪದೇ ಪದೇ ಕೇಂದ್ರ ಸರ್ಕಾರದ ವಿರುದ್ಧ ವಾಕ್ಸಮರ ನಡೆಸುತ್ತಿರುವ ರಾಜ್ಯಗಳಲ್ಲಿ ಪಂಜಾಬ್ನ ಕಾಂಗ್ರೆಸ್ ಸರ್ಕಾರ ಮೇಲ್ಪಂಕ್ತಿಯಲ್ಲಿದೆ. (ಏಜೆನ್ಸೀಸ್)