ನವದೆಹಲಿ: ಕೊವಿಡ್-19ಕ್ಕೆ ಚಿಕಿತ್ಸೆ ನೀಡಲು ಬಳಸಲಾಗುತ್ತಿರುವ ಹೈಡ್ರಾಕ್ಸಿಕ್ಲೋರೋಕ್ವಿನ್ ಬಗ್ಗೆ ಕೆಲವು ಸಂಶೋಧಕರು ಅಪಸ್ವರ ತೆಗೆದಿದ್ದಾರೆ. ಅದರಿಂದ ತುಂಬ ಅಡ್ಡ ಪರಿಣಾಮ ಉಂಟಾಗುತ್ತಿದೆ. ಹೃದಯ ಸಂಬಂಧಿ ರೋಗ ಹೆಚ್ಚುತ್ತಿದೆ. ಸಾವಿನ ಸಂಖ್ಯೆಯೂ ಏರುತ್ತಿದೆ ಎಂಬಿತ್ಯಾದಿ ಅಧ್ಯಯನ ವರದಿಗಳನ್ನೂ ವೈದ್ಯಕೀಯ ಮ್ಯಾಗ್ಜಿನ್ಗಳಲ್ಲಿ ಬರೆಯುತ್ತಿದ್ದಾರೆ. ಈ ಮಧ್ಯೆ ವಿಶ್ವ ಆರೋಗ್ಯ ಸಂಸ್ಥೆಯೂ ಕೂಡ ಹೈಡ್ರಾಕ್ಸಿಕ್ಲೋರೊಕ್ವಿನ್ ಮಾತ್ರೆಗಳ ಬಗ್ಗೆ ಎಚ್ಚರ ಇರಲಿ ಎಂದು ಹೇಳಿದೆ.
ಇದನ್ನೂ ಓದಿ: ಕೊವಿಡ್-19 ಸೋಂಕಿನ ಚಿಕಿತ್ಸೆಗೆ ಹೈಡ್ರಾಕ್ಸಿಕ್ಲೋರೋಕ್ವಿನ್ ಸೇಫ್ ಅಲ್ವೇ ಅಲ್ಲ…!
ಆದರೆ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಮಾತ್ರ ಯಾವುದನ್ನೂ ಕಿವಿಗೆ ಹಾಕಿಕೊಳ್ಳದೆ ಎಚ್ಸಿಕ್ಯೂ ಬಗ್ಗೆ ತುಂಬ ಒಳ್ಳೆಯ ಅಭಿಪ್ರಾಯ ವ್ಯಕ್ತಪಡಿಸುತ್ತಿದ್ದಾರೆ.
ಕರೊನಾ ಬಾರದಂತೆ ತಡೆಯಲು ನಾನು ಹೈಡ್ರಾಕ್ಸಿಕ್ಲೊರೋಕ್ವಿನ್ ಮಾತ್ರೆಗಳನ್ನು ತೆಗೆದುಕೊಳ್ಳುತ್ತಿದ್ದೇನೆ ಎಂದು ಒಂದು ವಾರದ ಹಿಂದೆ ಟ್ರಂಪ್ ತಿಳಿಸಿದ್ದರು. ಇದೀಗ ಮತ್ತೊಂದು ಹೇಳಿಕೆಯನ್ನು ಇದೇ ಎಚ್ಸಿಕ್ಯೂ ಬಗ್ಗೆ ನೀಡಿದ್ದಾರೆ.
ನಾನೀಗ ಹೈಡ್ರಾಕ್ಸಿಕ್ಲೊರೊಕ್ವಿನ್ ಮಾತ್ರೆಗಳ ಎರಡು ವಾರದ ಕೋರ್ಸ್ ಮುಗಿಸಿದ್ದೇನೆ. ಆರೋಗ್ಯವಾಗಿದ್ದೇನೆ. 15 ದಿನ ಎಚ್ಸಿಕ್ಯೂ ಸೇವಿಸಿದರೂ ನನಗೇನೂ ಆಗಲಿಲ್ಲ. ತುಂಬ ಚೆನ್ನಾಗಿಯೇ ಇದ್ದೇನೆ ಎಂದು ಭಾನುವಾರದ ಸಂದರ್ಶನವೊಂದರಲ್ಲಿ ಹೇಳಿದ್ದಾರೆ. ಈ ಮೂಲಕ ನನಗ್ಯಾವ ಅಡ್ಡಪರಿಣಾಮವೂ ಆಗಿಲ್ಲ ಎಂಬುದನ್ನು ತಿಳಿಸಿದ್ದಾರೆ.
ಅಮೆರಿಕದಲ್ಲಿ ಕರೊನಾ ಪ್ರಮಾಣ ಹೆಚ್ಚಾಗಿದ್ದು ಅಧ್ಯಕ್ಷ ಟ್ರಂಪ್ ಅವರು ಪ್ರತಿನಿತ್ಯ ಕೊವಿಡ್-19 ಟೀಂನೊಟ್ಟಿಗೆ ಸಭೆ ನಡೆಸುತ್ತಾರೆ. ವೈಟ್ಹೌಸ್ನಲ್ಲೂ ಮೂರ್ನಾಲ್ಕು ಮಂದಿಗೆ ಕರೊನಾ ದೃಢಪಟ್ಟಿದೆ. ಹಾಗಾಗಿ ಮುಂಜಾಗೃತಾ ಕ್ರಮವಾಗಿ ತಾವೂ ಸಹ ಜಿಂಕ್ ಸಪ್ಲಿಮೆಂಟ್ ಜತೆ ಮಲೇರಿಯಾ ನಿಯಂತ್ರಣ ಔಷಧಿ ಎಚ್ಸಿಕ್ಯೂ ಸೇವನೆ ಮಾಡುತ್ತಿರುವುದಾಗಿ ಕಳೆದ ವಾರ ಬಹಿರಂಗ ಪಡಿಸಿದ್ದರು. ಅಲ್ಲದೆ, ಇದು ಎರಡು ವಾರಗಳ ಕೋರ್ಸ್ ಎಂದೂ ತಿಳಿಸಿದ್ದರು. ಆ ಅವಧಿ ಇದೀಗ ಮುಗಿದಿದೆ ಎಂದಿದ್ದಾರೆ.
ಇದನ್ನೂ ಓದಿ: ಡಬ್ಲ್ಯುಎಚ್ಒದಿಂದ ಹೊರಕ್ಕೆ ಟ್ರಂಪ್ ಎಚ್ಚರಿಕೆ
ಇತ್ತೀಚೆಗೆ ಭಾರತವೂ ಸಹ ಅಮೆರಿಕಕ್ಕೆ ಅಗತ್ಯ ಎಚ್ಸಿಕ್ಯೂ ಔಷಧಿಗಳನ್ನು ರಫ್ತು ಮಾಡಿದೆ. (ಏಜೆನ್ಸೀಸ್)