ಮುಂಬೈ: ಓಂ ರೌತ್ ನಿರ್ದೇಶನದ ‘ಆದಿಪುರುಷ್’ ಎಂಬ ಚಿತ್ರದಲ್ಲಿ ಪ್ರಭಾಸ್, ರಾಮನಾಗಿ ನಟಿಸುತ್ತಿರುವುದು ಗೊತ್ತಿದೆ. ಇನ್ನು ರಾವಣನಾಗಿ ಬಾಲಿವುಡ್ ನಟ ಸೈಫ್ ಅಲಿ ಖಾನ್ ನಟಿಸುತ್ತಿರುವ ವಿಷಯ ಸಹ ಗೊತ್ತಿರಬಹುದು. ಆದರೆ, ಇದೀಗ ಆ ಪಾತ್ರಕ್ಕೆ ಸೈಫ್ ಅಲಿ ಖಾನ್ ಬೇಡ, ರಾಣಾ ದಗ್ಗುಬಾಟಿ ಇರಲಿ ಎಂದು ಪ್ರಭಾಸ್ ಅವರ ಅಭಿಮಾನಿಗಳು, ತಮ್ಮ ಮೆಚ್ಚಿನ ನಟನಿಗೆ ಒತ್ತಾಯ ಮಾಡುತ್ತಿರುವ ಸುದ್ದಿಯೊಂದು ಕೇಳಿ ಬರುತ್ತಿದೆ.
ಇದಕ್ಕೂ ಮುನ್ನ, ಓಂ ರೌತ್, ಈ ವರ್ಷದ ಆರಂಭದಲ್ಲಿ ಬಿಡುಗಡೆಯಾದ ‘ತಾನಾಜಿ’ ಎಂಬ ಚಿತ್ರ ನಿರ್ದೇಶಿಸಿದ್ದರು. ಆ ಚಿತ್ರದಲ್ಲಿ ಸೈಫ್ ಜತೆಗೆ ಕೆಲಸ ಮಾಡಿದ್ದರು. ಓಂ ಮತ್ತು ಸೈಫ್ ನಡುವೆ ಒಳ್ಳೆಯ ಸ್ನೇಹ ಇರುವುದರಿಂದ ಮತ್ತು ರಾವಣನ ಪಾತ್ರಕ್ಕೆ ಸೈಫ್ ಬಹಳ ಚೆನ್ನಾಗಿ ಒಪ್ಪುತ್ತಾರೆ ಎಂಬ ಕಾರಣಕ್ಕೆ ಅವರಿಗೆ ಈ ಪಾತ್ರ ಮಾಡುವುದಕ್ಕೆ ಕೇಳಿಕೊಂಡಿದ್ದರು. ಇನ್ನು ಸೈಫ್ ಸಹ ಕಥೆ ಕೇಳಿ ಸೂಪರ್ ಎಕ್ಸೈಟ್ ಆಗಿ, ಚಿತ್ರದಲ್ಲಿ ನಟಿಸುವುದಕ್ಕೆ ಗ್ರೀನ್ ಸಿಗ್ನಲ್ ನೀಡಿದ್ದಾರಂತೆ.
ಇದನ್ನೂ ಓದಿ: ತಾಯಿಯ ಹೆಸರಲ್ಲಿ ಒಂದೊಳ್ಳೆಯ ಕೆಲಸ ಮಾಡುವುದಕ್ಕೆ ಹೊರಟಿದ್ದಾರೆ ಸೋನು …
ಆದರೆ, ಇದೀಗ ಎಲ್ಲಾ ಸೆಟ್ ಆಯಿತು ಎನ್ನುವಷ್ಟರಲ್ಲಿ ಪ್ರಭಾಸ್ ಅಭಿಮಾನಿಗಳು, ಈ ಚಿತ್ರಕ್ಕೆ ಸೈಫ್ ಬೇಡ ಎಂದು ಪಟ್ಟು ಹಿಡಿದಿದ್ದಾರೆ. ಅವರ ಬದಲು ರಾಣಾ ದಗ್ಗುಬಾಟಿ ಅವರನ್ನು ಹಾಕಿಕೊಳ್ಳಿ ಎಂದು ಸೋಷಿಯಲ್ ಮೀಡಿಯಾದಲ್ಲಿ ಒತ್ತಾಯಿಸುತ್ತಿದ್ದಾರಂತೆ. ತೀರಾ ಅಭಿಮಾನಿಗಳ ಮಾತನ್ನು ಕೇಳಿ ಸೈಫ್ ಅಲಿ ಖಾನ್ ಅವರನ್ನು ಚಿತ್ರತಂಡದವರು ಕಿತ್ತು ಹಾಕುತ್ತಾರೆ ಎಂದು ನಂಬುವುದು ಕಷ್ಟ.
ಆದರೂ ಪ್ರಭಾಸ್ ಅವರ ಅಭಿಮಾನಿಗಳಿಗೆ ಯಾಕೆ ಸೈಫ್ ಅಲಿ ಖಾನ್ ಬೇಡವಾಗಿದ್ದಾರೆ ಎಂಬುದಕ್ಕೆ ಕೆಲವು ಕಾರಣಗಳಿವೆ. ಪ್ರಮುಖವಾಗಿ, ಸೈಫ್ಗೆ ಭಾರತೀಯ ಪುರಾಣ ಮತ್ತು ಇತಿಹಾಸದ ಬಗ್ಗೆ ಹೆಚ್ಚು ಗೊತ್ತಿಲ್ಲ ಎಂದು ಕೆಲವರು ಸೋಷಿಯಲ್ ಮೀಡಿಯಾದಲ್ಲಿ ಅಭಿಪ್ರಾಯಪಟ್ಟಿದ್ದಾರೆ. ಸುಶಾಂತ್ ಸಿಂಗ್ ರಜಪೂತ್ ಮತ್ತು ಸಾರಾ ಅಲಿ ಖಾನ್ ಪ್ರೀತಿಗೆ ಸೈಫ್ ಅಡ್ಡ ಬಂದರು ಎಂಬ ಕಾರಣಕ್ಕೆ ಅವರನ್ನು ಬೇಡ ಎನ್ನುವ ಅಭಿಮಾನಿಗಳಿದ್ದಾರೆ.
ಇದನ್ನೂ ಓದಿ: ‘ರೈಡರ್’ ಮೋಷನ್ ಪೋಸ್ಟರ್ಗೆ ಒಂದು ಮಿಲಿಯನ್ ಹಿಟ್ಸ್
ಎಲ್ಲಕ್ಕಿಂತ ಹೆಚ್ಚಾಗಿ, ಪ್ರಭಾಸ್ ಎದುರು ಸೈಫ್ ಪೇಲವವಾಗಿ ಕಾಣಿಸುವುದರಿಂದ ಮತ್ತು ಇಂಥದ್ದೊಂದು ಪಾತ್ರಕ್ಕೆ ರಾಣಾ ದಗ್ಗುಬಾಟಿ ಹೇಳಿ ಮಾಡಿಸುವಂತೆ ಇರುವುದರಿಂದ ಅವರೇ ಈ ಪಾತ್ರಕ್ಕೆ ಸೂಕ್ತ ಎಂದು ಪ್ರಭಾಸ್ ಅವರ ಅಭಿಮಾನಿಗಳು ಸೋಷಿಯಲ್ ಮೀಡಿಯಾದಲ್ಲಿ ಹೇಳಿಕೊಂಡಿದ್ದಾರೆ. ಆದರೆ, ಚಿತ್ರತಂಡದವರು ಮಾತ್ರ ಅಭಿಮಾನಿಗಳಿಗೆ ಹೆಚ್ಚು ಪ್ರಾಮುಖ್ಯತೆ ಕೊಡದೆ, ತಮ್ಮ ಕೆಲಸದಲ್ಲಿ ನಿರತರಾಗಿದ್ದಾರೆ.
ಈ ಚಿತ್ರವನ್ನು ಟಿ-ಸೀರೀಸ್ನ ಭೂಷಣ್ ಕುಮಾರ್ ನಿರ್ಮಿಸುತ್ತಿದ್ದು, ಸದ್ಯಕ್ಕೆ ಪ್ರೀ-ಪ್ರೊಡಕ್ಷನ್ ಕೆಲಸಗಳು ಪ್ರಾರಂಭವಾಗಿವೆ. ಚಿತ್ರದ ಬಹುತೇಕ ಭಾಗದಲ್ಲಿ ಗ್ರಾಫಿಕ್ಸ್ ಇರುವುದರಿಂದ, ಈಗಾಗಲೇ ವಿಎಫ್ಎಕ್ಸ್ ಕೆಲಸಗಳು ಶುರುವಾಗಿವೆ ಎಂದು ಹೇಳಲಾಗುತ್ತಿದೆ. ಬಹುಶಃ 2021ರ ಮಧ್ಯಭಾಗದಲ್ಲಿ ಈ ಚಿತ್ರ ಪ್ರಾರಂಭವಾಗಿ 2022ರಲ್ಲಿ ಚಿತ್ರೀಕರಣ ಪ್ರಾರಂಭವಾಗುವ ಸಾಧ್ಯತೆ ಇದೆ.
ರಾಮ್ಚರಣ್ ಆಯ್ತು, ಈಗ ಅಖಿಲ್ … ಇನ್ನೊಂದು ಚಿತ್ರದಲ್ಲಿ ರಶ್ಮಿಕಾ ಹೆಸರು