ಸೌಥಾಂಪ್ಟನ್: ಆತಿಥೇಯ ಇಂಗ್ಲೆಂಡ್ ಹಾಗೂ ಪ್ರವಾಸಿ ಪಾಕಿಸ್ತಾನ ನಡುವಿನ 2ನೇ ಟೆಸ್ಟ್ ಪಂದ್ಯಕ್ಕೆ ಮಳೆ ಅಡ್ಡಿಯುಂಟು ಮಾಡಿದೆ. ದ ರೋಸ್ ಬೌಲ್ ಸ್ಟೇಡಿಯಂನಲ್ಲಿ ಗುರುವಾರ ಆರಂಭಗೊಂಡ ಪಂದ್ಯದಲ್ಲಿ ಟಾಸ್ ಜಯಿಸಿ ಮೊದಲು ಬ್ಯಾಟಿಂಗ್ ಆರಂಭಿಸಿರುವ ಪಾಕಿಸ್ತಾನ ತಂಡ, ವೇಗಿ ಜೇಮ್ಸ್ ಆಂಡರ್ಸನ್ (24ಕ್ಕೆ 2) ಮಾರಕ ದಾಳಿಗೆ ನಲುಗಿ 33. 5 ಓವರ್ಗಳಲ್ಲಿ 2 ವಿಕೆಟ್ಗೆ 85 ರನ್ ಗಳಿಸಿದ್ದ ವೇಳೆ ಪಂದ್ಯಕ್ಕೆ ಮಳೆ ಅಡ್ಡಿಪಡಿಸಿತು. ಇದರಿಂದಾಗಿ ನಿಗದಿತ ವೇಳೆಗೂ ಮೊದಲೇ ಚಹಾ ವಿರಾಮ ತೆಗೆದುಕೊಳ್ಳಲಾಯಿತು. ಭೋಜನ ವಿರಾಮದ ವೇಳೆಗೆ ಭೋಜನ ವಿರಾಮದ ವೇಳೆಗೆ ಇಂಗ್ಲೆಂಡ್ 1 ವಿಕೆಟ್ಗೆ 62 ರನ್ ಪೇರಿಸಿತ್ತು.
ಮೊದಲ ಪಂದ್ಯದ ಮೊದಲ ಇನಿಂಗ್ಸ್ನ ಶತಕ ಸಾಧಕ ಶಾನ್ ಮಸೂದ್ (1) ಇನಿಂಗ್ಸ್ನ 3ನೇ ಓವರ್ನಲ್ಲೇ ಜೇಮ್ಸ್ ಆಂಡರ್ಸನ್ಗೆ ವಿಕೆಟ್ ಒಪ್ಪಿಸಿದರು. ಬಳಿಕ ಅಬಿದ್ ಅಲಿ (49) ಹಾಗೂ ನಾಯಕ ಅಜರ್ ಅಲಿ (20) ಜೋಡಿ 2ನೇ ವಿಕೆಟ್ಗೆ 72 ರನ್ ಪೇರಿಸಿದ್ದ ವೇಳೆ ಆಂಡರ್ಸನ್ ಬೇರ್ಪಡಿಸಿದರು.
ಇದಕ್ಕೂ ಮೊದಲು ಪಾಕಿಸ್ತಾನ 1 ಹಾಗೂ ಆತಿಥೇಯ ಇಂಗ್ಲೆಂಡ್ ಎರಡು ಬದಲಾವಣೆ ಮಾಡಿಕೊಂಡವು. ಪಾಕ್ ಪರ ಸ್ಪಿನ್ನರ್ ಶಾದಾಬ್ ಖಾನ್ ಬದಲಿಗೆ, ಫವಾದ್ ಅಲಂ 10 ವರ್ಷಗಳ ಬಳಿಕ ರಾಷ್ಟ್ರೀಯ ಟೆಸ್ಟ್ ತಂಡಕ್ಕೆ ವಾಪಸಾದರು. ಇಂಗ್ಲೆಂಡ್ ಪರ ಬೆನ್ ಸ್ಟೋಕ್ಸ್ ಬದಲಿಗೆ ಜಾಕ್ ಕ್ರೌಲಿ ಹಾಗೂ ವೇಗಿ ಜೋಫ್ರಾ ಆರ್ಚರ್ ಬದಲಿಗೆ ಸ್ಯಾಮ್ ಕರನ್ ತಂಡಕ್ಕೆ ವಾಪಸಾದರು.
ಪಾಕಿಸ್ತಾನ : ಮೊದಲ ದಿನದಾಟದ ಚಹಾ ವಿರಾಮದ ವೇಳೆಗೆ 33.5 ಓವರ್ಗಳಲ್ಲಿ 2 ವಿಕೆಟ್ಗೆ 85 (ಅಬಿದ್ ಅಲಿ 49 ಬ್ಯಾಟಿಂಗ್, ಅಜರ್ ಅಲಿ 20, ಆಂಡರ್ಸನ್ 24ಕ್ಕೆ 2)