ಗುವಾಹಟಿ: ಅತಿದೊಡ್ಡ ಮಾದಕವಸ್ತು ಕಳ್ಳಸಾಗಾಣೆ ಪ್ರಕರಣ ಒಂದನ್ನು ಬೇದಿಸಿರುವ ಅಸ್ಸಾಂ ಪೊಲೀಸರು 100 ಕೋಟಿ ರೂಪಾಯಿ ಮೌಲ್ಯದ ಡ್ರಗ್ಸ್ ಹಾಗೂ ನಾಲ್ವರುನ್ನು ವಶಕ್ಕೆ ಪಡೆದಿದ್ದಾರೆ. ಘಟನೆಯು ಅಸ್ಸಾಂನ ಕರೀಮ್ಗಂಜ್ ಜಿಲ್ಲೆಯಲ್ಲಿ ನಡೆದಿದೆ.
ಅಸ್ಸಾಂ ಪೊಲೀಸ್‌ನ ವಿಶೇಷ ಕಾರ್ಯ ಪಡೆ(STF) ಮತ್ತು ಕರೀಮ್ಗಂಜ್ ಜಿಲ್ಲಾ ಪೊಲೀಸರ ಜಂಟಿ ಕಾರ್ಯಾಚರಣೆಯಲ್ಲಿ ಡ್ರಗ್ಸ್ ಜಪ್ತಿ ಮಾಡಲಾಗಿದ್ದು, ಪ್ರಕರಣಕ್ಕೆ ಸಂಬಂಧಿಸಿದಂತೆ ಇನ್ನಷ್ಟು ಜನರ ಬಂಧನವಾಗುವ ಸಾಧ್ಯತೆಯಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಇದನ್ನೂ ಓದಿ: BTS ಭೇಟಿಯಾಗಲು ಮನೆ ಬಿಟ್ಟ ಹೋದ ಬಾಲಕಿಯರಿಗೆ ಕಾದಿತ್ತು ಶಾಕ್!
ಈ ಕುರಿತು ಪ್ರತಿಕ್ರಿಯಿಸಿರುವ STF ಡಿಐಜಿ ಪಾರ್ಥಸಾರಥಿ ಮಹಾಂತ, ಮಿಜೋರಾಂನಿಂದ ಕೋಟ್ಯಂತರ ರೂಪಾಯಿ ಮೌಲ್ಯದ ಡ್ರಗ್ಸ್ ಕಳ್ಳಸಾಗಾಣೆ ಮಾಡಲಾಗುತ್ತಿದೆ ಎಂಬ ಮಾಹಿತಿ ಲಭಿಸಿತ್ತು. ಮಾಹಿತಿ ಆಧರಿಸಿ ಕಾರ್ಯಾಚರಣೆ ನಡೆಸಿದಾಗ ನೀಲಂ ಬಜಾರ್ ಪೊಲೀಸ್ ಠಾಣಾ ವ್ಯಾಪ್ತಿಯ ಸುಪ್ರಕಂಡಿ ಬಳಿ ಮಧ್ಯಾಹ್ನ 2:15ರ ಸುಮಾರಿಗೆ ಒಂದು ಕಾರನ್ನು ನಾವು ತಡೆದು ತಪಾಸಣೆ ನಡೆಸಿದಾಗ ಆರೋಪಿಗಳು ಸಿಕ್ಕಿಬಿದ್ದಿದ್ದಾರೆ.
ಬಂಧಿತರಿಂದ 5.1 ಕೆ.ಜಿ ಹೆರಾಯಿನ್, 64,000 ಯಬಾ ಟ್ಯಾಬ್ಲೆಟ್ಸ್ ಮತ್ತು ನಾಲ್ಕು ಪ್ಯಾಕ್ ವಿದೇಶಿ ಸಿಗರೇಟ್ ಪತ್ತೆಯಾಗಿದೆ. ಮೂವರು ಆರೋಪಿಗಳು ಮಿಜೋರಾಂ ಮೂಲದವರಾಗಿದ್ದು, ಓರ್ವ ಅಸ್ಸಾಂನ ಕರೀಮ್ಗಂಜ್ನವನು ಎಂದು ತಿಳಿದು ಬಂದಿದೆ. ವಶಪಡಿಸಿಕೊಂಡ ಡ್ರಗ್ಸ್ ಮೌಲ್ಯ ಸುಮಾರು ₹100 ಕೋಟಿಯಾಗಿದ್ದು, ಈಶಾನ್ಯ ಭಾರತದಲ್ಲಿ ಈವರೆಗೆ ಜಪ್ತಿಯಾದ ಅತ್ಯಧಿಕ ಮೌಲ್ಯದ ಡ್ರಗ್ಸ್ ಇದಾಗಿದೆ ಎಂದು STF ಡಿಐಜಿ ಪಾರ್ಥಸಾರಥಿ ಮಹಾಂತ ತಿಳಿಸಿದ್ದಾರೆ.