ಹೈದರಾಬಾದ್ : ಅಪರೂಪದ ಬೆನ್ನುಮೂಳೆಯ ಸ್ನಾಯು ಕ್ಷೀಣತೆ(ಸ್ಪೈನಲ್ ಮಸಲ್ ಅಟ್ರೋಪಿ) ಎಂಬ ಖಾಯಿಲೆ ಹೊಂದಿದ ಹೈದರಾಬಾದ್‌ನ 3 ವರ್ಷದ ಬಾಲಕನ ಚಿಕಿತ್ಸೆಗಾಗಿ 16 ಕೋಟಿ ರೂ.ಗಳ ಚುಚ್ಚುಮದ್ದನ್ನು ನೀಡಲಾಗಿದೆ. ಅಯಾನ್ಶ್ ಗುಪ್ತ ಎಂಬ ಈ ಮಗುವಿನ ಚಿಕಿತ್ಸೆಗೆ, ಕ್ರೌಡ್ಫಂಡಿಂಗ್ ಮೂಲಕ, 62,000 ಕ್ಕೂ ಹೆಚ್ಚು ಜನರು ದೇಣಿಗೆ ನೀಡಿದ್ದರು.
ಎಸ್ಎಂಎನ್1 ಜೀನ್ನಲ್ಲಿನ ಲೋಪದಿಂದಾಗಿ ಉಂಟಾಗುವ ಸ್ಪೈನಲ್ ಮಸಲ್ ಅಟ್ರೋಪಿ(ಎಸ್‌ಎಂಎ) ಖಾಯಿಲೆಯು 10 ಸಾವಿರ ಮಕ್ಕಳಲ್ಲಿ ಒಬ್ಬರಿಗೆ ಕಾಣಿಸಿಕೊಳ್ಳುತ್ತದೆ. ಸ್ನಾಯುಗಳಲ್ಲಿ ದೌರ್ಬಲ್ಯ ಕಾಣಿಸಿಕೊಂಡು ಕ್ರಮೇಣ ಉಸಿರಾಟಕ್ಕೆ ಮತ್ತು ನುಂಗುವುದಕ್ಕೆ ಸಮಸ್ಯೆ ಉಂಟಾಗುತ್ತದೆ. ಭಾರತದಲ್ಲಿ ಹಾಲಿ 800 ಮಕ್ಕಳು ಈ ಖಾಯಿಲೆ ಹೊಂದಿದ್ದು, ಇದಕ್ಕೆ ಮೂರರಷ್ಟು ಮಕ್ಕಳು 2 ವರ್ಷ ಪೂರೈಸುವುದರೊಳಗೆ ಮೃತಪಡುತ್ತಾರೆ ಎನ್ನಲಾಗಿದೆ.
ಇದನ್ನೂ ಓದಿ: ನಿಮ್ಮ ಮಗುವನ್ನು ಓರಿಯೋ ಸ್ಟಾರ್ ಮಾಡ್ತೇವೆ ಎಂದು ಲಕ್ಷಾಂತರ ರೂಪಾಯಿ ವಂಚಿಸಿದ ಖದೀಮರು!
‘ವಿಶ್ವದ ಅತ್ಯಂತ ದುಬಾರಿ ಔಷಧ’ ಎಂದು ಹೆಸರಿಸಲಾಗಿರುವ ‘ಜೋಲ್ಗೆನ್ಸ್ಮಾ’ ಚುಚ್ಚುಮದ್ದನ್ನು ಅಯಾನ್ಶ್ನ ಜೀನ್ ಥೆರಪಿಗಾಗಿ ಅಮೆರಿಕದಿಂದ ಆಮದು ಮಾಡಿಕೊಳ್ಳಲಾಯಿತು. ಜೂನ್ 9 ರ ಬುಧವಾರ ಸಿಕಂದರಾಬಾದ್ನ ರೇನ್ಬೋ ಚಿಲ್ರನ್ಸ್ ಹಾಸ್ಪಿಟಲ್ನಲ್ಲಿ ಅವನಿಗೆ ಈ ಸಿಂಗಲ್ ಡೋಸ್ ಚುಚ್ಚುಮದ್ದಿನ ಚಿಕಿತ್ಸೆ ನೀಡಲಾಯಿತು.
ಬಾಲಕನ ಪಾಲಕರಾದ ಯೋಗೇಶ್ ಗುಪ್ತ ಮತ್ತು ರೂಪಲ್ ಗುಪ್ತ, ಈ ವರ್ಷದ ಫೆಬ್ರವರಿಯಿಂದ ತಮ್ಮ ಮಗನ ಚಿಕಿತ್ಸೆಗಾಗಿ ಫಂಡ್ ರೈಸಿಂಗ್ ಕ್ಯಾಂಪೇನ್ ನಡೆಸಿದ್ದರು. ಅವರ ಪ್ರಯತ್ನ ಫಲಿಸಿದ್ದು, “ಜಗತ್ತಿನ ಅತ್ಯಂತ ದುಬಾರಿ ಔಷಧಿಯನ್ನು ಒದಗಿಸಿ, ಅಯಾನ್ಶ್ಗೆ ಜೀವ ನೀಡುವಂತಹ ಉಡುಗೊರೆ ನೀಡಿರುವ ಎಲ್ಲಾ ದಾನಿಗಳಿಗೂ ನಾವು ಚಿರಋಣಿಗಳಾಗಿದ್ದೇವೆ” ಎಂದು ಹೇಳಿದ್ದಾರೆ.
‘ಇಂಪ್ಯಾಕ್ಟ್ಗುರು.ಕಾಂ’ ಮೂಲಕ ನಡೆದ ಈ ಕ್ರೌಡ್ ಫಂಡಿಂಗ್ ಅಭಿಯಾನದಲ್ಲಿ 62,450 ಜನರಿಂದ 14.84 ಕೋಟಿ ರೂ.ಗಳ ದೇಣಿಗೆ ಸಂಗ್ರಹಿಸಲಾಗಿತ್ತು. ಚಿತ್ರೋದ್ಯಮ ಮತ್ತು ಕ್ರಿಕೆಟ್ ಲೋಕದ ಹಲವು ಗಣ್ಯರು ಈ ಅಭಿಯಾನಕ್ಕೆ ಸಹಾಯ ಒದಗಿಸಿದ್ದರು. ಈ 16 ಕೋಟಿ ರೂ.ಗಳ ಚುಚ್ಚುಮದ್ದಿನ ಮೇಲೆ ಸಲ್ಲುವ 6 ಕೋಟಿ ರೂ.ಗಳ ಆಮದು ಶುಲ್ಕಕ್ಕೆ, ಮಾನವೀಯತೆ ಆಧಾರದ ಮೇಲೆ, ಕೇಂದ್ರ ಹಣಕಾಸು ಸಚಿವಾಲಯ ವಿನಾಯಿತಿ ನೀಡಿತ್ತು ಎನ್ನಲಾಗಿದೆ.
ಈ ಮುನ್ನ ಮಾನವೀಯತೆಯ ಆಧಾರದ ಮೇಲೆ ನೋವಾರ್ಟಿಸ್ ಕಂಪೆನಿ ಇಬ್ಬರು ಮಕ್ಕಳಿಗೆ ಈ ಚುಚ್ಚುಮದ್ದನ್ನು ಉಚಿತವಾಗಿ ಒದಗಿಸಿತ್ತು. ಸಿಕಂದರಾಬಾದ್ನ ರೇನ್ಬೋ ಆಸ್ಪತ್ರೆಯಲ್ಲೇ ಆಗಸ್ಟ್ 2020 ರಲ್ಲಿ ಮತ್ತು ಏಪ್ರಿಲ್ 2021 ರಲ್ಲಿ ಈ ಚಿಕಿತ್ಸೆ ಒದಗಿಸಲಾಗಿತ್ತು ಎನ್ನಲಾಗಿದೆ. (ಏಜೆನ್ಸೀಸ್)
VIDEO | ನೀರುತುಂಬಿದ ರಸ್ತೆಯಲ್ಲಿ ಕೂರಿಸಿ ಕಂಟ್ರಾಕ್ಟರ್ಗೆ ಕಸದ ಅಭಿಷೇಕ!
ಕರೊನಾ ಪರೀಕ್ಷೆ ಮಾಡುವಾಗ ಮೂಗಿನೊಳಗೆ ಮುರಿದ ಸ್ವಾಬ್ ಸ್ಟಿಕ್! ಇದು ಬಹಳ ನೋವಿನ ಕಥೆ