ನವದೆಹಲಿ : ಮಕ್ಕಳಲ್ಲಿ ಕೋವಿಡ್19 ಸೋಂಕು ಕಾಣಿಸಿಕೊಂಡಾಗ ಪಾಲಿಸಬೇಕಾದ ಚಿಕಿತ್ಸಾ ಕ್ರಮದ ಬಗ್ಗೆ ಕೇಂದ್ರ ಸರ್ಕಾರ ಸಮಗ್ರ ಮಾರ್ಗಸೂಚಿಗಳನ್ನು ಜಾರಿಗೊಳಿಸಿದೆ. ಆರೋಗ್ಯ ಸಚಿವಾಲಯದ ಡೈರೆಕ್ಟೊರೇಟ್ ಜನರಲ್ ಆಫ್ ಹೆಲ್ತ್ ಸರ್ವೀಸಸ್(ಡಿಜಿಎಚ್ಎಸ್) ಹೊರಡಿಸಿರುವ ಈ ಮಾರ್ಗಸೂಚಿಗಳಲ್ಲಿ ಕರೊನಾ ಸೋಂಕಿತ ಮಕ್ಕಳಿಗೆ ರೆಮ್ಡೆಸಿವಿರ್ ಆ್ಯಂಟಿವೈರಲ್ ಔಷಧಿ ಬಳಕೆ ಬೇಡ ಎಂದಿದ್ದು, ಸ್ಟೀರಾಯ್ಡ್ ಬಳಕೆ ಮತ್ತು ಸಿಟಿ ಸ್ಕ್ಯಾನ್ಗಳ ಬಗ್ಗೆಯೂ ಎಚ್ಚರಿಕೆ ವಹಿಸಲು ಸೂಚಿಸಲಾಗಿದೆ.
ಆಸ್ಪತ್ರೆಯಲ್ಲಿ ದಾಖಲಾಗಿರುವ ತೀವ್ರ ಮತ್ತು ಗಂಭೀರ ಸೋಂಕಿನ ಪ್ರಕರಣಗಳಲ್ಲಿ ಮಾತ್ರ ಸ್ಟಿರಾಯ್ಡ್ಅನ್ನು ಬಿಗಿ ಮೇಲ್ವಿಚಾರಣೆಯಲ್ಲಿ ಬಳಸಬೇಕು ಎಂದು ಡಿಜಿಎಚ್ಎಸ್ ಶಿಫಾರಸ್ಸು ಮಾಡಿದೆ. “ಸ್ಟಿರಾಯ್ಡ್ಗಳನ್ನು ಸರಿಯಾದ ಸಮಯದಲ್ಲಿ, ಸರಿಯಾದ ಡೋಸ್ನಲ್ಲಿ ಮತ್ತು ಸರಿಯಾದ ಅವಧಿಗೆ ಬಳಸಬೇಕು. ವೈದ್ಯರ ಸಲಹೆಯಿಲ್ಲದೆ ಸ್ಟಿರಾಯ್ಡ್ ಬಳಸಬಾರದು” ಎಂದಿದೆ.
ಇದನ್ನೂ ಓದಿ: ಮಕ್ಕಳ ಮೇಲೆ ಕೋವಾಕ್ಸಿನ್ ಟ್ರಯಲ್ಸ್ಗೆ ದೆಹಲಿ ಏಮ್ಸ್ ಸಜ್ಜು
ಕರೊನಾ ಸೋಂಕಿತರಲ್ಲಿ ವೈರಲ್ ಲೋಡ್ಅನ್ನು ಕಡಿಮೆ ಮಾಡಲು ಬಳಸುವ ರೆಮ್ಡೆಸಿವಿರ್ ಚುಚ್ಚುಮದ್ದನ್ನು ಮಕ್ಕಳಿಗೆ ಶಿಫಾರಸು ಮಾಡಿಲ್ಲ. “18 ವರ್ಷದೊಳಗಿನವರಲ್ಲಿ ರೆಮ್ಡೆಸಿವಿರ್ ಬಳಕೆಗೆ ಸುರಕ್ಷತೆ ಮತ್ತು ಪರಿಣಾಮಕಾರಿತ್ವದ ಬಗ್ಗೆ ಸಾಕಷ್ಟು ಮಾಹಿತಿ ಇಲ್ಲ” ಎನ್ನಲಾಗಿದೆ.
ಶ್ವಾಸಕೋಶಕ್ಕೆ ಎಷ್ಟು ಪ್ರಮಾಣದಲ್ಲಿ ಸೋಂಕು ಹರಡಿದೆ ಎಂದು ಪರೀಕ್ಷಿಸಲು ಬಳಸುವ ಹೈರೆಸಲ್ಯೂಷನ್ ಸಿಟಿ (ಎಚ್ಆರ್ಸಿಟಿ)ಯನ್ನು ತೀರಾ ಅಗತ್ಯವಿದ್ದರೆ ಮಾತ್ರ ಆರ್ಡರ್ ಮಾಡಬೇಕು. ಮೆದುಪ್ರಮಾಣದ ಮತ್ತು ಏಸಿಮ್ಟಮ್ಯಾಟಿಕ್ ಪ್ರಕರಣಗಳಲ್ಲಿ ಆ್ಯಂಟಿಮೈಕ್ರೋಬಿಯಲ್ಗಳ ಬಳಕೆ ಸೂಕ್ತವಲ್ಲ; ಅದೇ ಮಧ್ಯಮ ಮತ್ತು ತೀವ್ರ ಪ್ರಕರಣಗಳಲ್ಲಿ ಹೆಚ್ಚುವರಿ ಸೋಂಕು ಕಂಡುಬಂದಾಗ ಮಾತ್ರ ಬಳಸಬೇಕು ಎನ್ನಲಾಗಿದೆ. (ಏಜೆನ್ಸೀಸ್)
ಜನರಿಗೆ ಮತ್ತೊಂದು ಶಾಕ್ : ಪ್ರತಿ ಯುನಿಟ್ಗೆ 30 ಪೈಸೆ ವಿದ್ಯುತ್ ದರ ಏರಿಕೆ