ಬೀಜಿಂಗ್: ಕಳೆದ ವರ್ಷ ಜೂನ್ 15ರಂದು ಪೂರ್ವ ಲಡಾಖ್ನ ಗಲ್ವಾನ್ ಕಣಿವೆಯಲ್ಲಿ ಭಾರತೀಯ ಯೋಧರ ವಿರುದ್ಧ ನಡೆದಿದ್ದ ಘರ್ಷಣೆಯಲ್ಲಿ ತಮ್ಮ ಐವರು ಅಧಿಕಾರಿಗಳು ಮತ್ತು ಯೋಧರು ಮೃತಪಟ್ಟಿರುವುದಾಗಿ ಚೀನಾದ ಪೀಪಲ್ಸ್ ಲಿಬರೇಷನ್ ಆರ್ಮಿ (ಪಿಎಲ್ಎ) ಇದೇ ಮೊದಲ ಬಾರಿಗೆ ಅಧಿಕೃತವಾಗಿ ಒಪ್ಪಿಕೊಂಡಿದೆ.
ಮೃತಪಟ್ಟ ಐವರು ಅಧಿಕಾರಿ ಮತ್ತು ಯೋಧರಿಗೆ ಚೀನಾದ ಕೇಂದ್ರ ಮಿಲಿಟರಿ ಆಯೋಗ (ಸಿಎಂಸಿ) ಗೌರವ ಸಲ್ಲಿಸಿರುವುದಾಗಿ ಚೀನಾ ಮಿಲಿಟರ ಪೇಪರ್ ಪಿಎಲ್ಎ ಡೈಲಿ ಶುಕ್ರವಾರ ವರದಿ ಮಾಡಿದೆ.
ಮೃತಪಟ್ಟವರಲ್ಲಿ ಪಿಎಲ್ಎ ಕ್ಸಿನ್ಜಿಯಾಂಗ್ ಮಿಲಿಟರಿ ಕಮಾಂಡ್ನ ರೆಜಿಮೆಂಟಲ್ ಕಮಾಂಡರ್ ಕಿ ಫಾಬೋ ಸಹ ಒಳಗೊಂಡಿದ್ದಾರೆಂದು ವರದಿಯಾಗಿದೆ. ಚೀನಾ ಅಧ್ಯಕ್ಷ ಕ್ಸಿಜಿನ್ಪಿಂಗ್ ನೇತೃತ್ವದ ಪಿಎಲ್ಎ ನಾಯಕತ್ವವು ಕಿ ಫಾಬೋ, ಚೆನ್ ಹೊಂಗ್ಜನ್, ಚೆನ್ ಕ್ಸಿಯಾಂಗ್ರಾಂಗ್, ಕ್ಸಿಯಾವೋ ಸಿಯುವಾನ್ ಮತ್ತು ವಾಂಗ್ ಜೌರಾನ್ ಸಾವಿಗೆ ಗೌರವ ಸೂಚಿಸಿದ್ದಾರೆ.
ಗಲ್ವಾನ್ ಘರ್ಷಣೆಯಲ್ಲಿ ಚೀನಾದ ಸುಮಾರು 30 ಯೋಧರು ಮೃತಪಟ್ಟಿದ್ದಾರೆಂದು ಭಾರತ ಹೇಳಿತ್ತು. ಆದರೆ, ಯಾವುದೇ ಪ್ರಾಣ ಹಾನಿಯಾಗಿಲ್ಲ ಎಂದು ಚೀನಾ ನಿರಾಕರಿಸಿತ್ತು. ಆದರೆ, ಚೀನಾದ 45 ಯೋಧರು ಮೃತರಾಗಿದ್ದಾರೆಂದು ಫೆ. 10ರಂದು ದಿ ರಷ್ಯನ್ ಅಫಿಶಿಯಲ್ ನ್ಯೂಸ್ ಏಜೆನ್ಸಿ ವರದಿ ಮಾಡಿತ್ತು.
ಜೂನ್ 15ರಂದು ನಡೆದ ಘರ್ಷಣೆಯಲ್ಲಿ ಭಾರತದ 20 ಯೋಧರು ಹುತಾತ್ಮರಾಗಿದ್ದರು. ಇದು ನಾಲ್ಕು ದಶಕಗಳಲ್ಲೇ ಎರಡು ದೇಶಗಳ ನಡುವೆ ನಡೆದ ಅತ್ಯಂತ ಭೀಕರ ಗಡಿ ಘರ್ಷಣೆಯಾಗಿತ್ತು. ನಮಗೇನು ಆಗಿಲ್ಲ ಎಂದು ಹಿಂದಿನಿಂದಲೂ ಹೇಳಿಕೊಂಡು ಬಂದಿದ್ದ ಚೀನಾ ಕೊನೆಗೂ ಸಾವಾಗಿರುವುದನ್ನು ಒಪ್ಪಿಕೊಂಡಿದ್ದಾರೆ. (ಏಜೆನ್ಸೀಸ್)
ಗಲ್ವಾನ್ ಘರ್ಷಣೆ: ಸತ್ತವರ ಸಂಖ್ಯೆ ಮುಚ್ಚಿಡಲು ಛೇ ಇದೆಂಥ ನೀಚ ಕೃತ್ಯ!
ಗಲ್ವಾನ್ ಕಣಿವೆಯಿಂದ ಹಿಂದಕ್ಕೆ ಸರಿದ ಚೀನಾ? ಭಾರತದಿಂದ ಹದ್ದಿನ ಕಣ್ಣು…