ಮ್ಯಾಂಚೆಸ್ಟರ್: ಆತಿಥೇಯ ಇಂಗ್ಲೆಂಡ್ ತಂಡಕ್ಕೆ ಮೊದಲ ಟೆಸ್ಟ್ ಪಂದ್ಯದಲ್ಲಿ ಪ್ರವಾಸಿ ವೆಸ್ಟ್ ಇಂಡೀಸ್ ತಂಡದ ವೇಗಿಗಳು ಕಡಿವಾಣ ಹಾಕಿದ್ದರೆ, ಗುರುವಾರ ಆರಂಭಗೊಂಡ 2ನೇ ಟೆಸ್ಟ್ ಪಂದ್ಯದಲ್ಲಿ ಸ್ಪಿನ್ನರ್ ರೋಸ್ಟನ್ ಚೇಸ್ ಆರಂಭಿಕ ಆಘಾತ ನೀಡಿದ್ದಾರೆ. ಮಳೆಯಿಂದಾಗಿ ತಡವಾಗಿ ಆರಂಭಗೊಂಡ ಪಂದ್ಯದಲ್ಲೂ ಆಂಗ್ಲರು ಉತ್ತಮ ಮೊತ್ತ ಪೇರಿಸಲು ಹೋರಾಟ ಮುಂದುವರಿಸಿದ್ದಾರೆ.
ಓಲ್ಡ್ ಟ್ರಾಫೋರ್ಡ್ ಮೈದಾನದಲ್ಲಿ ನಿಗದಿತ ಸಮಯಕ್ಕಿಂತ 90 ನಿಮಿಷ ತಡವಾಗಿ ಮೊದಲ ದಿನದಾಟ ಆರಂಭಗೊಂಡಿತು. ಮೊದಲ ಪಂದ್ಯದಂತೆ ಈ ಬಾರಿ ಕೂಡ ಮಳೆಯಿಂದಾಗಿ ಟಾಸ್ ವಿಳಂಬಗೊಂಡಿತು. ಟಾಸ್ ಜಯಿಸಿದ ವೆಸ್ಟ್ ಇಂಡೀಸ್ ನಾಯಕ ಜೇಸನ್ ಹೋಲ್ಡರ್ ಫೀಲ್ಡಿಂಗ್ ಆಯ್ದುಕೊಂಡರು. ಇಂಗ್ಲೆಂಡ್ ತಂಡ ಮೊದಲ 13 ಓವರ್ ಎಚ್ಚರಿಕೆಯ ಆಟವಾಡಿದರೂ, ಭೋಜನ ವಿರಾಮಕ್ಕೂ ಮುನ್ನ ಕೊನೆಯ ಎಸೆತದಲ್ಲಿ ಆರಂಭಿಕ ರೋರಿ ಬರ್ನ್ಸ್ (15) ರೋಸ್ಟನ್ ಚೇಸ್ ಎಸೆತದಲ್ಲಿ ಎಲ್ಬಿಡಬ್ಲ್ಯು ಬಲೆಗೆ ಬಿದ್ದರು. ಇದರಿಂದಾಗಿ ವಿಂಡೀಸ್ ಭೋಜನ ವಿರಾಮದ ವೇಳೆಗೆ 13.2 ಓವರ್ಗಳಲ್ಲಿ 1 ವಿಕೆಟ್ಗೆ 29 ರನ್ ಗಳಿಸಿತು. ಬರ್ನ್ಸ್ ಎಲ್ಬಿ ತೀರ್ಪಿನ ವಿರುದ್ಧ ಡಿಆರ್ಎಸ್ ಮೊರೆ ಹೋದರೂ, ರಿಪ್ಲೇಯಲ್ಲೂ ಚೆಂಡು ಮಧ್ಯದ ವಿಕೆಟ್ಗೆ ಬಡಿಯುತ್ತಿದ್ದುದು ಸ್ಪಷ್ಟವಾಗಿ ಕಾಣಿಸಿತು. ಇದರಿಂದ ಆಂಗ್ಲರ 1 ಡಿಆರ್ಎಸ್ ವ್ಯರ್ಥಗೊಂಡಿತು.
ಇದನ್ನೂ ಓದಿ: ಇಂಗ್ಲೆಂಡ್-ವಿಂಡೀಸ್ 2ನೇ ಟೆಸ್ಟ್ಗೂ ಮಳೆ ಅಡಚಣೆ
ಭೋಜನ ವಿರಾಮದ ಬಳಿಕ ಮತ್ತೆ ಮೊದಲ ಎಸೆತದಲ್ಲೇ ವನ್ಡೌನ್ ಬ್ಯಾಟ್ಸ್ಮನ್ ಜಾಕ್ ಕ್ರೌಲಿ (0) ವಿಕೆಟ್ ಕೂಡ ರೋಸ್ಟನ್ ಚೇಸ್ ಪಾಲಾಯಿತು. ಆಗ ಒಗ್ಗೂಡಿದ ಡೊಮಿನಿಕ್ ಸಿಬ್ಲೆ ಮತ್ತು ನಾಯಕ ಜೋ ರೂಟ್ (23) 3ನೇ ವಿಕೆಟ್ಗೆ 52 ರನ್ ಕೂಡಿ ತಂಡಕ್ಕೆ ತುಸು ಚೇತರಿಕೆ ಒದಗಿಸಿದರು. ಯುವ ವೇಗಿ ಅಲ್ಜಾರಿ ಜೋಸೆಫ್ , ರೂಟ್ ವಿಕೆಟ್ ಕಬಳಿಸುವ ಮೂಲಕ ಈ ಜೋಡಿಯನ್ನು ಬೇರ್ಪಡಿಸಿದರು. ನಂತರ ಸಿಬ್ಲೆ (46*) ಮತ್ತು ಕಳೆದ ಪಂದ್ಯದ ನಾಯಕ ಬೆನ್ ಸ್ಟೋಕ್ಸ್ (18*) 4ನೇ ವಿಕೆಟ್ಗೆ ಜತೆಯಾಟದಲ್ಲಿ ವಿಂಡೀಸ್ಗೆ ಪ್ರತಿರೋಧ ತೋರುವ ಮೂಲಕ ತಂಡವನ್ನು ಸುಸ್ಥಿತಿಗೆ ಕೊಂಡೊಯ್ಯುವ ಹೋರಾಟದಲ್ಲಿದ್ದಾರೆ. ಇಂಗ್ಲೆಂಡ್ ತಂಡ ಚಹಾ ವಿರಾಮದ ವೇಳೆಗೆ 3 ವಿಕೆಟ್ಗೆ 112 ರನ್ ಗಳಿಸಿದೆ.
ಆಂಗ್ಲರಿಗೆ ಹೊಸ ಬೌಲಿಂಗ್ ವಿಭಾಗ
ಮೊದಲ ಟೆಸ್ಟ್ಗಿಂತ ಸಂಪೂರ್ಣವಾಗಿ ಭಿನ್ನವಾದ ಬೌಲಿಂಗ್ ವಿಭಾಗದೊಂದಿಗೆ ಆಂಗ್ಲರು ಕಣಕ್ಕಿಳಿದರು. ಜೇಮ್ಸ್ ಆಂಡರ್ಸನ್ ಮತ್ತು ಮಾರ್ಕ್ ವುಡ್ಗೆ ಆಂಗ್ಲರು ಪಂದ್ಯಕ್ಕೆ ಮೊದಲೇ ವಿಶ್ರಾಂತಿ ನೀಡಿದ್ದರೆ, ಮತ್ತೋರ್ವ ವೇಗಿ ಜೋಫ್ರಾ ಆರ್ಚರ್ ಜೈವಿಕ-ಸುರಕ್ಷಾ ವಾತಾವರಣದ ನಿಯಮ ಉಲ್ಲಂಘಿಸಿದ ಕಾರಣದಿಂದಾಗಿ ಪಂದ್ಯಕ್ಕೆ ಅಲಭ್ಯರಾಗಿದ್ದರು. ಇದರಿಂದಾಗಿ ಇಂಗ್ಲೆಂಡ್ ಕಳೆದ ಪಂದ್ಯದಲ್ಲಿ ಆಡದ ಸ್ಟುವರ್ಟ್ ಬ್ರಾಡ್, ಕ್ರಿಸ್ ವೋಕ್ಸ್ ಮತ್ತು ಸ್ಯಾಮ್ ಕರನ್ ಅವರಿಗೆ ವೇಗದ ಬೌಲಿಂಗ್ ವಿಭಾಗದ ಹೊಣೆ ವಹಿಸಿದೆ. ಜತೆಗೆ ನಾಯಕ ಜೋ ರೂಟ್ ಕೂಡ ಮರಳಿದ್ದು, ಆಂಗ್ಲರಿಗೆ ಬಲ ಹೆಚ್ಚಿಸಿದ್ದಾರೆ. ವೆಸ್ಟ್ ಇಂಡೀಸ್ ತಂಡ ಮೊದಲ ಟೆಸ್ಟ್ ಜಯಿಸಿದ ತಂಡದಲ್ಲಿ ಯಾವುದೇ ಬದಲಾವಣೆ ಮಾಡದೆ ಕಣಕ್ಕಿಳಿದಿದೆ.
ಇಂಗ್ಲೆಂಡ್ ಪ್ರಥಮ ಇನಿಂಗ್ಸ್: 46 ಓವರ್ಗಳಲ್ಲಿ 3 ವಿಕೆಟ್ಗೆ 112 (ಬರ್ನ್ಸ್ 15, ಸಿಬ್ಲೆ 46*, ಕ್ರೌಲಿ 0, ರೂಟ್ 23, ಸ್ಟೋಕ್ಸ್ 18*, ಚೇಸ್ 24ಕ್ಕೆ 2, ಅಲ್ಜಾರಿ 19ಕ್ಕೆ 1).