ನವದೆಹಲಿ: ಐಪಿಎಲ್ನಲ್ಲಿ 2014ರಿಂದ 2021ರವರೆಗೆ ಆರ್ಸಿಬಿ ತಂಡದ ಪ್ರಮುಖ ಭಾಗವಾಗಿದ್ದ ಸ್ಪಿನ್ನರ್ ಯಜುವೇಂದ್ರ ಚಾಹಲ್ ಇದೀಗ ರಾಜಸ್ಥಾನ ರಾಯಲ್ಸ್ ತಂಡದ ಭಾಗವಾಗಿದ್ದಾರೆ. ಆರ್ಸಿಬಿ ಪರ ಆಡುವಾಗ ಅಪಾರ ಸಂಖ್ಯೆಯಲ್ಲಿ ಅಭಿಮಾನಿಗಳ ಪ್ರೀತಿಗೆ ಪಾತ್ರರಾಗಿದ್ದ ಚಾಹಲ್ ಈಗಲೂ ಆರ್ಸಿಬಿ ತಂಡದಿಂದ ಹೊರಬಿದ್ದ ಬಗ್ಗೆ ಬೇಸರ ಹೊಂದಿದ್ದಾರೆ. ಎಲ್ಲಕ್ಕಿಂತ ಹೆಚ್ಚಾಗಿ ತಮ್ಮನ್ನು ತಂಡದಿಂದ ಹೊರಕಳುಹಿಸಿದ ರೀತಿಯ ಬಗ್ಗೆ ಚಾಹಲ್, ಆರ್ಸಿಬಿ ಟೀಮ್ ಮ್ಯಾನೇಜ್ಮೆಂಟ್ ವಿರುದ್ಧ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
“ನಾನು ಆರ್ಸಿಬಿ ಪರ ಸುಮಾರು 113 ಪಂದ್ಯ ಆಡಿರುವೆ. ಆದರೂ ನನ್ನನ್ನು ತಂಡದಿಂದ ಕೈಬಿಡುವ ಮುನ್ನ ಟೀಮ್ ಮ್ಯಾನೇಜ್ಮೆಂಟ್ನಿಂದ ಸರಿಯಾದ ರೀತಿಯಲ್ಲಿ ಸಂವಹನ ನಡೆಯಲಿಲ್ಲ. ಹರಾಜಿನಲ್ಲಿ ನನ್ನನ್ನು ಮರಳಿ ಖರೀದಿಸುವ ಬಗ್ಗೆ ವಾಗ್ದಾನ ನೀಡಿದ್ದರು. ಆದರೆ ನಂತರ ನನ್ನನ್ನು ಕಡೆಗಣಿಸಿದ ಬಗ್ಗೆ ಸಿಟ್ಟಾದೆ. ಹರಾಜಿನಲ್ಲಿ ನನಗೆ ಅವರು ಯಾವುದೇ ಬಿಡ್ ಸಲ್ಲಿಸಲಿಲ್ಲ. ನಾನು ಆರ್ಸಿಬಿ ಪರ 8 ವರ್ಷ ಆಡಿದ್ದೆ ಮತ್ತು ಬೆಂಗಳೂರಿನ ಚಿನ್ನಸ್ವಾಮಿ ಕ್ರೀಡಾಂಗಣ ನನ್ನ ನೆಚ್ಚಿನ ಮೈದಾನವಾಗಿದೆ’ ಎಂದು ಚಾಹಲ್ ಸಂದರ್ಶನವೊಂದರಲ್ಲಿ ಹೇಳಿದ್ದಾರೆ.
“ಖಂಡಿತವಾಗಿಯೂ ನಾನು ಮತ್ತೆ ಆರ್ಸಿಬಿ ಪರ ಆಡಲು ಬಯಸಿದ್ದೆ. ಹರಾಜಿಗೆ ನನ್ನ ಹೆಸರು ಕಳುಹಿಸುವಾಗಲೇ ಮರಳಿ ಖರೀದಿಸುವ ಮಾತು ಕೊಟ್ಟಿದ್ದರು. ಆದರೆ ಹರಾಜಿನಲ್ಲಿ ನನಗೆ ಬಿಡ್ ಸಲ್ಲಿಸಲಿಲ್ಲ. ಇದರಿಂದ ಸಿಟ್ಟಾದ ನಾನು ರಾಜಸ್ಥಾನ ರಾಯಲ್ಸ್ ಪರ ಆರ್ಸಿಬಿ ವಿರುದ್ಧ ಮೊದಲ ಪಂದ್ಯ ಆಡಿದಾಗ ಆರ್ಸಿಬಿ ಮ್ಯಾನೇಜ್ಮೆಂಟ್ನ ಯಾರೊಂದಿಗೂ ಮಾತನಾಡಲಿಲ್ಲ’ ಎಂದು ಚಾಹಲ್ ಹೇಳಿದ್ದಾರೆ. 2022ರಿಂದ ಚಾಹಲ್ ರಾಜಸ್ಥಾನ ರಾಯಲ್ಸ್ ಪರ 6.5 ಕೋಟಿ ರೂ. ಮೊತ್ತದ ಒಪ್ಪಂದಕ್ಕೆ ಆಡುತ್ತಿದ್ದಾರೆ. ಅದಕ್ಕೆ ಮುನ್ನ ಹರಾಜಿನಲ್ಲಿ ಚಾಹಲ್ ಖರೀದಿಗೆ ಮುಂಬೈ, ಡೆಲ್ಲಿ, ಸನ್ರೈಸರ್ಸ್ ಮುಂತಾದ ತಂಡಗಳು ಬಿಡ್ ಸಲ್ಲಿಸಿದರೂ, ಆರ್ಸಿಬಿ ಯಾವುದೇ ಬಿಡ್ ಸಲ್ಲಿಸಿರಲಿಲ್ಲ.
2011ರಲ್ಲಿ ಮುಂಬೈ ಇಂಡಿಯನ್ಸ್ ಪರ ಐಪಿಎಲ್ಗೆ ಪದಾರ್ಪಣೆ ಮಾಡಿದದ ಚಾಹಲ್, 2014ರಲ್ಲಿ ಆರ್ಸಿಬಿ ಸೇರಿದದರು. ಈಗಲೂ ಅವರು ಆರ್ಸಿಬಿ ಪರ ಗರಿಷ್ಠ 139 ವಿಕೆಟ್ ಕಬಳಿಸಿದ ಬೌಲರ್ ಆಗಿದ್ದಾರೆ. “ಆರ್ಸಿಬಿ ತಂಡದಿಂದ ನನ್ನ ವೃತ್ತೀಜಿವನ ಏಳ್ಗೆ ಕಂಡಿತು. ಹೀಗಾಗಿ ತಂಡದ ಮೇಲೆ ನನಗೆ ವಿಶೇಷ ಪ್ರೀತಿ ಇದೆ. ನನಗೆ 15 ಕೋಟಿ ರೂ. ಬಿಡ್ ಮಾಡಬೇಕಿತ್ತು ಎಂದು ಹೇಳುವುದಿಲ್ಲ. ಆದರೆ ನನಗೆ 8 ಕೋಟಿ ರೂ. ನೀಡಿದರೂ ಸಾಕಿತ್ತು. ತಂಡದಲ್ಲಿ ಉಳಿದುಕೊಳ್ಳಲು ನಾನು ಯಾವುದೇ ರ್ನಿದಿಷ್ಟ ಮೊತ್ತದ ಬೇಡಿಕೆಯನ್ನೂ ಇಟ್ಟಿರಲಿಲ್ಲ’ ಎಂದು ಚಾಹಲ್ ವಿವರಿಸಿದ್ದಾರೆ.
ಇದೇ ವೇಳೆ ರಾಜಸ್ಥಾನ ರಾಯಲ್ಸ್ ತಂಡ ಸೇರಿದ ಬಗ್ಗೆ ಯಾವುದೇ ವಿಷಾದ ಹೊಂದಿರದ ಚಾಹಲ್, “ಆರ್ಸಿಬಿ ತಂಡದಲ್ಲಿ ನನ್ನ ಓವರ್ಗಳು 16-17ನೇ ಓವರ್ ವೇಳೆಗೆ ಮುಗಿದಿರುತ್ತಿತ್ತು. ರಾಜಸ್ಥಾನ ತಂಡದಲ್ಲಿ ನಾನು ಡೆತ್ ಓವರ್ ಬೌಲರ್ ಆದೆ. ಇದು ನನ್ನ ವೃತ್ತೀಜಿವನದ ಪ್ರಗತಿಗೆ ಕಾರಣವಾಗಿದೆ. ಆರ್ಸಿಬಿ ಮೇಲಿನ ಪ್ರೀತಿ ಹಾಗೆಯೇ ಇದ್ದರೂ, ರಾಜಸ್ಥಾನ ತಂಡದಿಂದಲೂ ನನ್ನ ಕ್ರಿಕೆಟ್ ಬದುಕಿಗೆ ನೆರವಾಗಿದೆ ಎಂಬುದು ಸತ್ಯ’ ಎಂದಿದ್ದಾರೆ.
ಫುಟ್ಬಾಲ್ ತಾರೆಯಿಂದ ಬೇರ್ಪಟ್ಟ ಬಳಿಕ ಬಾಸ್ಕೆಟ್ಬಾಲ್ ಆಟಗಾರನೊಂದಿಗೆ ಶಕೀರಾ ಡೇಟಿಂಗ್!
ಟೀಮ್ ಇಂಡಿಯಾ ಪದಾರ್ಪಣೆ ಬೆನ್ನಲ್ಲೇ ಬಾಡಿಗೆಯಿಂದ ಸ್ವಂತ ಮನೆಗೆ ಶಿಫ್ಟ್ ಆದ ಯಶಸ್ವಿ ಜೈಸ್ವಾಲ್!
vijayavani.net/muslim-ex-pak-pacer-makes-controversial-claim-ahead-of-odi-world-cup