ಮುಂಬೈ: ಬಾಲಿವುಡ್ನ ಹಿರಿಯ ನಟ ರಿಷಿ ಕಪೂರ್ ಅವರ ಅಂತ್ಯಕ್ರಿಯೆ ಇಲ್ಲಿನ ಚಾಂದವಾಡಿ ಚಿತಾಗಾರದಲ್ಲಿ ಗುರುವಾರ ಸಂಜೆ ನೆರವೇರಿತು. ಪತ್ನಿ ನೀತೂ ಸಿಂಗ್, ಪುತ್ರ ರಣಬೀರ್ ಕಪೂರ್, ಆಲಿಯಾ ಭಟ್, ಕರೀನಾ ಕಪೂರ್ ಖಾನ್, ಸೈಫ್ ಆಲಿ ಖಾನ್, ಅಭಿಷೇಕ್ ಬಚ್ಚನ್ ಸೇರಿ ಬಾಲಿವುಡ್ನ ಅನೇಕ ಗಣ್ಯರಲ್ಲದೆ ಕಪೂರ್ ಕುಟುಂಬದವರು ಅಂತ್ಯಕ್ರಿಯೆಯಲ್ಲಿ ಪಾಲ್ಗೊಂಡಿದ್ದರು.
ಕ್ಯಾನ್ಸರ್ ಜತೆ ಎರಡು ವರ್ಷ ಸೆಣಸಾಡಿದ್ದ ರಿಷಿ ಕಪೂರ್ (67) ಗುರುವಾರ ಬೆಳಗ್ಗೆ ನಿಧನರಾಗಿದ್ದರು.
ಬರಲಾಗದೆ ಪರಿತಪಿಸಿದ ರಿದ್ಧಿಮಾ: ತಮ್ಮ ತಂದೆಯ ಅಂತ್ಯಕ್ರಿಯೆಯಲ್ಲಿ ಪಾಲ್ಗೊಳ್ಳಲು ರಿದ್ಧಿಮಾ ಕಪೂರ್ ಅವರಿಗೆ ವಿಮಾನದಲ್ಲಿ ತೆರಳಲು ವಿಶೇಷ ಅನುಮತಿ ದೊರೆತಿತ್ತು. ಆದರೆ, ಸಮಯಕ್ಕೆ ಸರಿಯಾಗಿ ವಿಮಾನ ವ್ಯವಸ್ಥೆಯಾಗದ ಕಾರಣ ದೆಹಲಿಯಿಂದಲೇ ತಮ್ಮ ತಂದೆಗೆ ಕೊನೆಯ ನಮನ ಸಲ್ಲಿಸಬೇಕಾಯಿತು.