ಗೋಧಿ ಹಿಟ್ಟಿನ ಪ್ಯಾಕೆಟ್‌ಗಳಲ್ಲಿ ಅಮೀರ್ ಖಾನ್ ದುಡ್ಡು ಇಟ್ಟಿದ್ದಾರೆ, ಪ್ರತಿಯೊಬ್ಬರಿಗೂ 15 ಸಾವಿರ ತಲುಪಿಸುತ್ತಿದ್ದಾರೆ … ಎಂಬಂತಹ ಸುದ್ದಿಗಳು ಕಳೆದ ವಾರ ವಿಪರೀತ ಹಬ್ಬಿತ್ತು. ಅಗತ್ಯವಿರುವವರಿಗೆ ಸಹಾಯ ಮಾಡುವ ನಿಟ್ಟಿನಲ್ಲಿ ಅಮೀರ್, ಈ ರೀತಿ ಮಾಡುತ್ತಿದ್ದಾರೆ ಎಂದು ಅವರ ಅಭಿಮಾನಿಗಳು ಪ್ರಚಾರ ಮಾಡಿದ್ದರು. ಸೋಷಿಯಲ್ ಮೀಡಿಯಾದಲ್ಲಂತೂ ಅಮೀರ್ ಖಾನ್ ಅವರನ್ನು ಎಲ್ಲರೂ ಹೊಗಳಿದ್ದೇ ಹೊಗಳಿದ್ದು. ಇಷ್ಟೆಲ್ಲಾ ಆಗುತ್ತಿದ್ದರೂ ಅಮೀರ್ ಮಾತ್ರ ತುಟಿಕ್ ಪಿಟಿಕ್ ಎಂದಿರಲಿಲ್ಲ.
ಇದನ್ನೂ ಓದಿ: ಮೇ 11ರಿಂದ ಧಾರಾವಾಹಿ ಶೂಟಿಂಗ್ ಪ್ರಾರಂಭ?
ಈಗ ಇಡೀ ಪ್ರಕರಣದ ಬಗ್ಗೆ ಅಮೀರ್ ಖಾನ್ ಮೊದಲ ಬಾರಿಗೆ ಮಾತನಾಡಿದ್ದಾರೆ. ದೆಹಲಿಯಲ್ಲಿ ಗೋಧಿ ಪ್ಯಾಕೆಟ್‌ಗಳಲ್ಲಿ 15 ಸಾವಿರ ಇಟ್ಟ ಪ್ರಕರಣಕ್ಕೂ, ತಮಗೂ ಯಾವುದೇ ಸಂಬಂಧವಿಲ್ಲ ಎಂದು ಹೇಳಿಕೊಂಡಿದ್ದಾರೆ.
ಇದನ್ನೂ ಓದಿ: ರಿಷಿ ಕಪೂರ್ಗೆ ನಮನ ಸಲ್ಲಿಸಿದ ನೀತೂ ಮತ್ತು ರಣಬೀರ್ ಕಪೂರ್
ಈ ಕುರಿತು ಪ್ರತಿಕ್ರಿಯಿಸಿರುವ ಅವರು, ‘ಗೋಧಿ ಪ್ಯಾಕೆಟ್‌ಗಳಲ್ಲಿ ದುಡ್ಡಿಟ್ಟು ಅಗತ್ಯವಿರುವವರಿಗೆ ಕಳಿಸಿದ್ದು ನಾನಲ್ಲ. ಒಂದೋ ಇದು ಸುಳ್ಳು ಸುದ್ದಿ ಇರಬೇಕು, ಇಲ್ಲ ಹೆಸರು ಬಹಿರಂಗಪಡಿಸದ ಯಾರೋ ರಾಬಿನ್ ಹುಡ್ ಈ ತರಹ ಕೆಲಸ ಮಾಡಿರಬೇಕು. ಇದಕ್ಕೂ ನನಗೂ ಸಂಬಂಧವೇ ಇಲ್ಲ’ ಎಂದು ಸ್ಪಷ್ಟಪಡಿಸಿದ್ದಾರೆ. ಹಾಗಾದರೆ, ಗೋಧಿ ಪ್ಯಾಕೆಟ್‌ಗಳಲ್ಲಿ ದುಡ್ಡಿಟ್ಟು, ಬಡವರಿಗೆ ಹಂಚಿದ್ದು ಯಾರು? ಈ ಪ್ರಶ್ನೆಗೆ ಇನ್ನಷ್ಟೇ ಉತ್ತರ ಸಿಗಬೇಕಿದೆ.
ಅಮೀರ್ ಖಾನ್ ದುಡ್ಡು ಹಂಚಿದರೋ ಇಲ್ಲವೋ ಗೊತ್ತಿಲ್ಲ. ಆದರೆ, ಕೋವಿಡ್-19 ವಿರುದ್ಧ ಸಮರಕ್ಕೆ ತಮ್ಮದೇ ರೀತಿಯಲ್ಲಿ ಪಿಎಂ ಕೇರ್ಸ್ ಸೇರಿದಂತೆ ತಮ್ಮದೇ ರೀತಿಯಲ್ಲಿ ಸಹಾಯ ಮಾಡಿದ್ದಾರೆ. ಅಷ್ಟೇ ಅಲ್ಲ, ಯಾರಿಗೆ, ಎಷ್ಟು ಕೊಟ್ಟೆ ಎಂಬ ವಿಷಯವನ್ನು ರಹಸ್ಯವಾಗಿಯೇ ಇಟ್ಟಿದ್ದಾರೆ ಎನ್ನುವುದು ವಿಶೇಷ.