ಸ್ಯಾನ್ ಫ್ರಾನ್ಸಿಸ್ಕೋ: ಪ್ರಸಿದ್ಧ ಅಮೇಜಾನ್ ಸಂಸ್ಥೆಯ ಸಂಸ್ಥಾಪಕ ಮತ್ತು ಮುಖ್ಯಸ್ಥ ಜೆಫ್ ಬೆಜೋಸ್ ವಿರುದ್ಧ ಮಾನನಷ್ಟ ಮೊಕದ್ದಮೆಯನ್ನು ಹಾಕಲಾಗಿದೆ. ಪ್ರಪಂಚದ ಶ್ರೀಮಂತರ ಪಟ್ಟಿಯಲ್ಲಿ ನಂಬರ್ 1 ಸ್ಥಾನದಲ್ಲಿರುವ ಜೆಫ್ನ ವಿರುದ್ಧ ಹೀಗೊಂದು ಮೊಕದ್ದಮೆಯನ್ನು ಹೂಡಿರುವುದು ಆತನ ಗೆಳತಿಯ ಸ್ವಂತ ಅಣ್ಣನೇ ಎನ್ನುವುದು ವಿಚಿತ್ರ.
ಜೆಫ್ ಬೆಜೋಸ್, ಲಾರೆನ್ ಹೆಸರಿನ ಯುವತಿಯೊಂದಿಗೆ ಡೇಟಿಂಗ್ ಮಾಡುತ್ತಿದ್ದರಂತೆ. ಹಾಗಂತ ಅಮೆರಿಕದ ನ್ಯಾಷನಲ್ ಎನ್ಕೈರರ್ (ಎನ್.ಇ) ಪತ್ರಿಕೆ 2019ರ ಜನವರಿಯಲ್ಲಿ ವಿಶೇಷ ವರದಿಯನ್ನು ಮಾಡಿತ್ತು. ಜೆಫ್ ಬೆಜೋಸ್ ಮತ್ತು ಲಾರೆನ್ ನಡುವೆ ರವಾನೆಯಾಗಿದ್ದ ಸಂದೇಶಗಳ ಸ್ಕ್ರೀನ್ಶಾಟ್ ಹಾಗೂ ಅವರಿಬ್ಬರು ಜತೆಗಿರುವ ಫೋಟೋಗಳನ್ನು ಸಹ ಎನ್.ಇ. ಬಹಿರಂಗಪಡಿಸಿತ್ತು. ಇದರಿಂದಾಗಿ ನನಗೆ ಸಮಾಜದಲ್ಲಿ ಮಾನ ಹೋಗಿದೆ. ಎಫ್ಬಿಐ ಕೂಡ ದಾಳಿ ಮಾಡಿದೆ ಎಂದು ಲಾರೆನ್ನ ಅಣ್ಣ ಮೈಕೆಲ್ ಸ್ಯಾಂಚೆಸ್ ದೂರು ದಾಖಲಿಸಿದ್ದಾರೆ.
ಜೆಫ್ ಬೆಜೋಸ್ ಎನ್.ಇ.ಗೆ ಸಂದೇಶಗಳ ಸ್ಕ್ರೀನ್ಶಾಟ್ ಮತ್ತು ಫೋಟೋಗಳನ್ನು ಮಾರಿದ್ದು, ಅವರಿಂದ 2,00,000 ಮಿಲಿಯನ್ ಡಾಲರ್ ಹಣ ಪಡೆದಿದ್ದಾನೆ ಎಂದು ಮೈಕೆಲ್ ದೂರಿದ್ದಾನೆ. ಆದರೆ ಈ ಕುರಿತಾಗಿ ಜೆಫ್ ಬೆಜೋಸ್ ಮಾತ್ರ ಯಾವುದೇ ಪ್ರತಿಕ್ರಿಯೆಯನ್ನು ನೀಡಿಲ್ಲ.
ಒಂದು ವರ್ಷದ ಹಿಂದೆ ಪ್ರಕಟವಾಗಿದ್ದ ಜೆಫ್ ಬೆಜೋಸ್ ಲವ್ ಸ್ಟೋರಿಗೆ ಕಳೆದ ವಾರ ಹೊಸದೊಂದು ಟ್ವಿಸ್ಟ್ ಸಿಕ್ಕಿದೆ. ಲಾರೆನ್ ತನ್ನ ಮತ್ತು ಜೆಫ್ ನಡುವಿನ ಗುಪ್ತ ಸಂದೇಶಗಳನ್ನು ತನ್ನಣ್ಣನಿಗೆ ನೀಡಿದ್ದು, ಆತನೇ ಅದನ್ನು ಎನ್.ಇ.ಗೆ ಮಾರಿದ್ದಾನೆ ಎಂದು ವಾಲ್ ಸ್ಟ್ರೀಟ್ ಜರ್ನಲ್ ಪತ್ರಿಕೆ ಪ್ರಕಟಿಸಿದೆ. ಅದಕ್ಕೆ ಆತ ಸಾಕಷ್ಟು ಹಣ ಪಡೆದಿದ್ದಾನೆ. ಇದಕ್ಕೆ ಫೆಡರಲ್ ಪ್ರಾಸಿಕ್ಯೂಟರ್ಗಗಳ ಬಳಿ ಪುರಾವೆಯೂ ಇವೆ ಎಂದು ಸಹ ಹೇಳಲಾಗಿದೆ.
ಈ ರೀತಿಯ ಸುದ್ದಿಯೊಂದು ಹೊರ ಬೀಳುತ್ತಿದ್ದಂತೆಯೇ ಮೈಕೆಲ್, ಜೆಫ್ ವಿರುದ್ಧ ಮಾನನಷ್ಟ ಮೊಕದ್ದಮೆ ಹಾಕಿದ್ದಾನೆ. ಈ ವಿಚಾರವಾಗಿ ಲಾರೆನ್ ತನ್ನ ಅಣ್ಣನ ಬಗ್ಗೆ ಅಸಮಾಧಾನ ವ್ಯಕ್ತ ಪಡಿಸಿದ್ದಾಳೆ ಎನ್ನಲಾಗಿದೆ. (ಏಜೆನ್ಸೀಸ್)