‘ಹಲವು ನಿರ್ದೇಶಕರು ಹಲವು ಹೀರೋಗಳನ್ನು ಹುಟ್ಟುಹಾಕಿದ್ದಾರೆ. ವಿಲನ್ಗಳನ್ನು ಯಾರಾದರೂ ಹುಟ್ಟುಹಾಕುತ್ತಾರೆ ಎಂದರೆ ಅದು ಹರ್ಷ ಮಾತ್ರ ...’ ಶ್ರುತಿ ಹಾಗೆ ಹೇಳುವುದಕ್ಕೂ ಕಾರಣವಿದೆ. ಹೊಸಹೊಸ ವಿಲನ್ಗಳನ್ನು ಪರಿಚಯ ಮಾಡುವುದರಲ್ಲಿ ಹರ್ಷ ಬಹಳ ಜನಪ್ರಿಯರು. ‘ಭಜರಂಗಿ 2’ ಚಿತ್ರದ ಮೂಲಕ ಅವರು ಮೂವರು ಹೊಸ ವಿಲನ್ಗಳನ್ನು ಪರಿಚಯ ಮಾಡಿದ್ದಾರೆ. ಅದರ ಜತೆಗೆ, ನಾಯಕಿಯಾಗಿದ್ದ ಶ್ರುತಿ ಅವರನ್ನೂ ವಿಲನ್ ಆಗಿ ಪರಿಚಯಿಸುತ್ತಿದ್ದಾರೆ. ವಿಭಿನ್ನ ಗೆಟಪ್, ಕೈಯಲ್ಲೊಂದು ಚುಟ್ಟ, ಹೆದರಿಸುವಂತಹ ಮುಖಭಾವ ... ನಿಜಕ್ಕೂ ಅದು ಶ್ರುತಿ ಅವರೇನಾ? ಎಂದು ಪ್ರಶ್ನಿಸುವಂತಿದೆ. ‘ಹರ್ಷ ನನಗೆ ಈ ಪಾತ್ರದ ಬಗ್ಗೆ ಹೇಳಿದಾಗ, ಈ ತರಹದ್ದೊಂದು ಪಾತ್ರವನ್ನು ನಾನು ಮಾಡಬೇಕು ಎಂಬ ಕಲ್ಪನೆ ಯಾಕೆ ಬಂತು ಎಂದು ಕೇಳಿದೆ. ನೀವು ಮಾಡಿದರೆ ವಿಭಿನ್ನವಾಗಿರುವುದರಿಂದ ನೀವೇ ಮಾಡಬೇಕು ಎಂದರು. ಏನೋ ಧೈರ್ಯ ಮಾಡಿ ಈ ಚಿತ್ರವನ್ನು ಒಪ್ಪಿಕೊಂಡುಬಿಟ್ಟೆ. ಪಾತ್ರ ಖಡಕ್ ಆಗಿರುತ್ತದೆ ಎಂದು ಹರ್ಷ ಹೇಳಿದ್ದರು. ಆದರೆ, ಈ ತರಹದ ಎಫೆಕ್ಟ್ಗಳಿರುತ್ತದೆ ಎಂದು ಹೇಳಿರಲಿಲ್ಲ. ಮನೆಗೆ ಅಡ್ವಾನ್ಸ್ ಬರುತ್ತದೆ ಎಂದುಕೊಂಡಿದ್ದೆ. ಒಂದು ಕವರ್ ಬಂತು. ಅದರಲ್ಲಿ ಚುಟ್ಟ ಕಳಿಸಿದ್ದರು. ದಯವಿಟ್ಟು ಚಿತ್ರಕ್ಕಾಗಿ ಅಭ್ಯಾಸ ಮಾಡಿ ಎಂದು ಹೇಳಿದರು’ ಎಂದು ನೆನಪಿಸಿಕೊಳ್ಳುತ್ತಾರೆ ಶ್ರುತಿ.
