ಮುಂಬೈ: ಜಾಗತಿಕವಾಗಿ ಮೃತ್ಯುಕೂಪ ನಿರ್ಮಿಸಿರುವ ಮಹಾಮಾರಿ ಕರೊನಾ ಭಾರತದಲ್ಲೂ ಮರಣ ಮೃದಂಗ ಬಾರಿಸುತ್ತಿದ್ದು, ಮಹಾರಾಷ್ಟ್ರ ಸೋಂಕಿತರ ಸಂಖ್ಯೆಯಲ್ಲಿ ನಂಬರ್ 2 ಸ್ಥಾನದಲ್ಲಿದೆ. ಹೀಗಿರುವಾಗ ಬಾಲಿವುಡ್ ನಟಿಯೊಬ್ಬರು ಸೋಂಕಿನ ವಿರುದ್ಧ ಹೋರಾಡಲು ನರ್ಸ್ ಸೇವೆಯನ್ನು ಆರಂಭಿಸುವ ಮೂಲಕ ಮೆಚ್ಚುಗೆಗೆ ಪಾತ್ರರಾಗಿದ್ದಾರೆ.
ಭಾರತೀಯ ಸಿನಿಮಾ ರಂಗದ ಪ್ರಸಿದ್ಧ ಹಿರಿಯ ನಟ ಸಂಜಯ್ ಮಿಶ್ರಾ ಅವರೊಟ್ಟಿಗೆ “ಕಾಂಚ್ಲಿ” ಚಿತ್ರದಲ್ಲಿ ಜತೆಯಾಗಿ ನಟಿಸಿರುವ ನಟಿ ಶಿಖಾ ಮೆಲ್ಹೋತ್ರಾ ಮಹಾರಾಷ್ಟ್ರದ ಆಸ್ಪತ್ರೆಯೊಂದರಲ್ಲಿ ನರ್ಸ್ ಆಗಿ ಸೇವೆ ಸಲ್ಲಿಸುತ್ತಿದ್ದಾರೆ. ನರ್ಸ್ ಯೂನಿಫಾರ್ಮ್ ತೊಟ್ಟಿರುವ ಫೋಟೋವನ್ನು ಶಿಖಾ ಅವರು ಇನ್ಸ್ಟಾಗ್ರಾಂನಲ್ಲಿ ಹಂಚಿಕೊಂಡಿದ್ದಾರೆ. ಸಿನಿಮಾ ಇಂಡಸ್ಟ್ರಿಗೆ ಬರುವ ಮುನ್ನ ನರ್ಸಿಂಗ್ ಕೋರ್ಸ್ ಮಾಡಿದ್ದ ಶಿಖಾ, ಇದೀಗ ಕರೊನಾ ವಿರುದ್ಧ ಹೋರಾಡಿ ಜನರ ಸೇವೆ ಬಳಸಿಕೊಳ್ಳುವ ಮೂಲಕ ಸಾರ್ಥಕತೆ ಮೆರೆಯುತ್ತಿದ್ದಾರೆ.
ಮುಂಬೈನ ಜೋಗೇಶ್ವರಿ ಈಸ್ಟ್ನಲ್ಲಿರುವ ಬಾಳಾಸಾಹೇಬ್ ಠಾಕ್ರೆ ಟ್ರಾಮಾ ಆಸ್ಪತ್ರೆಯಲ್ಲಿ ಸೇವೆ ಸಲ್ಲಿಸುತ್ತಿದ್ದಾರೆ. ಶಿಖಾ ಅವರು 2014ರಲ್ಲಿ ದೆಹಲಿಯ ವರ್ಧಮಾನ್ ಮಹಾವೀರ್ ಮೆಡಿಕಲ್ ಕಾಲೇಜಿನಲ್ಲಿ ನರ್ಸಿಂಗ್ ಕೋರ್ಸ್ ಮುಗಿಸಿದರು. ಆದರೆ, ಸಿನಿಮಾದೆಡಗಿನ ಅವರ ತುಡಿತ ಬಾಲಿವುಡ್ಗೆ ಕಾಲಿಡುವಂತೆ ಮಾಡಿತು. ಆದರೆ ಕರೊನಾದಂತಹ ತುರ್ತು ಪರಿಸ್ಥಿತಿಯಲ್ಲಿ ಸುಮ್ಮನೇ ಕೂರದ ಶಿಖಾ ತಾನು ಕಲಿತದ್ದು ಇತರರಿಗೆ ಉಪಯೋಗವಾಗಲಿ ಎಂದು ನರ್ಸ್ ಯೂನಿಫಾರ್ಮ್ ಧರಿಸಿ ಕರೊನಾ ವಿರುದ್ಧದ ರಣರಂಗಕ್ಕೆ ಪ್ರವೇಶ ನೀಡಿದ್ದಾರೆ.
ನರ್ಸಿಂಗ್ ತರಬೇತಿ ಮುಗಿಸಿದ ಬಳಿಕ ಸಮಾಜಕ್ಕೆ ಸೇವೆ ಸಲ್ಲಿಸುವೆ ಎಂದು ವಾಗ್ದಾನ ಮಾಡಿದ್ದೆ. ಅದಕ್ಕೆ ಈಗ ಸೂಕ್ತ ಸಮಯ ಅನಿಸುತ್ತಿದೆ ಎಂದು ಇನ್ಸ್ಟಾಗ್ರಾಂನಲ್ಲಿ ಶಿಖಾ ಬರೆದುಕೊಂಡಿದ್ದಾರೆ. ಸಂದಿಗ್ಧ ಸಮಯದಲ್ಲಿ ಜನತೆಗೆ ನೆರವಾದ ಶಿಖಾಗೆ ಮೆಚ್ಚುಗೆಯ ಮಹಾಪೂರ ಹರಿದುಬರುತ್ತಿದೆ.
ಸದ್ಯ ದೇಶದಲ್ಲಿ ದಿನೇ ದಿನೇ ಕರೊನಾ ಸೋಂಕಿತರ ಸಂಖ್ಯೆ ಹೆಚ್ಚಾಗುತ್ತಿದ್ದು, 900ರ ಸಮೀಪಕ್ಕೆ ಬಂದಿದೆ. ಒಟ್ಟು 21 ಮಂದಿ ಬಲಿಯಾಗಿದ್ದಾರೆ. ವಿಶ್ವಾದ್ಯಂತ ಸೋಂಕಿತರ ಸಂಖ್ಯೆ 6 ಲಕ್ಷ ಸಮೀಪಕ್ಕೆ ಬಂದಿದೆ. 27 ಸಾವಿರಕ್ಕೂ ಹೆಚ್ಚು ಮಂದಿ ಸಾವಿಗೀಡಾಗಿದ್ದಾರೆ. (ಏಜೆನ್ಸೀಸ್)
ಲಸಿಕೆ ಕಂಡುಹಿಡಿಯಬೇಕಾದರೆ ಆರೋಗ್ಯಯುತ ಸ್ವಯಂಪ್ರೇರಿತರು ಕರೊನಾ ಸೋಂಕಿಗೆ ಒಳಗಾಗಲೇಬೇಕೆಂದ ವಿಜ್ಞಾನಿಗಳು