ನವದೆಹಲಿ: ನೌಕಾಪಡೆಗಾಗಿ 24 ಅತ್ಯಾಧುನಿಕ ಜಲಾಂತರ್ಗಾಮಿ ವಿರೋಧಿ ಯುದ್ಧ ಹೆಲಿಕಾಪ್ಟರ್ಗಳನ್ನು ಖರೀದಿಸುವ ಪ್ರಕ್ರಿಯೆಗೆ ಭಾರತ ಚಾಲನೆ ನೀಡಿದೆ. ಲಾಕ್ಹೀಡ್ ಮಾರ್ಟಿನ್ ಕಂಪನಿಯಿಂದ ಎಂಎಚ್-60ಆರ್ ಹೆಲಿಕಾಪ್ಟರ್ಗಳನ್ನು ಭಾರತ ಖರೀದಿ ಮಾಡಲಿದೆ.
1971ರಲ್ಲಿ ಬ್ರಿಟನ್ನಿಂದ ಖರೀದಿಸಿದ್ದ ಸೀ ಕಿಂಗ್ ಹೆಲಿಕಾಪ್ಟರ್ಗಳನ್ನೇ ಭಾರತೀಯ ನೌಕಾಪಡೆ ಇಷ್ಟು ವರ್ಷ ಉನ್ನತೀಕರಿಸಿ ಬಳಸುತ್ತಿತ್ತು. ಈಗ ಅಮೆರಿಕದ ಎಂಎಚ್-60ಆರ್ ಹೆಲಿಕಾಪ್ಟರ್ಗಳು ಈ ಸ್ಥಾನ ತುಂಬಲಿವೆ. ಹಿಂದು ಮಹಾಸಾಗರದಲ್ಲಿ ಚೀನಾ ಮತ್ತು ಪಾಕಿಸ್ತಾನದ ಜಲಾಂತರ್ಗಾಮಿಗಳು ಹಾಗೂ ಯುದ್ಧ ನೌಕೆಗಳ ಮೇಲೆ ಇವು ನಿಗಾ ವಹಿಸಲಿವೆ.
ಇದನ್ನೂ ಓದಿ ಲಾಕ್ಡೌನ್ 4.0: ಕೇಂದ್ರದ ಮಾರ್ಗಸೂಚಿ ಶನಿವಾರ ಪ್ರಕಟ ನಿರೀಕ್ಷೆ- ಏನಿರುತ್ತೆ ಹೊಸ ನಿಯಮದಲ್ಲಿ?
ಕಳೆದ ವರ್ಷ ಏಪ್ರಿಲ್ನಲ್ಲಿ ಅಮೆರಿಕ ಭಾರತಕ್ಕೆ 2.6 ಬಿಲಿಯನ್ ಡಾಲರ್ ಮೌಲ್ಯದ ಶಸ್ತಾಸ್ತ್ರ ಖರೀದಿಗೆ ಒಪ್ಪಿಗೆ ನೀಡಿತ್ತು. ಪ್ರಸ್ತುತ ಖರೀದಿಸುತ್ತಿರುವ ಹೆಲಿಕಾಪ್ಟರ್ಗಳು 905 ಮಿಲಿಯನ್ ಡಾಲರ್ನದ್ದಾಗಿದ್ದು, ಇದು ಒಪ್ಪಂದದ ಒಟ್ಟು ಮೊತ್ತದ ಅರ್ಧಕ್ಕಿಂತ ಕಡಿಮೆ ಇದೆ. 2.6 ಬಿಲಿಯನ್ ಒಪ್ಪಂದದಲ್ಲಿ ವಿವಿಧ ಯುದ್ಧ ಹೆಲಿಕಾಪ್ಟರ್ಗಳು, ಅವುಗಳ ಸೆನ್ಸರ್ ಮತ್ತು ಸಂವಹನ ವ್ಯವಸ್ಥೆ, ಹಡಗುಗಳ ಮೇಲೆ ದಾಳಿ ನಡೆಸಬಲ್ಲ ಹೆಲ್ಫೈರ್ ಕ್ಷಿಪಣಿ, ಎಂಕೆ 54 ಟಾರ್ಪಿಡೊ ಮತ್ತು ಸ್ಟ್ರೈಕ್ ರಾಕೆಟ್ ವ್ಯವಸ್ಥೆ ಇನ್ನೂ ಅತ್ಯಾಧುನಿಕ ಶಸ್ತ್ರಾಸ್ತ್ರಗಳು ಸೇರಿವೆ. ಇದರಲ್ಲಿ ಮೊದಲ ಭಾಗವಾಗಿ ಎಂಎಚ್-60ಆರ್ ಹೆಲಿಕಾಪ್ಟರ್ಗಳನ್ನು ಖರೀದಿಸಲಾಗುತ್ತಿದೆ. ಎನ್ಎಸ್ಎಂ ಕ್ಷಿಪಣಿ ಮೂಲಕ ಈ ಹೆಲಿಕಾಪ್ಟರ್ಗಳು 185 ಕಿ.ಮೀ ವ್ಯಾಪ್ತಿವರೆಗೂ ದಾಳಿ ನಡೆಸುವ ಸಾಮರ್ಥ್ಯ ಪಡೆಯುತ್ತವೆ.
ಅಮೆರಿಕದ ನೌಕಾಪಡೆ ಮೂಲಕ ಒಪ್ಪಂದ ಪ್ರಕ್ರಿಯೆ ನಡೆಸಲಾಗುತ್ತಿದ್ದು, ಸದ್ಯ ಮೂರು ಎಂಎಚ್-60 ಆರ್ ಹೆಲಿಕಾಪ್ಟರ್ಗಳ ಹಸ್ತಾಂತರ ಪ್ರಕ್ರಿಯೆಯನ್ನು ವೇಗಗೊಳಿಸಲು ಲಾಕ್ಹೀಡ್ ಮಾರ್ಟಿನ್ ಕಂಪನಿಗೆ ಅಮೆರಿಕ ಅನುಮತಿ ನೀಡಿದೆ. ಇದರ ಜತೆಗೆ ಭಾರತೀಯ ನೌಕಾಪಡೆಯ ಪೈಲಟ್ಗಳು ಹಾಗೂ ಇಂಜಿನಿಯರ್ಗಳಿಗೆ ಈ ಹೆಲಿಕಾಪ್ಟರ್ಗಳು, ಕ್ಷಿಪಣಿ ಸೇರಿ ಖರೀದಿ ಒಪ್ಪಂದದಲ್ಲಿರುವ ವಿವಿಧ ಶಸ್ತ್ರಾಸ್ತ್ರಗಳ ಬಳಕೆ ಬಗ್ಗೆ ಸಂಪೂರ್ಣ ತರಬೇತಿ ನೀಡಲಾಗುತ್ತದೆ. ಯೋಜನೆ ಅಂದುಕೊಂಡಂತೆ ಸಾಗಿದರೆ ಮುಂದಿನ ವರ್ಷ ಅಮೆರಿಕದಿಂದ ಎಂಎಚ್-60 ಆರ್ ಹೆಲಿಕಾಪ್ಟರ್ಗಳ ಮೊದಲ ಬ್ಯಾಚ್ ಭಾರತಕ್ಕೆ ಹಸ್ತಾಂತರವಾಗಲಿದೆ.
ಮುತ್ತಪ್ಪ ರೈ ಸಾವಿಗೆ ಒಂದು ದಿನ ಮೊದಲು ಕುತೂಹಲ ಕೆರಳಿಸಿದ ಡಾನ್ ಜಯರಾಜ್ ಪುತ್ರನ ಟ್ವೀಟ್