ನವದೆಹಲಿ : ನಕಲಿ ಬ್ಲ್ಯಾಕ್ ಫಂಗಸ್ ಚುಚ್ಚುಮದ್ದನ್ನು ತಯಾರಿಸುವ ಮತ್ತು ಮಾರುವ ಜಾಲವೊಂದನ್ನು ದೆಹಲಿ ಅಪರಾಧ ವಿಭಾಗ ಪೊಲೀಸರು ಪತ್ತೆ ಹಚ್ಚಿದ್ದಾರೆ. ಇಬ್ಬರು ವೈದ್ಯರೂ ಸೇರಿದಂತೆ 10 ಜನರನ್ನು ಈ ಪ್ರಕರಣದಲ್ಲಿ ಬಂಧಿಸಲಾಗಿದೆ. ಓರ್ವ ಆರೋಪಿಯ ಮನೆಯಲ್ಲಿ, 3,293 ವಯಲ್ಗಳಷ್ಟು ಚುಚ್ಚುಮದ್ದನ್ನು ಜಪ್ತಿಪಡಿಸಿಕೊಳ್ಳಲಾಗಿದೆ.
ಬ್ಲ್ಯಾಂಕ್ ಫಂಗಸ್ ನಿವಾರಣೆಗೆ ಬಳಸುವ ಲಿಪೊಸೋಮಲ್ ಆ್ಯಂಫೊಟೆರಿಸಿನ್-ಬಿ ಇಂಜೆಕ್ಷನ್ಗಳ ನಕಲಿ ದಂಧೆ ನಡೆಯುತ್ತಿದೆ ಎಂದು ಜೂನ್ 7 ರಂದು ಡ್ರಗ್ ಕಂಟ್ರೋಲ್ ಇಲಾಖೆ ದೂರು ನೀಡಿತ್ತು. ತನಿಖೆ ಕೈಗೆತ್ತಿಕೊಂಡ ಪೊಲೀಸರಿಗೆ 10 ಜನರ ಗ್ಯಾಂಗ್ ಒಂದು ಈ ಕೆಲಸದಲ್ಲಿ ತೊಡಗಿರುವುದು ಕಂಡುಬಂತು.
ಇದನ್ನೂ ಓದಿ: ಮನೆಯಲ್ಲಿ ಆಟವಾಡುವಾಗ ಇಲಿ ಪಾಷಾಣ ತಿಂದು ಹೆಣ್ಣು ಮಗು ದುರಂತ ಸಾವು
ಈ ಸಂಬಂಧವಾಗಿ ನಿನ್ನೆ ನಿಜಾಮುದ್ದೀನ್ ವೆಸ್ಟ್ ಪ್ರದೇಶದಲ್ಲಿ ಆರೋಪಿ ಡಾ. ಅಲ್ತಮಸ್ ಹುಸೈನ್ ಮನೆಗೆ ದಾಳಿ ನಡೆಸಲಾಯಿತು. ಆಗ ದೊಡ್ಡ ಪ್ರಮಾಣದಲ್ಲಿ ಬ್ಲ್ಯಾಕ್ ಫಂಗಸ್ ಚಿಕಿತ್ಸೆಗೆ ಬಳಸುವ ಔಷಧ ಮತ್ತು ಅಲ್ಪಪ್ರಮಾಣದಲ್ಲಿ ಕರೊನಾ ಚಿಕಿತ್ಸೆಗೆ ಬಳಸುವ ರೆಮ್ಡೆಸಿವಿರ್ ಇಂಜೆಕ್ಷನ್ಗಳನ್ನು ಶೇಖರಿಸಿಟ್ಟಿರುವುದು ಕಂಡುಬಂತು. ಅವುಗಳಲ್ಲಿ ಹಲವು ಎಕ್ಸ್ಪೈರಿ ಡೇಟ್ ಮೀರಿದವಾಗಿದ್ದವು ಎಂದು ಡಿಸಿಪಿ ಮೋನಿಕಾ ಭರದ್ವಾಜ್ ಹೇಳಿದ್ದಾರೆ.
ಆರೋಪಿಗಳು ಈವರೆಗೆ 400 ನಕಲಿ ಇಂಜೆಕ್ಷನ್ಗಳನ್ನು ಮಾರಿದ್ದಾರೆ. 250 ರೂ.ಗಳ ಬೆಲೆಯುಳ್ಳ ಔಷಧವನ್ನು 12,000 ರೂ.ಗಳವರೆಗೆ ಹಣ ಪಡೆದು ಮಾರುತ್ತಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ. ಬಂಧನಕ್ಕೊಳಗಾಗಿರುವ ಆರೋಪಿಗಳಲ್ಲಿ ಇಬ್ಬರು ವೈದ್ಯರಿದ್ದು, ಅವರ ಮೆಡಿಕಲ್ ಡಿಗ್ರಿಗಳೂ ನಕಲಿಯಾಗಿರಬಹುದೇ ಎಂದು ಪರಿಶೀಲನೆ ನಡೆದಿದೆ. (ಏಜೆನ್ಸೀಸ್)