ಹಿರೇಕೆರೂರ: ಬಡಮಕ್ಕಳಿಗೆ ಗುಣಮಟ್ಟದ ಶಿಕ್ಷಣ ನೀಡುವುದರ ಜತೆಗೆ ಬಿಸಿಯೂಟ ಮತ್ತಿತರ ಹಲವು ಸೌಲಭ್ಯಗಳನ್ನು ಕಲ್ಪಿಸಲಾಗಿದೆ. ವಿದ್ಯಾರ್ಥಿಗಳು ಇದರ ಲಾಭ ಪಡೆದು, ಉನ್ನತ ಶ್ರೇಣಿಯಲ್ಲಿ ತೇರ್ಗಡೆ ಹೊಂದಬೇಕು ಎಂದು ಎಸ್ಡಿಎಂಸಿ ಉಪಾಧ್ಯಕ್ಷ ಶಂಕ್ರಪ್ಪ ಅಂಗಡಿ ಹೇಳಿದರು.
ಪಟ್ಟಣದ ಸರ್ಕಾರಿ ಕನ್ನಡ ಮಾಧ್ಯಮ ಪ್ರೌಢಶಾಲೆಯಲ್ಲಿ 8ರಿಂದ 10ನೇ ತರಗತಿ ಮಕ್ಕಳಿಗೆ ಗುರುವಾರ ಮಧ್ಯಾಹ್ನ ಬಿಸಿಯೂಟದ ಆಹಾರ ಧಾನ್ಯ ಮತ್ತು ಪಠ್ಯ ಪುಸ್ತಕ ವಿತರಿಸಿ ಅವರು ಮಾತನಾಡಿದರು.
ಈ ಬಾರಿ ಕರೊನಾ ವೈರಸ್ ಭೀತಿ ಇರುವುದರಿಂದ ಶಾಲೆ ಆರಂಭವಾಗುವವರೆಗೆ ಮಕ್ಕಳು ಮನೆಯಲ್ಲಿದ್ದು ವಿದ್ಯಾಭ್ಯಾಸ ಮಾಡಬೇಕು. ವಿನಾಕಾರಣ ಹೊರಗೆ ಸಂಚರಿಸಬಾರದು ಎಂದರು.
ಎಸ್ಡಿಎಂಸಿ ಸದಸ್ಯ ಕಲ್ಲಪ್ಪ ಬನ್ನಿಹಟ್ಟಿ, ಕಾಲೇಜ್ ಸಿಡಿಸಿ ಸಮಿತಿ ಉಪಾಧ್ಯಕ್ಷ ಸಿ.ಬಿ. ಮಾಳಗಿ, ಸದಸ್ಯ ರಾಮು ಮುರಡೇಶ್ವರ, ಮುಖ್ಯಶಿಕ್ಷಕ ಎನ್. ಸುರೇಶಕುಮಾರ ಹಾಗೂ ಶಿಕ್ಷಕರು, ಮಕ್ಕಳು ಇದ್ದರು.
ನಿಡನೇಗಿಲು ಶಾಲೆಯಲ್ಲಿ ವಿತರಣೆ: ಹಿರೇಕೆರೂರ ತಾಲೂಕಿನ ನಿಡನೇಗಿಲು ಪ್ಲಾಟಿನ ಸರ್ಕಾರಿ ಕನ್ನಡ ಕಿರಿಯ ಪ್ರಾಥಮಿಕ ಶಾಲೆಯಲ್ಲಿ ಮಕ್ಕಳಿಗೆ ಅಕ್ಕಿ, ಬೇಳೆ ಹಾಗೂ ಪಠ್ಯ ಪುಸ್ತಕಗಳನ್ನು ಗುರುವಾರ ವಿತರಿಸಲಾಯಿತು. ಎಸ್ಡಿಎಂಸಿ ಸದಸ್ಯ ಕಲ್ಲಪ್ಪ ಕುರಿಯವರ, ಗುರುನಾಥ ಹಾರೋಗೊಪ್ಪದ, ಸುಭಾಸ ಭೋವಿ, ಖಾಜಿಸಾಬ್ ಗುಂಡಗಟ್ಟಿ, ಹನುಮಂತಪ್ಪ ಹಲಗೇರಿ, ಶಿಕ್ಷಕ ಎಂ.ಎಂ. ಮತ್ತೂರ ಇದ್ದರು.