ಸಿದ್ದಾಪುರ: ಬೆಂಗಳೂರಿನಲ್ಲಿ ಕೆಲಸ ಮಾಡುತ್ತಿರುವ ಅನೇಕ ಸಾಫ್ಟ್ವೇರ್ ಉದ್ಯೋಗಿಗಳು ಕರೊನಾ ಲಾಕ್ಡೌನ್ನಿಂದ ಹಳ್ಳಿ ಸೇರಿದ್ದಾರೆ. ಆದರೂ, ‘ವರ್ಕ್ ಫ್ರಂ ಹೋಮ್ (ಮನೆಯಲ್ಲೇ ಇದ್ದುಕೊಂಡು ಕಚೇರಿ ಕೆಲಸ ಮಾಡುವುದು) ಮಾತ್ರ ಮುಂದುವರಿದಿದೆ. ಆದರೆ, ಮೊಬೈಲ್ಫೋನ್ ಸಿಗ್ನಲ್ ಕೊರತೆಯಿಂದ ಇವರು ‘ವರ್ಕ್ ಫ್ರಂ ಹಿಲ್’ ಎನ್ನುವಂತಹ ಪರಿಸ್ಥಿತಿ ತಲೆದೋರಿದೆ.
‘ವರ್ಕ್ ಫ್ರಂ ಹೋಮ್ ಮಾಡಲು ಮೊಬೈಲ್ಫೋನ್ ಸಿಗ್ನಲ್, ಇಂಟರ್ನೆಟ್ ಅತ್ಯಗತ್ಯ. ಆದರೆ, ಇಲ್ಲಿನ ಗ್ರಾಮೀಣದ ಪ್ರದೇಶದ ಮನೆಗಳಲ್ಲಿ ಇವರ ಕೆಲಸದ ವೇಗಕ್ಕೆ ಬೇಕಾಗುವ 4ಜಿ ಸಿಗ್ನಲ್ ಲಭ್ಯವಾಗುತ್ತಿಲ್ಲ. ಈ ಸಿಗ್ನಲ್ ಹುಡುಕಿಕೊಂಡು ಗುಡ್ಡ ಬೆಟ್ಟ ಅಲೆಯುವ ಸ್ಥಿತಿ ಬಂದಿದೆ.
ಸ್ಥಿರ ದೂರವಾಣಿ, ಬಿಎಸ್ಎನ್ಎಲ್ ಹಾಗೂ ವಿವಿಧ ಖಾಸಗಿ ಕಂಪನಿ ಮೊಬೈಲ್ಫೋನ್ ಟವರ್ ಇದ್ದರೂ ಗ್ರಾಮೀಣ ಪ್ರದೇಶದ ಮನೆಗಳಿಗೆ ಸರಿಯಾಗಿ ಸಿಗ್ನಲ್ ಬರುವುದಿಲ್ಲ. ಬಂದರೂ ಮಾತನಾಡಲಿಕ್ಕೆ ಆಗುವುದಿಲ್ಲ. ಇಂರ್ಟನೆಟ್ ಸಂಪರ್ಕ ಸರಿಯಾಗಿರುವುದಿಲ್ಲ. ಮೊಬೈಲ್ಫೋನ್ ಸಿಗ್ನಲ್ಗಾಗಿ ಗುಡ್ಡ-ಬೆಟ್ಟ, ಶಾಲೆ-ದೇವಸ್ಥಾನ , ಗದ್ದೆ-ತೋಟದಲ್ಲಿ ಹುಡುಕಾಡಿ ಎಲ್ಲಿ ಸಿಗ್ನಲ್ ಬರುತ್ತದೆಯೋ ಅಲ್ಲಿ ಬೆಳಗ್ಗೆಯಿಂದ ಸಂಜೆಯವರೆಗೂ ಲ್ಯಾಪ್ಟಾಪ್ ಹಿಡಿದು ಕುಳಿತು ಕೆಲಸ ಮಾಡಬೇಕಾಗಿದೆ ಎಂದು ಸಾಫ್ಟ್ವೇರ್ ಇಂಜಿನಿಯರ್ಗಳು ಗೋಳು ತೋಡಿಕೊಳ್ಳುತ್ತಿದ್ದಾರೆ.
ಗ್ರಾಮೀಣ ಪ್ರದೇಶದಲ್ಲಿ ನೆಟ್ವರ್ಕ್ ಸಮರ್ಪಕವಾಗಿ ಇಲ್ಲ. ವರ್ಕ್ ಫ್ರಮ್ ಹೋಮ್ಲ್ಲಿ ಕೆಲಸ ಮಾಡುವುದು ಕಷ್ಟಕರವಾಗಿದೆ. ಒಮ್ಮೆಲೆ ಇಂಟರ್ ನೆಟ್ ಸ್ಥಗಿತ, ಸಿಗ್ನಲ್ ಹೋಗುವುದರಿಂದ ತೊಂದರೆ ಆಗುತ್ತಿದೆ. ಪುನಃ ನೆಟ್ವರ್ಕ್ ಬರುವತನಕ ಕಾಯಬೇಕಾಗಿದೆ. | ಗಿರೀಶ ಹೆಗಡೆ ಹಾಗೂ ಸಂತೋಷ ಹೆಗಡೆ ಹೊನ್ನೆಹದ್ದ ಸಾಫ್ಟ್ವೇರ್ ಇಂಜಿನಿಯರ್ ಬೆಂಗಳೂರು
ಲಾಕ್ಡೌನ್ನಿಂದಾಗಿ ಮನೆಯಲ್ಲಿಯೇ ಕುಳಿತು ಕೆಲಸ ಮಾಡಬೇಕಾಗಿದೆ. ಆದರೆ, ಮನೆಯಲ್ಲಿ ಕುಳಿತರೆ ಮೊಬೈಲ್ಫೋನ್ ಸಿಗ್ನಲ್ ಬರುವುದಿಲ್ಲ. 2-3ಕಿ.ಮೀ. ದೂರ ಹೋಗಿ ಗುಡ್ಡ ಹತ್ತಿ ಮರದ ನೆರಳಿನಲ್ಲಿ ಕುಳಿತು ಕೆಲಸ ಮಾಡುತ್ತಿದ್ದೇನೆ. | ಅಕ್ಷತಾ ಅನಂತ ಭಟ್ಟ ಗಾಳೀಮನೆ ಸ್ಪೇಸ್ವಾಸ್ಟ್ ಆರ್ಕಿಟೆಕ್ಸ್ ಬೆಂಗಳೂರು ಉದ್ಯೋಗಿ