ಮಾಸ್ಕೋ: ದುಬಾರಿ ಬೆಲೆಯ ಸ್ವಂತ ಮರ್ಸಿಡೀಸ್ ಕಾರನ್ನು ಸುಟ್ಟು ಹಾಕುವ ಮೂಲಕ ರಷ್ಯಾದ ಯೂಟ್ಯೂಬರ್ ಓರ್ವ ಲಕ್ಷಾಂತರ ಮಂದಿಯ ಹುಬ್ಬೇರಿಸಿದ್ದಾರೆ. ಬ್ಲಾಗರ್ ಮಿಖೈಲ್ ಲಿಟ್ವಿನ್ ವಿಸ್ತಾರವಾದ ಮೈದಾನದ ನಡುವೆ ತನ್ನ ಕಾರನ್ನು ನಿಲ್ಲಿಸಿ ಬೆಂಕಿ ಹಚ್ಚಿದ ವಿಡಿಯೋ ಇದೀಗ ಭಾರಿ ವೈರಲ್ ಆಗಿದೆ.
ಆಗಾಗ ಕಾರಿನಲ್ಲಿ ಸಮಸ್ಯೆಗಳು ಎದರಾಗುತ್ತಿದ್ದರಿಂದ ಅದನ್ನು ಸುಟ್ಟು ಹಾಕಿದ್ದಾರೆಂದು ಮೋಟರ್ 1 ಡಾಟ್ ಕಾಮ್ (Motor1.com) ವರದಿ ಮಾಡಿದೆ. ಮರ್ಸಿಡೀಸ್ ಎಎಂಜಿ ಜಿಟಿ 63 ಎಸ್ ಕಾರಿನ ಬೆಲೆ ಬರೋಬ್ಬರಿ 2.4 ಕೋಟಿ ರೂ. ಅದನ್ನು ಖರೀದಿಸಿದಾಗಿನಿಂದ ಒಂದಲ್ಲ ಒಂದು ಸಮಸ್ಯೆ ಕಾರಿನಲ್ಲಿ ಕಾಣಿಸಿಕೊಳ್ಳುತ್ತಿತ್ತಂತೆ. ಸುಮಾರು ಐದು ಬಾರಿ ರಿಪೇರಿ ಮಾಡಿಸಿದ್ದಾರೆ. ಅಲ್ಲದೆ, ಇಂಜಿನ್ ಸಹ ಬದಲಾಯಿಸಲಾಗಿದೆ. ಆದರೂ ಏನು ಪ್ರಯೋಜನವಾಗಿಲ್ಲ.
ಇದನ್ನೂ ಓದಿ: ಬೆಳ್ಳಂಬೆಳಗ್ಗೆ ಸುಟ್ಟು ಕರಕಲಾಗಿದ್ದ ಕಾರಿನ ಡಿಕ್ಕಿ ನೋಡಿದ ಹಾಸನ ಗ್ರಾಮಸ್ಥರಿಗೆ ಕಾದಿತ್ತು ಶಾಕ್!
ಇದರಿಂದ ಬೇಸರಗೊಂಡ ಮಿಖೈಲ್ ಲಿಟ್ವಿನ್ ಪ್ರತಿಭಟನೆಯ ಮಾದರಿಯಾಗಿ ಕಾರು ಸುಡುವ ತೀರ್ಮಾನಕ್ಕೆ ಬಂದು ಕೊನೆಗೂ ಅದನ್ನು ಮಾಡಿಯೇ ಬಿಟ್ಟಿದ್ದಾರೆ. ನಾಲ್ಕು ದಿನಗಳ ಹಿಂದೆ ಮಿಖೈಲ್ ತಮ್ಮ ಯೂಟ್ಯೂಬ್ ಚಾನೆಲ್ನಲ್ಲಿ ವಿಡಿಯೋ ಅಪ್ಲೋಡ್ ಮಾಡಿದ್ದಾರೆ. ಖಾಲಿ ಪ್ರದೇಶದ ನಡುವೆ ಕಾರನ್ನು ನಿಲ್ಲಿಸಿ ಕಾರಿಗೆ ಬೆಂಕಿ ಹಚ್ಚಿ ಅದನ್ನು ವಿಡಿಯೋ ಮಾಡಿಕೊಂಡಿದ್ದಾರೆ.
ಇದೀಗ ವಿಡಿಯೋ ವೈರಲ್ ಆಗಿದ್ದು ಯೂಟ್ಯೂಬ್ನಲ್ಲಿ 11 ಮಿಲಿಯನ್ಗೂ ಅಧಿಕ ವೀಕ್ಷಣೆ ಪಡೆದುಕೊಂಡಿದೆ. ಮಿಖೈಲ್ ಅವರಿಗೆ 5 ಲಕ್ಷ ಚಂದಾದಾರರಿದ್ದಾರೆ. ವಿಡಿಯೋ ನೋಡಿದ ಅನೇಕರು ಅಚ್ಚರಿ ವ್ಯಕ್ತಪಡಿಸಿದ್ದಾರೆ. (ಏಜೆನ್ಸೀಸ್)