ಮುಂಬೈ: ಇಲ್ಲಿನ ವಾಂಖೆಡೆ ಕ್ರೀಡಾಂಗಣದಲ್ಲಿ ಮಂಗಳವಾರ (ನ.07) ನಡೆದ ವಿಶ್ವಕಪ್ ಟೂರ್ನಿಯ 39ನೇ ಪಂದ್ಯದಲ್ಲಿ ಆಫ್ಘಾನಿಸ್ತಾನ ತಂಡದ ಬೌಲಿಂಗ್ ದಾಳಿಗೆ ತತ್ತರಿಸಿ, ಸೋಲಿನ ಸುಳಿಯಲ್ಲಿ ಸಿಲುಕ್ಕಿದ್ದ ಆಸ್ಟ್ರೇಲಿಯಾ ತಂಡಕ್ಕೆ ಆಪತ್ಬಾಂಧವನಾದ ಗ್ಲೇನ್ ಮ್ಯಾಕ್ಸ್ವೆಲ್ ( ಅಜೇಯ 201 ರನ್ 128 ಎಸೆತ 21 ಬೌಂಡರಿ 10 ಸಿಕ್ಸರ್) ಮಧ್ಯಮ ಕ್ರಮಾಂಕದಲ್ಲಿ ಸ್ಫೋಟಕ ದ್ವಿಶತಕ ಸಿಡಿಸುವ ಮೂಲಕ ಆಸಿಸ್ ಪಡೆ ಸಮೀಸ್ ಪ್ರವೇಶವನ್ನು ಖಚಿತಪಡಿಸಿದರು.
ಟಾಸ್ ಗೆದ್ದು ಬ್ಯಾಟಿಂಗ್ ಆರಂಭಿಸಿದ ಆಫ್ಘಾನ್ ಪಡೆ ನಿಗದಿತ 50 ಓವರ್ಗಳಲ್ಲಿ 5 ವಿಕೆಟ್ ನಷ್ಟಕ್ಕೆ 291 ರನ್ಗಳನ್ನು ಕಲೆಹಾಕಿತು. ತಂಡದ ಪರ ಆರಂಭಿಕರಾಗಿ ಕಣಕ್ಕಿಳಿದು ಕೊನೆಯವರೆಗೂ ಅಜೇಯ ಆಟವಾಡಿದ ಇಬ್ರಾಹಿಂ ಜದ್ರಾನ್ (129 ರನ್, 143 ಎಸೆತ, 8 ಬೌಂಡರಿ, 3 ಸಿಕ್ಸರ್) ಅಮೋಘ ಶತಕದೊಂದಿಗೆ ತಂಡಕ್ಕೆ ಉತ್ತಮ ಕಾಣಿಕೆ ನೀಡಿದರು. ಉಳಿದಂತೆ ರಹಮತ್ (30) ನಾಯಕ ಶಾಹಿದಿ (26), ಗುರ್ಬಜ್ (21) ಮತ್ತು ಅಜ್ಮತುಲ್ಲಾ (22) ರನ್ ಕಲೆ ಹಾಕಿದರೆ, ಕೊನೆಯಲ್ಲಿ ಅಬ್ಬರಿಸಿ ಬೊಬ್ಬಿರಿದ ಆಲ್ರೌಂಡರ್ ರಶೀದ್ ಖಾನ್ 18 ಎಸೆತಗಳಲ್ಲಿ 2 ಬೌಂಡರಿ 3 ಸಿಕ್ಸರ್ ನೆರವಿನೊಂದಿಗೆ 35 ರನ್ ಕಲೆಹಾಕಿ ಅಜೇಯರಾಗಿ ಉಳಿದರು.
ಆಸಿಸ್ ಪರ ಹಾಜಲ್ವುಡ್ 2 ವಿಕೆಟ್ ಕಬಳಿಸಿದರೆ, ಆ್ಯಡಂ ಜಂಪಾ ಮತ್ತು ಸ್ಟಾರ್ಕ್ ತಲಾ ಒಂದು ವಿಕೆಟ್ ಪಡೆದರು. ಉಳಿದ ಯಾವೊಬ್ಬ ಬೌಲರ್ಗಳು ಕೂಡ ನಿರೀಕ್ಷಿತ ಪ್ರದರ್ಶನ ತೋರಲಿಲ್ಲ.
ಆಫ್ಘಾನ್ ನೀಡಿದ 291 ರನ್ಗಳ ಸವಾಲಿನ ಗುರಿ ಬೆನ್ನತ್ತಿದ್ದ ಆಸಿಸ್ ಪಡೆ 46.5 ಓವರ್ಗಳಲ್ಲಿ 7 ವಿಕೆಟ್ ನಷ್ಟಕ್ಕೆ 293 ರನ್ ಗಳಿಸುವ ಮೂಲಕ 3 ವಿಕೆಟ್ಗಳ ಅಂತರದಿಂದ ವಿರೋಚಿತ ಗೆಲುವು ದಾಖಲಿಸಿತು.
ಗುರಿ ಬೆನ್ನತ್ತಿದ ಆಸಿಸ್ ಪಡೆ ಟ್ರೆವಿಸ್ ಹೆಡ್ (0), ಮಿಚೆಲ್ ಮಾರ್ಷ್ (24) ಡೇವಿಡ್ ವಾರ್ನರ್ (18), ಜೋಶ್ ಇಂಗ್ಲಿಸ್ (0), ಮಾರ್ನಸ್ ಲಬುಶೇನ್ (14), ಮಾರ್ಕ್ ಸ್ಟೋನಿಸ್ (6) ಮತ್ತು ಮಿಚೆಲ್ ಸ್ಟಾರ್ಕ್ (3) ಕೇವಲ 91 ರನ್ಗೆ ಪ್ರಮುಖ 7 ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತ್ತು. ಅಕ್ಷರಶಃ ಸೋಲಿನ ದವಡೆಯಲ್ಲಿ ಸಿಲುಕಿಕೊಂಡಿತ್ತು. ಈ ವೇಳೆ ತಂಡಕ್ಕೆ ಆಸರೆಯಾದ ಗ್ಲೇನ್ ಮ್ಯಾಕ್ಸ್ವೆಲ್ ಅಬ್ಬಿರಿಸಿ ಬೊಬ್ಬಿರಿದರು. ಮ್ಯಾಕ್ಸಿ ಮಾರುತಕ್ಕೆ ಆಫ್ಘಾನ್ ಬೌಲರ್ಗಳು ತತ್ತರಿಸಿದರು. ಮ್ಯಾಕ್ಸಿ ತಾನು ಎದುರಿಸಿದ 128 ಎಸೆತಗಳಲ್ಲಿ 21 ಬೌಂಡರಿ ಮತ್ತು 10 ಸಿಕ್ಸರ್ ನೆರವಿನೊಂದಿಗೆ 201 ರನ್ ಗಳಿಸಿ ಅಜೇಯರಾಗಿ ಉಳಿದರು. ಗಮನಾರ್ಹ ಸಂಗತಿ ಏನೆಂದರೆ, ಮ್ಯಾಕ್ಸಿ ಆಸಿಸ್ ಪಡೆಯ ಸಮೀಸ್ ಪ್ರವೇಶವನ್ನು ಖಚಿತಪಡಿಸಿದರು. ಮ್ಯಾಕ್ಸಿ ಆಟಕ್ಕೆ ಸಾಥ್ ನೀಡಿದ ನಾಯಕ ಪ್ಯಾಟ್ ಕ್ಯುಮಿನ್ಸ್ 68 ಎಸೆತಗಳಲ್ಲಿ ಕೇವಲ 12 ರನ್ ಗಳಿಸುವ ಮೂಲಕ ತಾಳ್ಮೆಯ ಆಟದೊಂದಿಗೆ ವಿಕೆಟ್ ಕಾಪಾಡಿಕೊಂಡರು. ಅವರು ಕೂಡ ಅಜೇಯರಾಗಿ ಉಳಿದರು.
ಆಫ್ಘಾನ್ ಪರ ನವೀನ್ ಉಲ್ ಹಕ್, ಅಜ್ಮತುಲ್ಲಾ ಒಮರ್ಜಾಯ್ ಮತ್ತು ರಶೀದ್ ಖಾನ್ ತಲಾ ಎರಡೆರಡು ವಿಕೆಟ್ ಕಬಳಿಸಿದರು. (ಏಜೆನ್ಸೀಸ್)