ಜೆಹಾನಾಬಾದ್(ಬಿಹಾರ): ಆಂಬುಲೆನ್ಸ್ ಒದಗಿಸಲು ನಿರಾಕರಿಸಿದ್ದಕ್ಕೆ ಬಿಹಾರದ ದಂಪತಿ ತಮ್ಮ 3 ವರ್ಷದ ಮಗುವಿನ ಮೃತದೇಹವನ್ನು ಹೊತ್ತುಕೊಂಡೆ ಸಾಗಿದ ಹೃದಯ ವಿದ್ರಾವಕ ಘಟನೆ ಪಟನಾದ 48 ಕಿ.ಮೀ ದೂರದಲ್ಲಿರುವ ಜೆಹಾನಾಬಾದ್ ಸರ್ಕಾರಿ ಆಸ್ಪತ್ರೆಯಲ್ಲಿ ಶುಕ್ರವಾರ ನಡೆದಿದೆ.
ಆಸ್ಪತ್ರೆ ಮಂಡಳಿಯ ನಿರ್ಲಕ್ಷ್ಯವೇ ಮಗುವಿನ ಸಾವಿಗೆ ಕಾರಣ ಎಂದು ಆರೋಪಿಸಿರುವ ಮೃತ ಮಗುವಿನ ಪಾಲಕರು, ಲಾಕ್ಡೌನ್ ಹಿನ್ನೆಲೆಯಲ್ಲಿ ಆಂಬುಲೆನ್ಸ್ ವ್ಯವಸ್ಥೆಯು ಸಿಗಲಿಲ್ಲ. ಒಂದರಿಂದ ಇನ್ನೊಂದು ಆಸ್ಪತ್ರೆಗೆ ನಮ್ಮನ್ನು ಓಡಾಡಿಸಿದರು. ಸರಿಯಾದ ಸಮಯದಲ್ಲಿ ಚಿಕಿತ್ಸೆ ನೀಡಲಿಲ್ಲ ಎಂದು ದೂರಿದ್ದಾರೆ.
ಇದಕ್ಕೆ ಸಂಬಂಧಿಸಿದ ವಿಡಿಯೋವೊಂದು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ಮೃತ ಮಗುವಿನ ದೇಹವನ್ನು ತನ್ನ ತೋಳಿನಲ್ಲಿ ಹಿಡಿದುಕೊಂಡು ಅಸಹಾಯಕರಾಗಿ ರೋಧಿಸುತ್ತಿರುವುದು ಹಾಗೂ ಮಗುವಿನ ತಂದೆ ಪತ್ನಿಯ ಬಳಿ ನಿಂತಿರುವುದು ವಿಡಿಯೋದಲ್ಲಿದೆ. ಸ್ಥಳೀಯರೊಬ್ಬರು ಯಾರಾದರೂ ಇವರಿಗೆ ಸಹಾಯ ಮಾಡಿ ಎನ್ನಲು, ಈಗ ನಮಗೆ ಆಂಬುಲೆನ್ಸ್ ಬೇಕಾಗಿಲ್ಲ ಎಂದು ತಂದೆ ನೋವಿನಿಂದ ಮಾತನಾಡಿರುವ ಮನಕಲಕುವ ದೃಶ್ಯ ವಿಡಿಯೋದಲ್ಲಿದೆ.
ಮೃತ ಮಗನ ಆರೋಗ್ಯ ಸ್ಥಿತಿ ಬಗ್ಗೆ ವಿವರಿಸಿರುವ ತಂದೆ ಗಿರಿಜ್ ಕುಮಾರ್, ಎರಡು ದಿನಗಳ ಹಿಂದೆ ಮಗ ಅನಾರೋಗ್ಯಕ್ಕೀಡಾಗಿದ್ದ. ಜ್ವರ, ಶೀತ ಮತ್ತು ಕೆಮ್ಮು ಇತ್ತು. ಆರಂಭದಲ್ಲಿ ನಮ್ಮ ಶಹೊಪರ್ ಗ್ರಾಮದ ವೈದ್ಯರನ್ನು ಸಂಪರ್ಕಿಸಿದೆವು. ಮಗನ ಆರೋಗ್ಯ ಸ್ಥಿತಿ ಮತ್ತಷ್ಟು ಕ್ಷೀಣಿಸಿದ್ದರಿಂದ ಲಾಕ್ಡೌನ್ನಿಂದ ಆಂಬುಲೆನ್ಸ್ ಪಡೆಯಲು ಸಾಧ್ಯವಾಗದೇ ಟೆಂಪೋ ಬಾಡಿಗೆ ಪಡೆದು ಜೆಹಾನಾಬಾದ್ ಸರ್ಕಾರಿ ಆಸ್ಪತ್ರೆಗೆ ಕರೆತಂದವು.
ಬಳಿಕ ಜೆಹಾನ್ಬಾದ್ ಆಸ್ಪತ್ರೆಯ ವೈದ್ಯರು ಪಟನಾದ ಮೆಡಿಕಲ್ ಕಾಲೇಜು ಆಸ್ಪತ್ರೆಗೆ ಕರೆದೊಯ್ಯಲು ಹೇಳಿದರು. ಆದರೆ, ಆಂಬುಲೆನ್ಸ್ ಒದಗಿಸಲಿಲ್ಲ. ವೈದ್ಯರ ನಿರ್ಲಕ್ಷ್ಯದಿಂದಲೇ ನಾವು ನಮ್ಮ ಮಗನನ್ನು ಕಳೆದುಕೊಂಡಿದ್ದೇವೆ ಎಂದು ಮೃತ ಮಗುವಿನ ತಂದೆ ದೂರಿದ್ದಾರೆ.
ಮಗನ ಸಾವಿನ ನಂತರ ಲಾಕ್ಡೌನ್ ಹಿನ್ನೆಲೆಯಲ್ಲಿ ಯಾವುದೇ ವಾಹನಗಳು ಸಿಗದಿದ್ದರಿಂದ ಹಾಗೂ ಆಂಬುಲೆನ್ಸ್ ನೀಡದಿದ್ದರಿಂದ ಮಗುವಿನ ದೇಹವನ್ನೇ ಹೊತ್ತುಕೊಂಡೇ ಸಾಗಿದ್ದಾರೆ. ಈ ಮಧ್ಯೆ ಸ್ಥಳೀಯಯ ಸಹಾಯದಿಂದ ಹೇಗೋ ತಮ್ಮ ಗ್ರಾಮವನ್ನು ತಲುಪಿದ್ದಾರೆ. ಇತ್ತ ಸಾಮಾಜಿಕ ಜಾಲತಾಣದಲ್ಲಿ ವಿಡಿಯೋ ವೈರಲ್ ಆದ ಬೆನ್ನಲ್ಲೇ ನೆಟ್ಟಿಗರು ಬಿಹಾರ ರಾಜ್ಯದ ಆರೋಗ್ಯ ಸೌಕರ್ಯಗಳನ್ನು ಪ್ರಶ್ನಿಸಿ, ಸರ್ಕಾರದ ವಿರುದ್ಧ ಭಾರೀ ಟೀಕಾ ಪ್ರಹಾರ ನಡೆಸಿದ್ದಾರೆ. (ಏಜೆನ್ಸೀಸ್)
ಪತಿಯ ಆ ಒಂದು ನಿರ್ಧಾರದಿಂದ ಖಿನ್ನತೆಗೆ ಜಾರಿದ್ದ ಯುವತಿ ನೇಣು ಬಿಗಿದುಕೊಂಡು ಆತ್ಮಹತ್ಯೆಗೆ ಶರಣು