ಬೆಂಗಳೂರು: ಚಿಕ್ಕ ವಯಸ್ಸಿನಲ್ಲಿ ಇಂಜೆಕ್ಷನ್ ತೆಗೆದುಕೊಳ್ಳಲು ಅದೆಷ್ಟು ಭಯ ಪಡುತ್ತಿದ್ದಿರಿ ಎನ್ನುವುದು ನೆನಪಿದೆಯೇ? ದೊಡ್ಡವರಾದ ಮೇಲೆ ಇಂಜೆಕ್ಷನ್ ಯಾವ ಮಹಾ ಎಂದೆನಿಸುವುದು ಸಾಮಾನ್ಯ. ಆದರೆ ಇಲ್ಲೊಬ್ಬ ಮಹಿಳೆ ಇಂಜೆಕ್ಷನ್ ತೆಗೆದುಕೊಳ್ಳಲು ಮಾಡಿದ ಸಾಹಸವನ್ನು ನೀವು ನೋಡಲೇಬೇಕು.
ಸುಕೃತಿ ತಲ್ವಾರ್ ಹೆಸರಿನ ಮಹಿಳೆ ಕರೊನಾ ಲಸಿಕೆ ಪಡೆಯಲೆಂದು ಆಸ್ಪತ್ರೆಗೆ ಬಂದಿರುತ್ತಾರೆ. ಆ ವೇಳೆ ನರ್ಸ್ ಅವರಿಗೆ ಲಸಿಕೆ ನೀಡಲು ಮುಂದಾಗುತ್ತಾರೆ. ಆದರೆ ಇಂಜೆಕ್ಷನ್ ಎಂದರೆ ಸಾಕಷ್ಟು ಹೆದರಿಕೆಯಿದ್ದ ಸುಕೃತಿ ಕುತ್ತಲ್ಲಿದ್ದ ಎದ್ದು ನಿಲ್ಲುತ್ತಾರೆ. ಒಂದು ನಿಮಿಷ ಕೊಡಿ ಎಂದು ಬೇಡುತ್ತಾರೆ. ಅದನ್ನು ಕೇಳದ ನರ್ಸ್ ಕೂರಲು ಹೇಳುತ್ತಾರೆ. ಕೂತ ಮೇಲೂ ಸುಕೃತಿ ಮಮ್ಮೀ ಎಂದು ಕೂಗಲಾರಂಭಿಸುತ್ತಾರೆ.
ಮಮ್ಮೀ ಎಂದು ಕೂಗಿದ ತಕ್ಷಣ ನರ್ಸ್ ಹೀಗೆ ಮಾಡುವುದಾದರೆ ಇಲ್ಲಿಂದ ಎದ್ದು ಹೋಗಿ, ನಾನು ಇಂಜೆಕ್ಷನ್ ಕೊಡುವುದಿಲ್ಲ ಎಂದು ಹೇಳುತ್ತಾರೆ. ಇಲ್ಲ, ಸಾರಿ ಎಂದು ಕೇಳುವ ಸುಕೃತಿ ಕನಿಷ್ಠ ಮಮ್ಮೀ ಎಂದು ಹೇಳಲು ಅವಕಾಶ ಕೊಡಿ ಎನ್ನುತ್ತಾರೆ. ಇಲ್ಲ ಒಂದೂ ಪದವನ್ನೂ ಹೇಳಬಾರದು ಎಂದ ನರ್ಸ್ ಹಾಗೆಯೇ ನಿಧಾನವಾಗಿ ಇಂಜೆಕ್ಷನ್ ಕೊಟ್ಟು ಬಿಡುತ್ತಾರೆ.
ಸುಕೃತಿ ಇಂಜೆಕ್ಷನ್ ಪಡೆಯಲು ಮಾಡಿದ ಒದ್ದಾಟವನ್ನು ಆಕೆಯ ಜತೆ ಹೋದವರು ವಿಡಿಯೋ ಮಾಡಿ ಸಾಮಾಜಿಕ ಜಾಲತಾಣಗಳಲ್ಲಿ ಹರಿಬಿಟ್ಟಿದ್ದಾರೆ. ಆ ವಿಡಿಯೋ ಇದೀಗ ಭಾರೀ ವೈರಲ್ ಆಗಿದೆ. ನೆಟ್ಟಿಗರು ತಾವು ಬಾಲ್ಯದಲ್ಲಿ ಇಂಜೆಕ್ಷನ್ಗೆ ಹೆದರುತ್ತಿದ್ದದ್ದನ್ನು ನೆನಪಿಸಿಕೊಂಡು ನಗು ಬೀರಿದ್ದಾರೆ. (ಏಜೆನ್ಸೀಸ್)