ಲಂಡನ್: ಕರೊನಾ ವೈರಸ್ ಭೀತಿಯಿಂದಾಗಿ ಈ ವರ್ಷ ಪ್ರತಿಷ್ಠಿತ ವಿಂಬಲ್ಡನ್ ಗ್ರಾಂಡ್ ಸ್ಲಾಂ ಟೆನಿಸ್ ಟೂರ್ನಿ ನಡೆದಿಲ್ಲ. 2ನೇ ಮಹಾಯುದ್ಧದ ಬಳಿಕ ಮೊದಲ ಬಾರಿಗೆ ವಿಂಬಲ್ಡನ್ ಟೂರ್ನಿ ರದ್ದುಗೊಂಡಿದೆ. ಇದರ ನಡುವೆಯೂ, ಟೂರ್ನಿಯಲ್ಲಿ ಆಡಬೇಕಾಗಿದ್ದ ಎಲ್ಲ ಆಟಗಾರರಿಗೂ ಬಹುಮಾನ ಮೊತ್ತದ ಪಾಲು ಸಿಗಲಿದೆ ಎಂಬುದು ವಿಶೇಷ. ಇದರಿಂದಾಗಿ, ಟೂರ್ನಿ ರದ್ದುಗೊಂಡರೂ ಯಾವುದೇ ಆಟಗಾರರಿಗೆ ನಷ್ಟ ಉಂಟಾಗುವುದಿಲ್ಲ!
ವಿಂಬಲ್ಡನ್ ಟೂರ್ನಿಯ ಸಂಘಟಕರಾದ ಆಲ್ ಇಂಗ್ಲೆಂಡ್ ಕ್ಲಬ್, ಟೂರ್ನಿಯಲ್ಲಿ ಆಡಬೇಕಾಗಿದ್ದ ಒಟ್ಟು 620 ಆಟಗಾರರಿಗೆ 93.93 ಕೋಟಿ ರೂ. (12.5 ದಶಲ ಡಾಲರ್) ಬಹುಮಾನ ಮೊತ್ತವನ್ನು ಹಂಚಿಕೆ ಮಾಡಲು ಶುಕ್ರವಾರ ನಿರ್ಧರಿಸಿದೆ. ಟೂರ್ನಿಯ ವಿಮಾ ಮೊತ್ತದಿಂದಾಗಿ ಸಂಟಕರಿಗೆ ಈಗಾಗಲೆ ಭಾರಿ ನಷ್ಟದ ಅಪಾಯ ತಪ್ಪಿದೆ. ಇದೀಗ ವಿಮಾ ಕಂಪನಿಯ ಜತೆಗೆ ಮಾತುಕತೆ ನಡೆಸಿ ಆಟಗಾರರಿಗೂ ಅದರಲ್ಲಿ ಪಾಲು ನೀಡಲು ನಿರ್ಧರಿಸಲಾಗಿದೆ.
ಇದನ್ನೂ ಓದಿ: 71ನೇ ಜನ್ಮದಿನಕ್ಕೆ ‘ಹೃದಯ’ ಗೆದ್ದ ಸುನೀಲ್ ಗಾವಸ್ಕರ್ ವಿಶೇಷ ಸೇವೆ!
ಟೂರ್ನಿಯ ಪ್ರಧಾನ ಸುತ್ತಿನಲ್ಲಿ ಆಡಬೇಕಾಗಿದ್ದ 256 ಆಟಗಾರರಿಗೆ ತಲಾ 31 ಸಾವಿರ ಡಾಲರ್ (23.29 ಲ ರೂ.) ಮತ್ತು ಅರ್ಹತಾ ಸುತ್ತಿನಲ್ಲಿ ಆಡಬೇಕಾಗಿದ್ದ 224 ಆಟಗಾರರಿಗೆ ತಲಾ 15,600 ಡಾಲರ್ (11.72 ಲ ರೂ.) ಬಹುಮಾನವನ್ನು ವಿತರಿಸಲಾಗುವುದು. ಚಾಂಪಿಯನ್ಷಿಪ್ ರದ್ದುಗೊಂಡ ಕೂಡಲೇ ನಾವು, ಟೂರ್ನಿ ನಡೆಸಲು ನೆರವಾಗುವವರಿಗೆ ಯಾವ ರೀತಿಯಲ್ಲಿ ನೆರವಾಗಬಹುದು ಎಂಬ ಬಗ್ಗೆ ಚಿಂತಿಸಿದ್ದೆವು ಎಂದು ಆಲ್ ಇಂಗ್ಲೆಂಡ್ ಕ್ಲಬ್ ತಿಳಿಸಿದೆ.
ಡಬಲ್ಸ್ನಲ್ಲಿ ಸ್ಪಧಿರ್ಸಬೇಕಿದ್ದ 120 ಆಟಗಾರರಿಗೆ ತಲಾ 7,800 ಡಾಲರ್ (5.86 ಲ ರೂ.), ವೀಲ್ಚೇರ್ ಸ್ಪರ್ಧೆಯಲ್ಲಿ ಆಡಬೇಕಿದ್ದ 16 ಆಟಗಾರರಿಗೆ ತಲಾ 7,500 ಡಾಲರ್ (7.63 ಲ ರೂ.) ಮತ್ತು ಕ್ವಾಡ್ ವೀಲ್ಚೇರ್ ಸ್ಪರ್ಧೆಯಲ್ಲಿ ಭಾಗವಹಿಸಬೇಕಾಗಿದ್ದ ನಾಲ್ವರಿಗೆ ತಲಾ 6,200 ಡಾಲರ್ (4.65 ಲ ರೂ. ) ವಿತರಿಸಲಾಗುವುದು. ಈ ಸಮಯದಲ್ಲಿ ಸಾಕಷ್ಟು ಜನರು ಸಂಕಷ್ಟದಲ್ಲಿದ್ದಾರೆ. ಟೆನಿಸ್ ಅಟಗಾರರು ಕೂಡ ಅದರಲ್ಲಿ ಸೇರಿದ್ದಾರೆ. ಹೀಗಾಗಿ ನಾವು ಅವರಿಗೆ ಅವರ ವಿಶ್ವ ರ್ಯಾಂಕಿಂಗ್ನ ಅನ್ವಯ ಬಹುಮಾನ ಮೊತ್ತವನ್ನು ಪಡೆಯುವ ಅವಕಾಶವನ್ನು ನೀಡಿದ್ದೇವೆ ಎಂದು ಆಲ್ ಇಂಗ್ಲೆಂಡ್ ಕ್ಲಬ್ನ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ರಿಚರ್ಡ್ ಲೆವಿಸ್ ತಿಳಿಸಿದ್ದಾರೆ.
ನಮ್ಮ ವಿಮಾ ಪಾಲಿಸಿಯಿಂದಾಗಿ ನಷ್ಟ ತಪ್ಪಿಸಲು ಸಾಧ್ಯವಾಗಿರುವುದಕ್ಕೆ ಖುಷಿ ಇದೆ. 2020ರ ಟೂರ್ನಿಗೆ ನೇರಪ್ರವೇಶ ಪಡೆಯಬಹುದಾಗಿದ್ದ ಆಟಗಾರರರಿಗೆ ಈಗ ಬಹುಮಾನ ಮೊತ್ತದ ಹಂಚಿಕೆಯಿಂದ ಅವರಿಗೆ ಭವಿಷ್ಯ ರೂಪಿಸಿಕೊಳ್ಳಲು ನೆರವಾಗುತ್ತಿದ್ದೇವೆ. 2002ರಿಂದ ಟೂರ್ನಿಯ ಶ್ರೇಯಾಂಕ ನೀಡಲು ಬಳಸುತ್ತಿರುವ ಗ್ರಾಸ್ ಕೋರ್ಟ್ ದಾಖಲೆಯ ಅನ್ವಯವೇ ನೇರಪ್ರವೇಶ ಪಡೆಯುವ ಅವಕಾಶ ಹೊಂದಿದ್ದ ಆಟಗಾರರಿಗೆ ಬಹುಮಾನ ಮೊತ್ತ ಸಿಗಲಿದೆ ಎಂದು ತಿಳಿಸಿದ್ದಾರೆ. 2021ರಿಂದ ಟೂರ್ನಿಯ ನೇರಪ್ರವೇಶಕ್ಕೆ ವಿಶ್ವ ರ್ಯಾಂಕಿಂಗ್ ಪದ್ಧತಿಯೇ ಅನ್ವಯವಾಗಲಿದೆಎ ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.
VIDEO | ಧೋನಿ ಕ್ರಿಕೆಟ್ ಆಡದೆ ಭರ್ತಿ ಒಂದು ವರ್ಷ, ಕೊನೆಯ ಇನಿಂಗ್ಸ್ ಹೇಗಿತ್ತು ಗೊತ್ತೇ?