ನವದೆಹಲಿ : ಕರೊನಾ ಎರಡನೇ ಅಲೆ ತಣ್ಣಗಾಗುತ್ತಿರುವಂತೆ ಬಹುತೇಕ ರಾಜ್ಯಗಳು ನಿರ್ಬಂಧಗಳನ್ನು ಸಡಿಲಿಸುತ್ತಾ ಸಹಜ ಜನಜೀವನಕ್ಕೆ ಹೆಚ್ಚು ಅವಕಾಶ ಮಾಡಿಕೊಡುತ್ತಿವೆ. ಆದರೆ ಪುಟ್ಟ ಮಕ್ಕಳ ಶಾಲೆಗಳು ಮಾತ್ರ 2020 ರ ಮಾರ್ಚ್ನಲ್ಲಿ ಮುಚ್ಚಿದ್ದು, ಈವರೆಗೂ ತೆರೆಯಲಾಗಿಲ್ಲ. ಶಾಲೆ ಮತ್ತೆ ಯಾವಾಗ ತೆರೆಯುತ್ತೆ ? ಮಕ್ಕಳು ಮತ್ತೆ ಮೊದಲಿನಂತೆ ಸಹಪಾಠಿಗಳೊಂದಿಗೆ ಆಟವಾಡಿಕೊಂಡು ನೇರವಾಗಿ ಶಿಕ್ಷಕರ ಪಾಠ ಕೇಳಿ ಕಲಿಯುವ ಸಂದರ್ಭ ಯಾವಾಗ ಒದಗುತ್ತೆ ? ಎಂಬ ಪ್ರಶ್ನೆ ಪಾಲಕರನ್ನು ಕಾಡುತ್ತಿದೆ.
ಈ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ಕೇಂದ್ರ ಸರ್ಕಾರದ ನೀತಿ ಆಯೋಗದ ಅಧ್ಯಕ್ಷ ಡಾ. ವಿ.ಕೆ.ಪೌಲ್ ಅವರು, ಶಾಲೆಗಳನ್ನು ಮತ್ತೆ ತೆರೆಯುವ ನಿರ್ಧಾರವನ್ನು ದಿಢೀರನೇ ತೆಗೆದುಕೊಳ್ಳಲು ಸಾಧ್ಯವಿಲ್ಲ. ಅದಕ್ಕಾಗಿ ಹಲವಾರು ಅಂಶಗಳನ್ನು ಪರಿಗಣಿಸಬೇಕಾಗುತ್ತದೆ ಎಂದಿದ್ದಾರೆ. ಈ ಪ್ರಶ್ನೆ ಆಗಾಗ ಏಳುತ್ತಲೇ ಇದೆ ಎಂದಿರುವ ಅವರು, “ಲಸಿಕಾಕರಣದ ವ್ಯಾಪಕತೆ ಹೆಚ್ಚಾದಂತೆ, ಶಿಕ್ಷಕರು ಲಸಿಕೆಗೊಳಪಟ್ಟು, ನಾವು ಅಭ್ಯಾಸಗಳನ್ನು ಬದಲಿಸಿಕೊಂಡು ಸಾಮಾಜಿಕ ಅಂತರವನ್ನು ನಮ್ಮ ದಿನನಿತ್ಯದ ಜೀವನದಲ್ಲಿ ಪಾಲಿಸಿದಂತೆ, ಶಾಲೆಗಳನ್ನು ತೆರೆಯಬಹುದಾದಂಥ ಸಮಯ ಬರಬಹುದು” ಎಂದಿದ್ದಾರೆ.
ಇದನ್ನೂ ಓದಿ: ನದಿ ದಾಟಲು ಯತ್ನಿಸಿ ಕೊಚ್ಚಿ ಹೋದ ಈ ಯುವಕ ಬಚಾವ್ ಆಗಿದ್ದು ಹೇಗೆ ನೋಡಿ!
ಮಾತು ಮುಂದುವರೆಸಿದ ಡಾ. ಪೌಲ್, “ಆದರೆ, ಹಲವು ದೇಶಗಳಲ್ಲಿ ಶಾಲೆಗಳನ್ನು ಮತ್ತೆ ತೆರೆಯಲಾದಾಗ, ಕರೊನಾ ಔಟ್ಬ್ರೇಕ್ (ವ್ಯಾಪಕ ಹಬ್ಬುವಿಕೆ) ಕಂಡುಬಂದು ಮತ್ತೆ ಮುಚ್ಚಬೇಕಾಯಿತು ಎನ್ನುವುದನ್ನು ನಾವು ನೆನಪಿಸಿಕೊಳ್ಳಬೇಕು. ಸಾಂಕ್ರಾಮಿಕವು ನಮಗೆ ಹಾನಿ ಉಂಟುಮಾಡುವುದಿಲ್ಲ ಎಂಬುದಾಗಿ ಹೆಚ್ಚು ವಿಶ್ವಾಸ ಮೂಡದ ವಿನಃ ನಾವು ನಮ್ಮ ಮಕ್ಕಳು ಮತ್ತು ಶಿಕ್ಷಕರನ್ನು ಆ ಸನ್ನಿವೇಶಕ್ಕೆ ಈಡುಮಾಡುವುದಿಲ್ಲ” ಎಂದು ಹೇಳಿದ್ದಾರೆ.
ಶಾಲೆಗಳನ್ನು ಪುನಃ ತೆರೆಯುವ ಬಗೆಗಿನ ಚರ್ಚೆಯು ದೊಡ್ಡ ಮಾತುಕತೆಯ ವಿಚಾರವಾಗಿದೆ. ಆದರೆ ಮಕ್ಕಳಲ್ಲಿ ಸೆರೋ ಪ್ರಿವಲೆನ್ಸ್ ಸಮಾನವಾಗಿದೆ ಎಂಬ ಮಾಹಿತಿಯು ಉಪಯುಕ್ತವಾದ ಡೇಟಾ ಎಂದ ಡಾ.ಪೌಲ್, ಈ ಬಗ್ಗೆ ಮತ್ತಷ್ಟು ಡೇಟಾಗಳನ್ನು ಪರಿಗಣಿಸುವ ಅಗತ್ಯವಿದೆ ಎಂದಿದ್ದಾರೆ. (ಏಜೆನ್ಸೀಸ್)
ಪಾಟ್ನದಿಂದ ಲೂಧಿಯಾನಕ್ಕೆ ಗಂಡನನ್ನು ಅರಸಿ ಬಂದ ಯುವತಿ! ಅಪೂರ್ಣ ಮೊಬೈಲ್ ಸಂಖ್ಯೆ ಹಿಡಿದು ಹುಡುಕಾಟ!