ನವದೆಹಲಿ: ನಿನ್ನೆ (ನ.09) ಶ್ರೀಲಂಕಾ ವಿರುದ್ಧ ನಡೆದ ಪಂದ್ಯದಲ್ಲಿ ನ್ಯೂಜಿಲೆಂಡ್ ಭರ್ಜರಿ ಗೆಲುವು ದಾಖಲಿಸಿ, ಸೆಮಿಫೈನಲ್ ಸ್ಥಾನವನ್ನು ಬಹುತೇಕ ಖಚಿತಪಡಿಸಿಕೊಂಡಿದೆ. ಪಾಕಿಸ್ತಾನಕ್ಕೆ ಸೆಮೀಸ್ ಹಾದಿ ಬಹುತೇಕ ಮುಚ್ಚಿದಂತಾಗಿದೆ. ಒಂದು ವೇಳೆ ಪಾಕ್ ಸೆಮೀಸ್ ತಲುಪಬೇಕೆಂದರೆ, ಉಳಿದ ಒಂದು ಪಂದ್ಯದಲ್ಲಿ ಪವಾಡವೇ ಜರುಗಬೇಕಿದೆ. ಆದರೆ, ಅದು ಅಸಾಧ್ಯವಾಗಿದೆ. ಹೀಗಾಗಿ ನಾಯಕ ಬಾಬರ್ ಅಜಾಮ್ ಪಡೆ ತವರಿಗೆ ಮರಳಲು ಗಂಟುಮೂಟೆ ಕಟ್ಟುವುದೇ ಸರಿ ಎಂಬ ಮಾತು ಎಲ್ಲೆಡೆ ಕೇಳಿಬರುತ್ತಿದ್ದು, ಇದರ ನಡುವೆಯೇ ಬಾಬರ್ ಅಜಾಮ್ ನಾವು ಸಮೀಸ್ ತಲುಪುವ ಸಾಮರ್ಥ್ಯವಿದೆ ಎಂದು ಭರವಸೆಯ ಮಾತುಗಳನ್ನಾಡಿದ್ದಾರೆ. ಅಲ್ಲದೆ, ಸಮೀಸ್ಗೆ ತಲುಪಲು ತಮ್ಮದೇ ಸ್ಟ್ರಾಟಜಿಯನ್ನು ವಿವರಿಸಿದ್ದಾರೆ.
ಬಾಬರ್ ಅಜಾಮ್ ಹೇಳಿದ್ದೇನು?
ಶುಕ್ರವಾರ (ನ.10) ಪಂದ್ಯ ಪೂರ್ವ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಬಾಬರ್ ಅಜಾಮ್, ಒಂದು ವೇಳೆ ಫಖರ್ ಜಮಾನ್ ಅವರು 20 ರಿಂದ 30 ಓವರ್ ಕ್ರೀಸ್ನಲ್ಲಿದ್ದರೆ ನಾವು ದೊಡ್ಡ ಸ್ಕೋರ್ ಮಾಡುತ್ತೇವೆ ಎಂದಿದ್ದಾರೆ. ನಿರ್ಣಾಯಕ ಪಂದ್ಯಕ್ಕಾಗಿ ತನ್ನ ತಂಡದ ನೀಲನಕ್ಷೆಯನ್ನು ರೂಪಿಸಿರುವ ಅಜಾಮ್, ಕ್ರಿಕೆಟ್ನಲ್ಲಿ ಯಾವುದೇ ಕ್ಷಣದಲ್ಲಿ ಏನು ಬೇಕಾದರೂ ನಡೆಯಬಹುದು, ನಾವು ಪಂದ್ಯಾವಳಿಯನ್ನು ಉನ್ನತ ಮಟ್ಟದಲ್ಲಿ ಮುಗಿಸಲು ಪ್ರಯತ್ನಿಸುತ್ತೇವೆ ಎಂದು ಹೇಳುವ ಮೂಲಕ ಕ್ರಿಕೆಟ್ನ ಅನಿರೀಕ್ಷಿತ ಸ್ವರೂಪವನ್ನು ಒತ್ತಿ ಹೇಳಿದರು.
ತಮ್ಮ ಪ್ಲಾನ್ ಬಗ್ಗೆ ಮಾತನಾಡಿದ ಅಜಾಮ್, ರನ್ರೇಟ್ ಮೇಲೆ ಹೆಚ್ಚು ಗಮನ ಹರಿಸುವುದಾಗಿ ಹೇಳಿದರು. ಮೊದಲ 10 ಓವರ್ಗಳ ಪ್ರಾಮುಖ್ಯತೆಯನ್ನು ಒತ್ತಿ ಹೇಳಿದ ಅಜಾಮ್, ಫಖರ್ ಜಮಾನ್ ಅವರ ಪ್ರಮುಖ ಪಾತ್ರವನ್ನು ತಿಳಿಸುತ್ತಾ ಬ್ಯಾಟಿಂಗ್ಗೆ ನಿರ್ದಿಷ್ಟ ತಂತ್ರಗಳನ್ನು ವಿವರಿಸಿದರು. ಒಂದು ವೇಳೆ ಫಖರ್ ಜಮಾನ್ ಅವರು 20 ರಿಂದ 30 ಓವರ್ ಕ್ರೀಸ್ನಲ್ಲಿದ್ದರೆ ನಾವು ಅಂದುಕೊಂಡಿದ್ದನ್ನು ಸಾಧಿಸುತ್ತೇವೆ. ಪಂದ್ಯದ ವೇಳೆ ಇಫ್ತಿಕರ್ ಅಹ್ಮದ್ ಮತ್ತು ಮೊಹಮ್ಮದ್ ರಿಜ್ವಾನ್ ಅವರ ಪಾತ್ರವೂ ತುಂಬಾ ಪ್ರಮುಖವಾಗಿರುತ್ತದೆ ಎಂದು ಅಜಮ್ ಆತ್ಮವಿಶ್ವಾಸದಿಂದ ಹೇಳಿದರು.
ಈ ಟೂರ್ನಿಯಲ್ಲಿ ಕೇಳಿಬಂದ ಸಾಕಷ್ಟು ಟೀಕೆಗಳ ಬಗ್ಗೆ ಮಾತನಾಡಿದ ಬಾಬರ್ ಅಜಾಮ್, ನನ್ನ ಮೇಲೆ ಯಾವುದೇ ಒತ್ತಡವಿಲ್ಲ, ನಾನು ಕಳೆದ ಮೂರು ವರ್ಷಗಳಿಂದ ಉತ್ತಮ ಪ್ರದರ್ಶನದೊಂದಿಗೆ ತಂಡವನ್ನು ಮುನ್ನಡೆಸಿದ್ದೇನೆ. ಟಿವಿಯಲ್ಲಿ ಕುಳಿತು ಕೆಲವೊಂದಿಷ್ಟನ್ನು ಹೇಳುವುದು ತುಂಬಾ ಸುಲಭ, ನನಗೆ ಸಲಹೆ ನೀಡಲು ಬಯಸುವವರು ನನ್ನ ದೂರವಾಣಿ ಸಂಖ್ಯೆಗೆ ಸಂಪರ್ಕಿಸಬಹುದು ಎಂದು ತಿರುಗೇಟು ನೀಡಿದರು.
ಪಾಕ್ ಮುಂದಿರುವ ಸವಾಲುಗಳೇನು?
ಕಿವೀಸ್ ಪಡೆ ಲಂಕಾದೊಂದಿಗೆ ದಾಖಲೆಯ ಜಯದೊಂದಿಗೆ ಸಮಿಫೈನಲ್ ಸ್ಥಾನವನ್ನು ಬಹುತೇಕ ಖಚಿತಪಡಿಸಿಕೊಂಡಿದೆ. ಪಾಕ್ ಸಮೀಸ್ ಸ್ಥಾನ ಕಿವೀಸ್ ಫಲಿತಾಂಶದ ಮೇಲೆ ಅವಲಂಬಿತವಾಗಿತ್ತು. ಈಗಲೂ ಪಾಕಿಸ್ತಾನಕ್ಕೆ ಸಮೀಸ್ ಪ್ರವೇಶ ಪಡೆಯಲು ಅವಕಾಶವಿದ್ದರೂ ವಾಸ್ತವವಾಗಿ ಕಿವೀಸ್ ನಾಕೌಟ್ಗೆ ಅರ್ಹತೆ ಪಡೆಯುವ ನಾಲ್ಕನೇ ಮತ್ತು ಅಂತಿಮ ತಂಡವಾಗಿದೆ. ಪಾಕ್ ಸಮೀಸ್ ಹಾದಿ ಪಡೆಯಲು ಇರುವ ಅಸಾಧ್ಯದ ಲೆಕ್ಕಾಚಾರ ಹೀಗಿದೆ. ನ.11ರಂದು ಪಾಕ್, ಇಂಗ್ಲೆಂಡ್ ತಂಡವನ್ನು ಎದುರಿಸಲಿದೆ. ಇದು ಉಭಯ ತಂಡಗಳ ಅಂತಿಮ ಲೀಗ್ ಪಂದ್ಯವಾಗಿದೆ. ಒಂದು ವೇಳೆ ಪಾಕ್ ಮೊದಲ ಬ್ಯಾಟ್ ಮಾಡಿದರೆ 300 ರನ್ಗಳ ಬೃಹತ್ ಗುರಿ ನೀಡಿ, ಎದುರಾಳಿ ತಂಡವನ್ನು ಕೇವಲ 13 ರನ್ಗೆ ಕಟ್ಟಿಹಾಕಬೇಕಿದೆ. ಒಂದು ವೇಳೆ ಪಾಕ್ ಮೊದಲು ಬೌಲಿಂಗ್ ಮಾಡಿದರೆ, ಇಂಗ್ಲೆಂಡ್ ತಂಡವನ್ನು ಕೇವಲ 50 ರನ್ಗಳಿಗೆ ಕಟ್ಟಿಹಾಕಿ, ಕೇವಲ 2.3 ಓವರ್ಗಳಲ್ಲಿ 50 ರನ್ಗಳನ್ನು ಗಳಿಸಬೇಕಿದೆ. ಆದರೆ, ಇದು ಅಸಾಧ್ಯದ ಮಾತು. ಅಷ್ಟಕ್ಕೂ ಪಾಕ್ ಎದುರಿಸುತ್ತಿರುವ ತಂಡ ಕಿಕೆಟ್ ಶಿಶುವಲ್ಲ ಬದಲಾಗಿ ಕ್ರಿಕೆಟ್ ಜನಕನಾಗಿದ್ದು, ಪಾಕ್ ಸಮೀಸ್ ಆಸೆಯನ್ನು ಮರೆಯುವುದೇ ಒಳಿತು. (ಏಜೆನ್ಸೀಸ್)
ಪಾಕ್ ಮುಂದಿರೋದು ಅಂತಿಂಥ ಸವಾಲಲ್ಲ ತಿಪ್ಪರಲಾಗ ಹಾಕಿದ್ರೂ ಆಗಲ್ಲ! ಈ ನಾಲ್ವರ ನಡುವೆ ಸೆಮೀಸ್ ಕದನ ಫಿಕ್ಸ್