ಅಂತಾರಾಷ್ಟ್ರೀಯ ಕ್ರಿಕೆಟ್​ನಲ್ಲಿ 12 ವರ್ಷ ಪೂರೈಸಿದ ವಿರಾಟ್​ ಕೊಹ್ಲಿ

ನವದೆಹಲಿ: ಟೀಮ್​ ಇಂಡಿಯಾ ನಾಯಕ ವಿರಾಟ್​ ಕೊಹ್ಲಿ ಮಂಗಳವಾರ ಅಂತಾರಾಷ್ಟ್ರೀಯ ಕ್ರಿಕೆಟ್​ನಲ್ಲಿ 12 ವರ್ಷ ಪೂರೈಸಿದ್ದಾರೆ. 2008ರ ಆಗಸ್ಟ್​ 18ರಂದು ಶ್ರೀಲಂಕಾ ವಿರುದ್ಧ ಡಂಬುಲಾದಲ್ಲಿ ಏಕದಿನ ಪಂದ್ಯ ಆಡುವ ಮೂಲಕ ಅವರು 19 ವರ್ಷದ ಯುವ ಬ್ಯಾಟ್ಸ್​ಮನ್​ ಆಗಿ ಭಾರತ ತಂಡದ ಪರ ಪದಾರ್ಪಣೆ ಮಾಡಿದ್ದರು.

ಮೊದಲ ಪಂದ್ಯದಲ್ಲಿ ಆರಂಭಿಕನಾಗಿ ಗೌತಮ್​ ಗಂಭೀರ್​ ಜತೆಗೆ ಇನಿಂಗ್ಸ್​ ಆರಂಭಿಸಿದ್ದ ವಿರಾಟ್​ ಕೊಹ್ಲಿ ಕೇವಲ 12 ರನ್​ ಗಳಿಸಿ ಔಟಾಗಿದ್ದರು. ಭಾರತ ತಂಡವೂ 146 ರನ್​ಗೆ ಆಲೌಟ್​ ಆಗಿದ್ದ ಆ ಪಂದ್ಯದಲ್ಲಿ ಶ್ರೀಲಂಕಾ ವಿರುದ್ಧ 8 ವಿಕೆಟ್​ಗಳಿಂದ ಸೋಲು ಕಂಡಿತ್ತು. ಆದರೆ ಆ ಬಳಿಕ ಕಳೆದ 12 ವರ್ಷಗಳಲ್ಲಿ ಭಾರತ ತಂಡ ಎಂದೂ ಶ್ರೀಲಂಕಾ ವಿರುದ್ಧ ದ್ವಿಪಕ್ಷೀಯ ಸರಣಿ ಸೋತಿದ್ದಿಲ್ಲ.

ಕಳೆದ 12 ವರ್ಷಗಳಲ್ಲಿ ವಿಶ್ವದ ಸ್ಟಾರ್​ ಬ್ಯಾಟ್ಸ್​ಮನ್​ ಆಗಿ ಬೆಳೆದಿರುವ ವಿರಾಟ್​ ಕೊಹ್ಲಿ, ಹಲವಾರು ದಾಖಲೆಗಳ ಒಡೆಯರೂ ಆಗಿದ್ದಾರೆ. ಮೂರೂ ಕ್ರಿಕೆಟ್​ ಪ್ರಕಾರಗಳಲ್ಲಿ ಅವರು ರನ್​ ಪ್ರವಾಹವನ್ನೇ ಹರಿಸಿದ್ದಾರೆ. ಆರ್​ಸಿಬಿ ಫ್ರಾಂಚೈಸಿ ಮಂಗಳವಾರ ವಿರಾಟ್​ ಕೊಹ್ಲಿ 2008ರಿಂದ ನಿರ್ಮಿಸಿರುವ ವಿವಿಧ ದಾಖಲೆಗಳನ್ನು ಟ್ವಿಟರ್​ನಲ್ಲಿ ಮೆಲುಕು ಹಾಕಿದೆ. ಬಿಸಿಸಿಐ ಕೂಡ ಟ್ವಿಟರ್​ ಖಾತೆಯಲ್ಲಿ ವಿರಾಟ್​ ಕೊಹ್ಲಿ ಅವರ 12 ವರ್ಷಗಳ ವೃತ್ತಿಜೀವನಕ್ಕೆ ಅಭಿನಂದನೆ ಸಲ್ಲಿಸಿದೆ.

ಇದನ್ನೂ ಓದಿ: ಇಂದಿನಿಂದ ಕೆರಿಬಿಯನ್ ಟಿ20 ಹಬ್ಬ, ಭಾರತದಲ್ಲಿ ನೇರಪ್ರಸಾರವಾಗುವ ಚಾನಲ್ ಯಾವುದು ಗೊತ್ತೇ?

12 ವರ್ಷಗಳಲ್ಲಿ ಭಾರತ ತಂಡದ ಪರ 86 ಟೆಸ್ಟ್​ ಮತ್ತು 248 ಏಕದಿನ ಪಂದ್ಯಗಳನ್ನು ಆಡಿರುವ ಅವರು ಕ್ರಮವಾಗಿ 7,240 ಮತ್ತು 11,867 ರನ್​ ಸಿಡಿಸಿದ್ದಾರೆ. 82 ಟಿ20 ಪಂದ್ಯಗಳಲ್ಲಿ 2,794 ರನ್​ ಬಾರಿಸಿದ್ದಾರೆ. ಅಂತಾರಾಷ್ಟ್ರೀಯ ಕ್ರಿಕೆಟ್​ನಲ್ಲಿ ಒಟ್ಟಾರೆ 70 (ಟೆಸ್ಟ್​ 27, ಏಕದಿನ 43) ಶತಕಗಳನ್ನೂ ಸಿಡಿಸಿದ್ದಾರೆ. ಟೆಸ್ಟ್​ನಲ್ಲಿ 22, ಏಕದಿನದಲ್ಲಿ 58 ಮತ್ತು ಟಿ20ಯಲ್ಲಿ 24 ಅರ್ಧಶತಕಗಳನ್ನೂ ಬಾರಿಸಿದ್ದಾರೆ. ಮೂರೂ ಕ್ರಿಕೆಟ್​ ಪ್ರಕಾರಗಳಲ್ಲಿ 50ಕ್ಕಿಂತ ಹೆಚ್ಚಿನ ಸರಾಸರಿಯಲ್ಲಿ ರನ್​ ಬಾರಿಸಿದ್ದಾರೆ.

ಏಕದಿನ ಕ್ರಿಕೆಟ್​ನಲ್ಲಿ ಅತಿವೇಗದ 8, 9, 10, 11 ಸಾವಿರ ರನ್​ ಪೂರೈಸಿದ ವಿಶ್ವದಾಖಲೆ ಕೊಹ್ಲಿ ಹೆಸರಿನಲ್ಲಿದೆ. ದ್ವಿಪಕ್ಷೀಯ ಸರಣಿಯೊಂದರಲ್ಲಿ ಗರಿಷ್ಠ ರನ್​ (558 ರನ್​, ದಕ್ಷಿಣ ಆಫ್ರಿಕಾ ವಿರುದ್ಧ 2018ರಲ್ಲಿ) ಸಿಡಿಸಿದ ಸಾಧನೆಯೂ ಅವರದಾಗಿದೆ. ರನ್​ ಚೇಸಿಂಗ್​ ವೇಳೆ ಗರಿಷ್ಠ 26 ಶತಕ ಸಿಡಿಸಿದ ದಾಖಲೆ ಹೊಂದಿದ್ದಾರೆ. 2018ರಲ್ಲಿ ಕ್ಯಾಲೆಂಡರ್​ ವರ್ಷವೊಂದರಲ್ಲಿ ಅತಿವೇಗವಾಗಿ ಸಾವಿರ ರನ್​ (11 ಇನಿಂಗ್ಸ್​) ಪೂರೈಸಿದ ವಿಶ್ವದಾಖಲೆ ಬರೆದಿದ್ದಾರೆ. ವಿಶ್ವಕಪ್​ನಲ್ಲಿ ಸತತ 5 ಇನಿಂಗ್ಸ್​ಗಳಲ್ಲಿ 50 ಪ್ಲಸ್​ ರನ್​ ಬಾರಿಸಿದ ಮೊದಲ ನಾಯಕರೆನಿಸಿದ್ದಾರೆ. ನಾಯಕನಾಗಿ ಅತಿವೇಗವಾಗಿ 3 ಸಾವಿರ ರನ್​ ಪೂರೈಸಿದ ದಾಖಲೆ ಬರೆದಿದ್ದಾರೆ. ನಾಯಕನಾಗಿ ಕ್ಯಾಲೆಂಡರ್​ ವರ್ಷವೊಂದರಲ್ಲಿ ಗರಿಷ್ಠ 1460 ರನ್​ ಬಾರಿಸಿದ್ದಾರೆ. ಕ್ಯಾಲೆಂಡರ್​ ವರ್ಷವೊಂದರಲ್ಲಿ ಗರಿಷ್ಠ 6 ಶತಕ ಸಿಡಿಸಿದ ನಾಯಕರೆನಿಸಿದ್ದಾರೆ.

ಟಿ20 ಕ್ರಿಕೆಟ್​ನಲ್ಲಿ ಅವರು ಕ್ಯಾಲೆಂಡರ್​ ವರ್ಷವೊಂದರಲ್ಲಿ (2016) 600ಕ್ಕೂ ಅಧಿಕ ರನ್​ ಸಿಡಿಸಿದ ವಿಶ್ವದ ಮೊದಲ ಬ್ಯಾಟ್ಸ್​ಮನ್​ ಎನಿಸಿದ್ದಾರೆ. ಟಿ20 ವಿಶ್ವಕಪ್​ ಒಂದರಲ್ಲಿ ಗರಿಷ್ಠ 319 ರನ್​ (2014ರ ವಿಶ್ವಕಪ್​) ಸಿಡಿಸಿದ ದಾಖಲೆ ಹೊಂದಿದ್ದಾರೆ. ಟಿ20 ಕ್ರಿಕೆಟ್​ನಲ್ಲಿ ಗರಿಷ್ಠ ರನ್​ ಗಳಿಸಿದ ದಾಖಲೆ ಹೊಂದಿದ್ದಾರೆ. 2014 ಮತ್ತು 2016ರ ಟಿ20 ವಿಶ್ವಕಪ್​ಗಳಲ್ಲಿ ಸರಣಿಶ್ರೇಷ್ಠ ಪ್ರಶಸ್ತಿ ಸಂಪಾದಿಸಿದ್ದರು.

ಟೆಸ್ಟ್​ ಕ್ರಿಕೆಟ್​ನಲ್ಲಿ ಗರಿಷ್ಠ 9 ಬಾರಿ 150 ಪ್ಲಸ್​ ರನ್​ ಬಾರಿಸಿದ ನಾಯಕರೆನಿಸಿದ್ದಾರೆ. ಭಾರತೀಯ ನಾಯಕನಾಗಿ ಟೆಸ್ಟ್​ ಕ್ರಿಕೆಟ್​ನಲ್ಲಿ ಗರಿಷ್ಠ 5,142 ರನ್​ ಬಾರಿಸಿದ ಸಾಧನೆ ಮಾಡಿದ್ದಾರೆ. ಭಾರತೀಯ ಬ್ಯಾಟ್ಸ್​ಮನ್​ ಒಬ್ಬ ಗರಿಷ್ಠ 7 ದ್ವಿಶತಕ ಸಿಡಿಸಿದ ದಾಖಲೆ ಬರೆದಿದ್ದಾರೆ. ಸತತ 4 ಟೆಸ್ಟ್​ ಸರಣಿಗಳಲ್ಲಿ ದ್ವಿಶತಕ ಬಾರಿಸಿದ ವಿಶ್ವದ ಮೊದಲ ಬ್ಯಾಟ್ಸ್​ಮನ್​ ಎನಿಸಿದ್ದಾರೆ. ನಾಯಕನಾಗಿ ಅತಿವೇಗದ 4 ಸಾವಿರ ರನ್​ ಪೂರೈಸಿದ ವಿಶ್ವದಾಖಲೆ ಹೊಂದಿದ್ದಾರೆ. ಸತತ 3 ಕ್ಯಾಲೆಂಡರ್​ ವರ್ಷಗಳಲ್ಲಿ ಸಾವಿರ ರನ್​ ಪೂರೈಸಿದ ಮೊದಲ ಭಾರತೀಯ ಮತ್ತು ನಾಯಕ ಆಗಿದ್ದಾರೆ.

On this day in 2008, a young @imVkohli donned the #TeamIndia jersey for the first time and as they say the rest is history.

Here's congratulating #TeamIndia Captain on #12YearsOfVirat pic.twitter.com/ietcVCDfrG

— BCCI (@BCCI) August 18, 2020

As we celebrate #12YearsOfViratKohli take a look at one his fine knocks (154*) against New Zealand in Mohali.@imVkohli pic.twitter.com/W5SrUAkEBE

— BCCI (@BCCI) August 18, 2020

3️⃣ Formats.
1️⃣2️⃣ Years.
Countless Records.

He is called the G.O.A.T for a reason! #PlayBold #12YearsOfViratKohli pic.twitter.com/V6bIIZ21IP

— Royal Challengers Bangalore (@RCBTweets) August 18, 2020