ಜಿನೇವಾ: ವಿಶ್ವ ಆರೋಗ್ಯ ಸಂಸ್ಥೆ (ಡಬ್ಲ್ಯುಎಚ್ಒ) ಕೋವಿಡ್ 19 ಕರೊನಾ ವೈರಸ್ ಸೋಂಕು ಹರಡದಂತೆ ತಡೆಯುವ ಸಲುವಾಗಿ ಇದೀಗ ಕಾರ್ಟೂನ್ ಸ್ಟಾರ್ ಮಿಸ್ಟರ್ ಬೀನ್ ನೆರವನ್ನೂ ಯಾಚಿಸಿದೆ. ಮಿಸ್ಟರ್ ಬೀನ್ ಜಾಗತಿಕ ಮಟ್ಟದಲ್ಲಿ ಪ್ರಭಾವಿಯಾಗಿರುವುದೇ ಇದಕ್ಕೆ ಕಾರಣ.
ಡಬ್ಲ್ಯುಎಚ್ಒ ಇತ್ತೀಚೆಗೆ “ಮಿಸ್ಟರ್ ಬೀನ್’ಸ್ ಎಸೆನ್ಶಿಯಲ್ ಕೋವಿಡ್ -19 ಚೆಕ್ಲಿಸ್ಟ್” ಎಂಬ ವಿಡಿಯೋವನ್ನು ಬಿಡುಗಡೆ ಮಾಡಿದೆ. ಪ್ರಾಜೆಕ್ಟ್ ಎವರಿಒನ್ ಆ್ಯಂಡ್ ಟೈಗರ್ ಆಸ್ಪೆಕ್ಟ್ ಪ್ರೊಡಕ್ಷನ್ಸ್ ಈ ವಿಚಾರದಲ್ಲಿ ಪಬ್ಲಿಕ್ ಸರ್ವೀಸ್ ಅನೌನ್ಸ್ಮೆಂಟ್ಗೆ ಡಬ್ಲ್ಯುಎಚ್ಒಗೆ ಸಾಥ್ ನೀಡಿದೆ. ಮೂವತ್ತು ಸೆಕೆಂಡ್ನ ಈ ವಿಡಿಯೋದಲ್ಲಿ ಕೈತೊಳೆಯುವುದು, ದೈಹಿಕ ಅಂತರ, ನೆರೆಯವರೊಂದಿಗೆ ಕರುಣೆ, ಸಹಾನುಭೂತಿಯಿಂದ ನಡೆದುಕೊಳ್ಳುವುದು ಸೇರಿದಂತೆ ಮಾಡಬೇಕಾದ ಅಂಶಗಳ ಚೆಕ್ಲಿಸ್ಟ್ ಪ್ರದರ್ಶಿಸಲಾಗಿದೆ.
ಇದನ್ನೂ ಓದಿ: ಗಂಟಲು ದ್ರವ ಮಾದರಿ ಸಂಗ್ರಹಕ್ಕೆ ಎಷ್ಟು ರೂಪಾಯಿ ಕೊಡಬೇಕು ಗೊತ್ತಾ?
ಮನುಷ್ಯ ಬದುಕಿನ ಪ್ರತಿ ಹೆಜ್ಜೆಯ ಮೇಲೂ ಕೋವಿಡ್ 19 ಪರಿಣಾಮ ಆಗುತ್ತಿದ್ದು, ಜಗತ್ತಿನಾದ್ಯಂತ ನಾವು ಎಲ್ಲರೂ ಬಹಳ ಮುಂಜಾಗ್ರತೆಯನ್ನು ತೆಗೆದುಕೊಳ್ಳಬೇಕು. ಬದುಕಿನ ಶೈಲಿಯನ್ನು ಬದಲಿಸಿಕೊಳ್ಳಬೇಕು. ಜಾಗೃತಿ ಮೂಡಿಸುವಲ್ಲಿ ನಮಗೆ ಮಿಸ್ಟರ್ ಬೀನ್ ಕೈಜೋಡಿಸಿದ್ದಾರೆ ಎಂದು ಡಬ್ಲ್ಯುಎಚ್ಒ ಡೈರೆಕ್ಟರ್ ಜನರಲ್ ಡಾ.ಟೆಡ್ರೋಸ್ ಅಧನೋಮ್ ಘೆಬ್ರೆಯೆಸೆಸ್ ಹೇಳಿದ್ದಾರೆ.
ಮಿಸ್ಟರ್ ಬೀನ್ ಪಾತ್ರ 1990ರ ದಶಕದಲ್ಲಿ ಪರಿಚಯಿಸಲ್ಪಟ್ಟಿದ್ದು, ಅದಕ್ಕೂ ಈಗ 30ನೇ ವರ್ಷ. ಮಿಸ್ಟರ್ ಬೀನ್ ಎಂಬುದು ವಯಸ್ಕರ ಶರೀರದೊಳಗಿನ ಮಗುವಿನ ಪಾತ್ರವಾಗಿದ್ದು ಫೇಸ್ಬುಕ್ ಪುಟದಲ್ಲಿ ಭಾರತ, ಬ್ರೆಜಿಲ್, ಇಂಡೋನೇಷ್ಯಾ ಸೇರಿ ಜಗತ್ತಿನಾದ್ಯಂತ ಹತ್ತು ಕೋಟಿಯಷ್ಟು ಫಾಲೋಯರ್ಸ್ ಇದ್ದಾರೆ. (ಏಜೆನ್ಸೀಸ್)