ಮುಂಬಯಿ: ಡೇವಿಡ್ ಧವನ್ ಪುತ್ರ ವರುಣ್ ಧವನ್ ಸದ್ಯ ತಮ್ಮ ಚಿತ್ರ ಭೇಡಿಯಾ ಪ್ರಮೋಷನ್ನಲ್ಲಿ ತೊಡಗಿಸಿಕೊಂಡಿದ್ದಾರೆ. ಭೇಡಿಯಾ ಸಿನೆಮಾದಲ್ಲಿ ದಿಲ್ವಾಲೆ ಸಿನೆಮಾದ ಕೃತಿ ಮೆನನ್ ಜೊತೆ ನಟಿಸಿದ್ದಾರೆ. ಎಲ್ಲೆಲ್ಲಿ ಸಾಧ್ಯವೋ, ಅಲ್ಲಲ್ಲಿ ಸಿನಿಮಾ ಪ್ರಚಾರ ಮಾಡುತ್ತಿರುವ ಧವನ್ ಇತ್ತೀಚೆಗೆ ತಮ್ಮ ಆರೋಗ್ಯ ಸಮಸ್ಯೆ ಬಗ್ಗೆ ಹೇಳಿಕೊಂಡಿದ್ದಾರೆ.
ಇತ್ತೀಚೆಗೆ ಒಂದು ಸಂವಾದದಲ್ಲಿ ಮಾತನಾಡುವಾಗ ತಮಗಿದ್ದ ಆರೋಗ್ಯ ಸಮಸ್ಯೆ ಯಾವುದೆಂದು ಹೇಳಿಕೊಂಡಿದ್ದಾರೆ. ಧವನ್ ವೆಸ್ಟಿಬ್ಯುಲಾರ್ ಹೈಪೋಫಂಕ್ಷನ್ ಎಂಬ ಒಳಕಿವಿಯ ಸಮಸ್ಯೆಯಿಂದ ಬಳಲುತ್ತಿದ್ದರು.
‘ನನಗೆ ಏನಾಗಿತ್ತು ಎಂದು ತಿಳಿದಿರಲಿಲ್ಲ. ನಾನು ವೆಸ್ಟಿಬುಲರ್ ಹೈಪೋಫಂಕ್ಷನ್ ಎಂಬ ಸಮಸ್ಯೆಯಿಂದ ಬಳಲುತ್ತಿದ್ದೇನೆ. ಇದರಲ್ಲಿ ನೀವು ಬ್ಯಾಲೆನ್ಸ್ ತಪ್ಪುತ್ತೀರಿ’ ಎಂದು ವರುಣ್ ಧವನ್ ಕಾರ್ಯಕ್ರಮದಲ್ಲಿ ಹೇಳಿದ್ದರು.
ವೆಸ್ಟಿಬ್ಯುಲಾರ್ ಹೈಪೋಫಂಕ್ಷನ್ ಎಂದರೆ ಏನು ಗೊತ್ತಾ?
ಒಳಕಿವಿಯಲ್ಲಿ ನಮ್ಮ ದೇಹವನ್ನು ಸಮತೋಲನದಲ್ಲಿ ಇಡಲು ಒಂದು ವ್ಯವಸ್ಥೆ ಇದೆ. ಈ ಭಾಗ ಸರಿಯಾಗಿ ಕಾರ್ಯ ನಿರ್ವಹಿಸದಿದ್ದಾಗ ವೆಸ್ಟಿಬ್ಯುಲಾರ್ ಹೈಪೋಫಂಕ್ಷನ್ ಆಗುತ್ತದೆ. ಈ ಭಾಗ ಕಣ್ಣು ಮತ್ತು ಕಿವಿಯ ಸ್ನಾಯುಗಳೊಡನೆ ಕೆಲಸ ಮಾಡುತ್ತದೆ. ಸಮಸ್ಯೆ ಉಂಟಾದಾಗ ಈ ಭಾಗ ಮೆದುಳಿಗೆ ತಪ್ಪು ಸಂದೇಶ ರವಾನಿಸುತ್ತದೆ. ಆಗ ವ್ಯಕ್ತಿಗೆ ಪದೇ ಪದೇ ತಲೆಸುತ್ತುವ ಅನುಭವ ಆಗುತ್ತದೆ. (ಏಜೆನ್ಸೀಸ್)