ನವದೆಹಲಿ: ಕೋವಿಶೀಲ್ಡ್ ಲಸಿಕೆ ಗೊತ್ತಿಲ್ಲವೇ? ಎರಡು ವರ್ಷಗಳ ಕಾಲ ಭಾರತ ಸೇರಿದಂತೆ ಜಗತ್ತನ್ನು ಕಾಡಿದ್ದ ಕೋವಿಡ್ ಹೆಮ್ಮಾರಿ ನಿಯಂತ್ರಿಸುವ ಭಾರತೀಯ ಲಸಿಕೆ ಇದು. ಈ ಲಸಿಕೆ ತಯಾರಿಸುವ ಭಾರತದ ಔಷಧ ಉದ್ಯಮಿ ಈಗ ಬ್ರಿಟನ್ ರಾಜಧಾನಿ ಲಂಡನ್ನಲ್ಲಿ ಮನೆಯೊಂದನ್ನು ಖರೀದಿಸಲು ಮುಂದಾಗಿದ್ದಾರೆ. ಈ ಮನೆ ಖರೀದಿಗೆ ಅವರು ನೀಡುತ್ತಿರುವ ಹಣ ಎಷ್ಟು ಗೊತ್ತೇ?
ಬರೋಬ್ಬರಿ 1446 ಕೋಟಿ ರೂಪಾಯಿ.
ಲಸಿಕೆ ತಯಾರಕರಾದ ಅದರ್ ಪೂನಾವಾಲಾ ಅವರೇ ಲಂಡನ್‌ನ ಅತ್ಯಂತ ದುಬಾರಿ ಮನೆಯನ್ನು 1446 ಕೋಟಿ ರೂಪಾಯಿಗೆ ಖರೀದಿಸಲಿದ್ದಾರೆ. ಸೀರಮ್ ಇನ್‌ಸ್ಟಿಟ್ಯೂಟ್ ಆಫ್ ಇಂಡಿಯಾ (ಎಸ್ಐಐ) ಕಂಪನಿಯ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ (ಸಿಇಒ) ಆಗಿರುವ ಅದರ್ ಪೂನಾವಾಲಾ ಅವರು ಈ ವರ್ಷದಲ್ಲೇ ಈ ಐಷಾರಾಮಿ ಮನೆ ಖರೀದಿಸುತ್ತಿದ್ದಾರೆ.
ಕೋವಿಶೀಲ್ಡ್ ಲಸಿಕೆ ತಯಾರಿಸುವ 42 ವರ್ಷದ ಭಾರತೀಯ ಉದ್ಯಮಿ ಅದರ್ 25,000 ಚದರ ಅಡಿಯ ಈ ಮಹಲಿನ ಒಪ್ಪಂದವನ್ನು 13 ಕೋಟಿ ಪೌಂಡ್ಗೆ ಮಾಡಿಕೊಂಡಿದ್ದಾರೆ. ಪೊಲೆಂಡಿನ ದಿವಂಗತ ಉದ್ಯಮಿ ಜಾನ್ ಕುಲ್ಸ್ಜಿಕ್ ಅವರ ಮಗಳು ಡೊಮಿನಿಕಾ ಕುಲ್ಸ್ಜಿಕ್ ಅವರೊಂದಿಗೆ ಮನೆ ಖರೀದಿ ಒಪ್ಪಂದಕ್ಕೆ ಬಂದಿದ್ದಾರೆ.
1920ರ ದಶಕದಲ್ಲಿ ನಿರ್ಮಾಣ ಮಾಡಲಾದ ಅರಮನೆ ಇದಾಗಿದೆ. ಅಬರ್ಕಾನ್ವೇ ಹೌಸ್ ಈ ಮಹಲಿನ ಹೆಸರು. ಬ್ರಿಟನ್ಗೆ ತೆರಳಿದ ಸಂದರ್ಭದಲ್ಲಿ ಈ ಮನೆಯು ಅದರ್ ಅವರ ಕುಟುಂಬ ಹಾಗೂ ಕಂಪನಿಯ ಅಧಿಕಾರಿಗಳ ಬಳಕೆ ಬರಲಿದೆ ಎನ್ನಲಾಗಿದೆ.
ಹೈಡ್ ಪಾರ್ಕ್ ಬಳಿಯ ಬೆಲೆಬಾಳುವ ಮೇಫೇರ್ ಪ್ರದೇಶದಲ್ಲಿರುವ ಈ ಆಸ್ತಿಯನ್ನು ಪೂನಾವಾಲಾ ಕುಟುಂಬ ನಡೆಸುವ ಎಸ್ಐಐ ಕಂಪನಿಯ ಬ್ರಿಟನ್ ಅಂಗಸಂಸ್ಥೆಯಾದ ಸೀರಮ್ ಲೈಫ್ ಸೈನ್ಸಸ್ ಸ್ವಾಧೀನಪಡಿಸಿಕೊಳ್ಳಲಿದೆ.
.
2020ರಲ್ಲಿ 21 ಕೋಟಿ ಪೌಂಡ್ಗೆ ಮಾರಾಟ ಮಾಡಲಾದ 2-8a ರಟ್‌ಲ್ಯಾಂಡ್ ನಿವಾಸದ ನಂತರ ಮಾರಾಟಗೊಳ್ಳುತ್ತಿರುವ ಎರಡನೇ ಅತಿದುಬಾರಿ ಮನೆ ಇದಾಗಿದೆ.