ವಿಶ್ವಸಂಸ್ಥೆ: ಕರೊನಾ COVID19 ವೈರಸ್ ಸೋಂಕು ತಡೆಯ ಜಾಗತಿಕ ಸಮರದಲ್ಲಿ ಇತರೆ ದೇಶಗಳಿಗೆ ನೆರವು ನೀಡುತ್ತಿರುವ ಭಾರತದ ಕ್ರಮವನ್ನು ವಿಶ್ವಸಂಸ್ಥೆ ಮುಖ್ಯಸ್ಥ ಆಂಟೊನಿಯೊ ಗುಟೆರಸ್ ಪ್ರಶಂಸಿದ್ದಾರೆ. ಮಲೇರಿಯಾ ನಿರೋಧಕ ಹೈಡ್ರೋಕ್ಸಿಕ್ಲೋರೋಕ್ವಿನ್ ಎಂಬ ಮಲೇರಿಯಾ ನಿರೋಧಕ ಔಷಧವನ್ನು ಸಾಕಷ್ಟು ಪ್ರಮಾಣದಲ್ಲಿ ಬೇರೆ ದೇಶಗಳಿಗೂ ಕಳುಹಿಸುತ್ತಿರುವ ಭಾರತ, ಆ ಮೂಲಕ ಜಗತ್ತಿನ ವಿವಿಧ ರಾಷ್ಟ್ರಗಳ ಪಾಲಿಗೆ ಆಶಾಕಿರಣವಾಗಿ ಕಂಡುಬಂದಿತ್ತು. ಅವರು ಕೂಡ ಈ ಔಷಧವನ್ನು ಕರೊನಾ ಸೋಂಕು ತಡೆಯಲು ಬಳಸುತ್ತಿದ್ದು, ಭಾರತಕ್ಕೆ ಧನ್ಯವಾದಗಳನ್ನು, ಔಷಧ ಕಳುಹಿಸಿದ ನಡೆಗೆ ಮೆಚ್ಚುಗೆಯನ್ನೂ ಸೂಚಿಸಿದ್ದವು.
ಹೈಡ್ರೋಕ್ಸಿಕ್ಲೋರೋಕ್ವಿನ್ ಔಷಧವನ್ನು ಅಮೆರಿಕದ ಫುಡ್ ಆ್ಯಂಡ್ ಡ್ರಗ್ ಅಡ್ಮಿನಿಸ್ಟ್ರೇಷನ್ ಸಂಭಾವ್ಯ ಚಿಕಿತ್ಸಾ ಔಷಧವೆಂದು ಗುರುತಿಸಿದ್ದು, ನ್ಯೂಯಾರ್ಕ್ನಲ್ಲಿ 1,500ಕ್ಕೂ ಹೆಚ್ಚು ರೋಗಿಗಳ ಮೇಲೆ ಪ್ರಯೋಗಿಸಿದೆ. ಅಲ್ಲಿ ಅದಕ್ಕೆ ಯಶಸ್ಸು ಸಿಕ್ಕಿದ್ದು, ಇದರೊಂದಿಗೆ ಈ ಔಷಧದ ಬೇಡಿಕೆ ಹೆಚ್ಚಾಗಿದೆ. ಭಾರತವೂ ಮಾನವೀಯತೆ ನೆಲೆಯಲ್ಲಿ ಔಷಧವನ್ನು ನೇರವಾಗಿ ರಫ್ತು ಮಾಡುವುದರ ಮೇಲಿನ ನಿರ್ಬಂಧವನ್ನು ಸಡಿಲಿಸಿದೆ.
ಇದೀಗ ವಿಶ್ವಸಂಸ್ಥೆಯ ಸೆಕ್ರೆಟರಿ ಜನರಲ್ ಆಂಟೋನಿಯೋ ಗುಟರೆಸ್ ಕೂಡ ಭಾರತದ ಕ್ರಮಕ್ಕೆ ಪ್ರಶಂಸೆ ವ್ಯಕ್ತಪಡಿಸಿದ್ದು, ಕರೊನಾ ಸೋಂಕು ತಡೆಯುವಲ್ಲಿ ಜಾಗತಿಕವಾಗಿ ಕಂಡುಬಂದಿರುವ ಈ ಒಗ್ಗಟ್ಟು ಉತ್ತಮ ಬೆಳವಣಿಗೆ ಎಂದಿದ್ದಾರೆ. ಅಲ್ಲದೆ, ಈ ಸಂದರ್ಭದಲ್ಲಿ ಯಾವ ರಾಷ್ಟ್ರಗಳೆಲ್ಲ ನೆರವು ನೀಡುವುದಕ್ಕೆ ಶಕ್ತವಾಗಿವೆಯೋ ಆ ರಾಷ್ಟ್ರಗಳು ಉಳಿದ ರಾಷ್ಟ್ರಗಳಿಗೆ ನೆರವು ನೀಡುತ್ತಿವೆ. ಇದು ಖುಷಿಯ ವಿಚಾರ ಎಂದು ಹೇಳಿದ್ದಾರೆ.
ಕರೊನಾ ವೈರಸ್ ಸೋಂಕು ಹರಡುತ್ತಿದ್ದಂತೆ, ಹೈಡ್ರೋಕ್ಸಿಕ್ಲೋರೋಕ್ವಿನ್ ಔಷಧವನ್ನು ಬೇರೆ ಬೇರೆ ದೇಶಗಳಿಗೆ ಕಳುಹಿಸಿಕೊಡುವ ಭಾರತದ ಪ್ರಯತ್ನಕ್ಕೆ ಸಂಬಂಧಿಸಿ ಗುಟೆರಸ್ ಮೇಲಿನ ಪ್ರತಿಕ್ರಿಯೆ ನೀಡಿದ್ದಾರೆ. ಸದ್ಯ ಭಾರತ ಕರೊನಾ ಪೀಡಿತ 55 ರಾಷ್ಟ್ರಗಳಿಗೆ ಈ ಔಷಧವನ್ನು ಕಳುಹಿಸಿಕೊಡುವ ಪ್ರಯತ್ನದಲ್ಲಿದೆ. ಅಮೆರಿಕ, ಮಾರಿಷಸ್, ಸೇಚೆಲ್ಲಸ್ ಈಗಾಗಲೇ ಈ ಔಷಧ ಪಡೆದುಕೊಂಡಿದ್ದು, ಉಳಿದವುಗಳಿಗೆ ಶೀಘ್ರದಲ್ಲೇ ಸಿಗಲಿದೆ.
ನೆರೆಯಲ್ಲಿರುವ ಆಫ್ಘನ್, ಭೂತಾನ್, ನೇಪಾಳ, ಬಾಂಗ್ಲಾದೇಶ, ಮಾಲ್ಡೀವ್ಸ್, ಮಾರಿಷಸ್, ಶ್ರೀಲಂಕಾ, ಮ್ಯಾನ್ಮಾರ್ಗಳಿಗೆ ಕೂಡ ಭಾರತ ಔಷಧ ಕಳುಹಿಸುತ್ತಿದೆ. ಇದಲ್ಲದೆ, ಝಾಂಬಿಯಾ, ಡೊಮಿನಿಕನ್ ರಿಪಬ್ಲಿಕ್, ಮಡ್ಗಾಸ್ಕರ್, ಉಗಾಂಡ, ಬರ್ಕಿನಾ ಫಾಸೋ, ನಿಗರ್, ಮಾಲಿ, ಕಾಂಗೊ, ಈಜಿಪ್ಟ್, ಅರ್ಮೇನಿಯಾ, ಕಜಕ್ಸ್ತಾನ್, ಈಕ್ವಡಾರ್, ಜಮೈಕಾ, ಸಿರಿಯಾ, ಉಕ್ರೇನ್, ಚಾದ್, ಜಿಂಬಾಬ್ವೆ, ಫ್ರಾನ್ಸ್, ಜೋರ್ಡಾನ್, ಕೀನ್ಯಾ, ನೆದರ್ಲೆಂಡ್, ನೈಜೀರಿಯಾ, ಒಮನ್, ಪೆರುಗಳಿಗೂ ಈ ಔಷಧವನ್ನು ಭಾರತ ಪೂರೈಸುತ್ತಿದೆ. (ಏಜೆನ್ಸೀಸ್)