ಬೀಜಿಂಗ್: ಒಂದೇ ಒಂದು ಆ್ಯಪಲ್! ಅದರಿಂದಾಗಿ ಆಯಿತು ಬಹುದೊಡ್ಡ ಅನಾಹುತ. ಪರಿಣಾಮ ಏನು ಗೊತ್ತ ? – ಆ ಆ್ಯಪಲ್ ಹಿಡಿದುಕೊಂಡಿದ್ದ ಬಾಲಕಿಯ ಪಾಲಕರು ಬರೋಬ್ಬರಿ 2 ಕೋಟಿಗೂ ಅಧಿಕ ರೂಪಾಯಿ ಪರಿಹಾರ ನೀಡಬೇಕಾಗಿ ಬಂತು! ಅಂಥದ್ದೇನಾಯಿತು ಅನಾಹುತ ಅಂತೀರಾ ಮುಂದೆ ಓದಿ..
ಚೀನಾದ ಡಾಂಗುವಾನ್ ನಲ್ಲಿ 2018ರಲ್ಲಿ ಮಾರ್ಚ್ನಲ್ಲಿ ನಡೆದ ಘಟನೆ ಇದು. ಕೋರ್ಟ್ ತೀರ್ಪು ಇತ್ತೀಚೆಗಷ್ಟೇ ಬಂದಿದ್ದು, ಅದರಂತೆ ಸಾಂದರ್ಭಿಕ ಸಾಕ್ಷಿಯ ಪ್ರಕಾರ 11 ವರ್ಷದ ಬಾಲಕಿಯೊಬ್ಬಳು ಅಪರಾಧಿ ಎಂದು ಸಾಬೀತಾಯಿತು. ಪರಿಣಾಮ ಆಕೆಯ ಪಾಲಕರು 2 ಕೋಟಿ ರೂಪಾಯಿಗೂ ಅಧಿಕ ಪರಿಹಾರ ನೀಡಬೇಕಾಯಿತು. ಈ ಘಟನೆ ನಡೆದು ಎರಡು ವರ್ಷವಾಗಿದ್ದು, ಅದರ ವಿವರ ಹೀಗಿದೆ –
ಡಾಂಗುವಾನ್ನಲ್ಲಿ ಬಹುಮಹಡಿ ಅಪಾರ್ಟ್ಮೆಂಟ್ ಒಂದರ 24ನೇ ಮಹಡಿಯಲ್ಲಿ ಬಾಲಕಿಯೊಬ್ಬಳು ತಮ್ಮ ಮನೆಯಲ್ಲಿದ್ದ ನಾಯಿಗೆ ಆಹಾರ ಕೊಡ್ತಾ ಇದ್ದಳು. ನಾಯಿ ಬಾಲ್ಕನಿಯ ಮೂಲೆಗಿತ್ತು. ಅಲ್ಲೇ ಹೋಗಿ ಬಾಲಕಿ ಈ ಕೆಲಸ ಮಾಡ್ತಾ ಇದ್ದಳು. ಆಗ ಆಕೆಯ ಕೈಯಲ್ಲೊಂದು ಆ್ಯಪಲ್ ಇತ್ತು. ನಾಯಿಗೆ ಆಹಾರ ಹಾಕುವ ಗಡಿಬಿಡಿಗೆ ಬಾಲಕಿಯ ಕೈಯಲ್ಲಿದ್ದ ಆ್ಯಪಲ್ ಹಿಡಿತ ತಪ್ಪಿತ್ತು. ಬಾಲ್ಕನಿಯಿಂದ ನೇರವಾಗಿ ಕೆಳಕ್ಕೆ ಬೀಳ್ತಾ ಹೋಯಿತು.. ಆತಂಕದಿಂದ ಬಾಲಕಿ ಬಾಲ್ಕನಿಯಿಂದಲೇ ಕೆಳಕ್ಕೆ ನೋಡ್ತಾ ಇದ್ದಳು. ಆ ಆ್ಯಪಲ್ ರಭಸವಾಗಿ ಬೀಳ್ತಾ ಇತ್ತು..
ಕೆಳಗೆ ಬೀದಿಯಲ್ಲಿ ಅದೇ ಅಪಾರ್ಟ್ಮೆಂಟ್ನಲ್ಲಿ ವಾಸವಿದ್ದ ಅಜ್ಜಿಯೊಬ್ಬರು ತಮ್ಮ ಮೂರು ತಿಂಗಳ ಮೊಮ್ಮೊಗಳನ್ನು ಟಾಂಗ್ಟಾಂಗ್ನಲ್ಲಿ ಕುಳ್ಳಿರಿಸಿಕೊಂಡು ತಳ್ಳುತ್ತಾ ಹೋಗುತ್ತಿದ್ದರು. ಆ ಆ್ಯಪಲ್ ನೇರವಾಗಿ ಬಿದ್ದುದು ಎಲ್ಲಿಗೆ ಗೊತ್ತ? ಆ ಪುಟಾಣಿ ಕೂಸಿನ ತಲೆಗೇ! ಮೂರು ತಿಂಗಳ ಹಸುಗೂಸು ಆ ಏಟು ತಡೆದುಕೊಳ್ಳಲಿಲ್ಲ. ಅದರ ಅರಿವು ತಪ್ಪಿತು. ಕೂಡಲೇ ಆಕೆಯನ್ನು ಸಮೀಪದ ಆಸ್ಪತ್ರೆಗೆ ಕೊಂಡೊಯ್ದರು. ತಲೆಗೆ ಗಂಭೀರ ಗಾಯವಾಗಿದ್ದು, ಬುರುಡೆ ಒಡೆದಿದೆ. ಮಿದುಳಿಗೆ ಆಘಾತವಾಗಿದೆ ಎಂದು ಆಸ್ಪತ್ರೆಗೆ ದಾಖಲಿಸಿಕೊಂಡರು.
ಆ ಮಗುವಿನ ಬಲಬದಿಯ ಮಿದುಳು ಸಂಪೂರ್ಣ ನಿಷ್ಕ್ರಿಯವಾಗಿದೆ ಎಂಬ ವರದಿಯೂ ಹೊರಬಿತ್ತು. ಇದು ಪೊಲೀಸ್ ಕೇಸ್ ಕೂಡ ಆಯಿತು. ತನಿಖೆ ಕೂಡ ಶುರುವಾಯಿತು. ಘಟನೆಗೆ ಕಾರಣವಾಗಿದ್ದು ಆ್ಯಪಲ್ ಎಂಬ ಅಂಶ ಬೆಳಕಿಗೆ ಬಂತು. ಸಾಕ್ಷಿಯಾಗಿ ಆ್ಯಪಲ್ ಕೂಡ ಸಿಕ್ಕಿತು. ಅದನ್ನು ಡಿಎನ್ಎ ಪರೀಕ್ಷೆಗೆ ಕಳುಹಿಸಿಕೊಟ್ರು. ಅಲ್ಲಿ ಸಿಕ್ಕ ಡಿಎನ್ಎ ಅಂಶ ಮುಂದಿಟ್ಟುಕೊಂಡು ಪೊಲೀಸರು ವಿಚಾರಣೆ ಶುರುಮಾಡಿದ್ರು. ಆಗ ಆ್ಯಪಲ್ ಹಿಡಿದುಕೊಂಡಿದ್ದ ಹನ್ನೊಂದು ವರ್ಷದ ಬಾಲಕಿಯ ವಿಚಾರ ಮುನ್ನೆಲೆಗೆ ಬಂತು. ಅಲ್ಲದೇ, ಆಕೆಯ ಡಿಎನ್ಎ ಮತ್ತು ಆ್ಯಪಲ್ ಮೇಲಿದ್ದ ಡಿಎನ್ಎ ಹೊಂದಿಕೆಯಾಯಿತು. ಆಕೆ ಆರೋಪಿ ಎಂಬ ತೀರ್ಮಾನಕ್ಕೆ ಬಂದ್ರು ಪೊಲೀಸರು.
ಘಟನೆ ನಡೆದ ಸಂದರ್ಭದಲ್ಲಿ ಅಪಾರ್ಟ್ಮೆಂಟ್ನಲ್ಲಿ ಬಾಲಕಿ ಒಬ್ಳೇ ಇದ್ದಳು. ಆಕಸ್ಮಿಕವಾಗಿ ನಡೆದ ಘಟನೆ ಇದು ಎಂಬುದನ್ನು ಹೇಳಿದರೂ ಅದಾವುದೂ ಪರಿಗಣಿಸಲ್ಪಡಲಿಲ್ಲ. ಹಸುಗೂಸಿನ ಚಿಕಿತ್ಸೆಯ ವೆಚ್ಚ ಮತ್ತು ಆ ಕ್ಷಣಕ್ಕೆ ಈ ಬಾಲಕಿಯ ಪಾಲಕರು 20 ಲಕ್ಷ ರೂಪಾಯಿ ನೆರವು ನೀಡಿದ್ದರು. ಆದಾಗ್ಯೂ ಕೇಸ್ ಮುಂದುವರಿಯಿತು. ಇದೀಗ ಎರಡು ವರ್ಷಗಳ ಬಳಿಕ ಕೋರ್ಟ್ ಈ ಬಾಲಕಿಯ ಪಾಲಕರಿಗೆ ಆ ಹಸುಗೂಸಿನ ಕುಟುಂಬಕ್ಕೆ 2 ಕೋಟಿ ರೂಪಾಯಿ ಪರಿಹಾರ ನೀಡುವಂತೆ ಆದೇಶಿಸಿದೆ. ಇದು ಈಗ ಅಲ್ಲಿನ ಸೋಷಿಯಲ್ ಮೀಡಿಯಾದಲ್ಲಿ ಬಹುಚರ್ಚಿತ ವಿಚಾರ. (ಏಜೆನ್ಸೀಸ್)
ಈ ವ್ಯಕ್ತಿಯ ದುರಾದೃಷ್ಟ ನೋಡಿ! – ಒಂದಿಲ್ಲೊಂದು ಕಾರಣಕ್ಕೆ ಕ್ವಾರಂಟೈನ್ ಅವಧಿ ವಿಸ್ತರಣೆಯಾಗ್ತಾ ಹೋಯಿತು..