ನವದೆಹಲಿ: ರಾಷ್ಟ್ರ ರಾಜಧಾನಿಯಲ್ಲಿರುವ ಪ್ರವಾಸಿ ಭಾರತೀಯ ಕೇಂದ್ರಕ್ಕೆ ಸುಷ್ಮಾ ಸ್ವರಾಜ್ ಭವನ ಎಂದು ಮತ್ತು ವಿದೇಶಿ ಸೇವಾ ಸಂಸ್ಥೆಗೆ ಸುಷ್ಮಾ ಸ್ವರಾಜ್ ಇನ್ಸ್ಟಿಟ್ಯೂಟ್ ಆಫ್ ಫಾರಿನ್ ಸರ್ವಿಸ್ ಎಂದು ಸರ್ಕಾರ ಘೋಷಿಸಿದೆ.
ನಾಳೆ (ಫೆ.14)ಕ್ಕೆ ಮಾಜಿ ವಿದೇಶಾಂಗ ಸಚಿವೆಯಾಗಿದ್ದ ದಿ.ಸುಷ್ಮಾ ಸ್ವರಾಜ್ ಅವರ 68ನೇ ಜನ್ಮದಿನಾಚರಣೆಯಿದೆ. ಜನ್ಮ ದಿನದ ಮುನ್ನಾ ದಿನವಾದ ಇಂದು ಮಾಜಿ ಸಚಿವೆಯ ಸ್ಮರಣಾರ್ಥ ಪ್ರವಾಸಿ ಭವನ ಮತ್ತು ವಿದೇಶಾಂಗ ಸೇವಾ ಸಂಸ್ಥೆಗೆ ಅವರ ಹೆಸರನ್ನು ಮರುನಾಮಕರಣ ಮಾಡಿರುವುದಾಗಿ ಘೋಷಿಸಲಾಗಿದೆ.
ಈ ಕುರಿತಾಗಿ ಟ್ವೀಟ್ ಮಾಡಿರುವ ವಿದೇಶಾಂಗ ಸಚಿವ ಎಸ್.ಜಯಶಂಕರ್, “ಪ್ರವಾಸಿ ಭಾರತೀಯ ಕೇಂದ್ರವನ್ನು ಸುಷ್ಮಾ ಸ್ವರಾಜ್ ಭವನವೆಂದು ಮತ್ತು ವಿದೇಶಿ ಸೇವಾ ಸಂಸ್ಥೆಯನ್ನು ಸುಷ್ಮಾ ಸ್ವರಾಜ್ ಇನ್ಸ್ಟಿಟ್ಯೂಟ್ ಆಫ್ ಫಾರಿನ್ ಸರ್ವಿಸ್ ಎಂದು ಮರುನಾಮಕರಣ ಮಾಡಿರುವುದಾಗಿ ಸರ್ಕಾರ ಘೋಷಿಸಿರುವುದು ಸಂತೋಷ ತಂದಿದೆ. ನಮಗೆ ಸದಾ ಸ್ಫೂರ್ತಿ ತುಂಬುತ್ತಲೇ ಬಂದಿರುವ ವ್ಯಕ್ತಿಗೆ ಇದು ಸೂಕ್ತ ಗೌರವ” ಎಂದು ತಿಳಿಸಿದ್ದಾರೆ. (ಏಜೆನ್ಸೀಸ್)