ನ್ಯೂಯಾರ್ಕ್: ಸಾಮಾಜಿಕ ಜಾಲತಾಣ ಫೇಸ್ಬುಕ್ನ ಮಾತೃ ಸಂಸ್ಥೆ ಮೆಟಾಗೆ ಈಗ ಬಹುದೊಡ್ಡ ಸವಾಲು ಕಾದಿದೆ ಎಂದು ಆರ್ಥಿಕ ತಜ್ಞರು ವಿಶ್ಲೇಷಣೆ ಮಾಡಿದ್ದಾರೆ. ಎರಡು ದಿನದ ಹಿಂದೆ ಫೇಸ್ಬುಕ್ ಷೇರುಮೌಲ್ಯ ಶೇ. 26 ಕುಸಿತ ಕಾಣುವ ಮೂಲಕ ಕಂಪನಿಯ ಸುಮಾರು 14 ಲಕ್ಷ ಕೋಟಿ ರೂ. ಸಂಪತ್ತು ಕರಗಿ ಹೋಗಿತ್ತು. ಇದಾದ ಬಳಿಕ ಮೆಟಾ ಕಂಪನಿ ಕುರಿತು ಹಲವು ವಿಶ್ಲೇಷಣೆಗಳು ಕೇಳಿಬರುತ್ತಿವೆ.
ಫೇಸ್ಬುಕ್ ಬಳಕೆದಾರರ ಸಂಖ್ಯೆಯಲ್ಲಿ ಇಳಿಕೆ ಕಂಡುಬರುತ್ತಿದ್ದರೆ, ಅಂಗ ಸಂಸ್ಥೆಯಾದ ವಾಟ್ಸ್ಆಪ್, ಇನ್ಸ್ಟಾಗ್ರಾಂ ಬಳಕೆದಾರರ ಸಂಖ್ಯೆಯಲ್ಲೂ ಏರಿಕೆ ಕಂಡುಬರುತ್ತಿಲ್ಲ. ಕಳೆದ 18 ವರ್ಷಗಳಲ್ಲೇ ಮೊದಲ ಬಾರಿಗೆ ಬಳಕೆದಾರರ ಸಂಖ್ಯೆ ಇಳಿಕೆಯಾಗಿರುವುದು ಕಂಪನಿಗೆ ಹಿನ್ನಡೆ ಉಂಟುಮಾಡಿದೆ. ಐಫೋನ್ ತಯಾರಿಕೆ ಕಂಪನಿ ಆಪಲ್ ಹೊಸ ಭದ್ರತಾ ಫೀಚರ್ಗಳನ್ನು ಗ್ರಾಹಕರಿಗೆ ನೀಡಿದೆ. ಫೇಸ್ಬುಕ್ ಇನ್ನಿತರ ಆಪ್ಗಳು ಗ್ರಾಹಕರ ಚಟುವಟಿಕೆಯ ಮೇಲೆ ನಿಗಾ ಇಡದಂತೆ ಡೇಟಾ ರಕ್ಷಣೆ ಮಾಡಿಕೊಳ್ಳಲು ಇದರಲ್ಲಿ ಅವಕಾಶ ಇದೆ. ಫೇಸ್ಬುಕ್ನ ಬಹುಪಾಲು ಜಾಹೀರಾತು ಐಫೋನ್ ಬಳಕೆದಾರರ ಮೇಲೆ ಅವಲಂಬಿತವಾಗಿವೆ. ಗ್ರಾಹಕರ ಡೇಟಾ ಇಲ್ಲದಿದ್ದರೆ ಜಾಹೀರಾತು ಕೂಡ ಕಡಿಮೆಯಾಗಲಿದೆ.
ಮತ್ತೊಂದೆಡೆ ಗೂಗಲ್ ಜಾಹೀರಾತು ಪಾಲನ್ನು ಹೆಚ್ಚಿಸಿಕೊಳ್ಳುತ್ತಿದೆ. ಇ-ಕಾಮರ್ಸ್ ಇನ್ನಿತರ ವೇದಿಕೆಗೆ ಆದ್ಯತೆ ನೀಡಿರುವ ಕಾರಣ ಕಳೆದ ತ್ರೖೆಮಾಸಿಕದಲ್ಲಿ ಜಾಹೀರಾತು ಏರಿಕೆ ಕಂಡಿದೆ. ಟಿಕ್ಟಾಕ್, ರೀಲ್ಸ್ ಇನ್ನಿತರ ಆಪ್ಗಳಿಂದ ಫೇಸ್ಬುಕ್ ಭಾರಿ ಪೈಪೋಟಿ ಎದುರಿಸುತ್ತಿದೆ. ದೊಡ್ಡ ಸಂಖ್ಯೆಯ ಬಳಕೆದಾರರು ಇತರ ಆಪ್ಗಳತ್ತ ಮುಖಮಾಡುತ್ತಿದ್ದಾರೆ. ಮೆಟಾವರ್ಸ್ ತಂತ್ರಜ್ಞಾನಕ್ಕಾಗಿ ಫೇಸ್ಬುಕ್ ಭಾರಿ ಪ್ರಮಾಣದ ಹೂಡಿಕೆ ಮಾಡುತ್ತಿದೆ. ಇದು ಇನ್ನೂ ಆರಂಭಿಕ ಹಂತದಲ್ಲಿದ್ದು, ಇದರಿಂದ ನಿರೀಕ್ಷಿತ ಆದಾಯ ಬರಲು ಇನ್ನೂ ಹಲವು ವರ್ಷಗಳೇ ಬೇಕಾಗುತ್ತವೆ. ಈ ಕಾರಣಕ್ಕಾಗಿ ಸದ್ಯ ಫೇಸ್ಬುಕ್ ಹಿನ್ನಡೆ ಕಾಣುತ್ತಿದೆ ಎಂದು ಹೇಳಲಾಗುತ್ತಿದೆ.
ಸಮತಾಮೂರ್ತಿ ಅನಾವರಣ: ವಿಶ್ವದ 2ನೇ ಅತಿ ಎತ್ತರದ ಪ್ರತಿಮೆ ಲೋಕಾರ್ಪಣೆ ಮಾಡಿದ ಮೋದಿ