ಬೆಂಗಳೂರು: ಇತ್ತೀಚೆಗೆ ನಿಶ್ಚಿತಾರ್ಥ-ಮದುವೆಗಳ ಫೋಟೋಶೂಟ್ ಎಂಬುದೇ ದೊಡ್ಡ ಟ್ರೆಂಡ್ ಆಗಿರುವಂಥದ್ದು. ಅದರಲ್ಲೂ ವಿಭಿನ್ನತೆಗಾಗಿ ಫೋಟೋಗ್ರಾಫರ್ಸ್ ಕೈಗೊಳ್ಳುವ ಕಾನ್ಸೆಪ್ಟ್ಗಳು ಎಷ್ಟೋ ಸಲ ಭಾರಿ ಮೆಚ್ಚುಗೆಗೆ, ಕೆಲವೊಮ್ಮೆ ಭಾರಿ ನಗೆಪಾಟಲಿಗೆ ಒಳಗಾದ ಉದಾಹರಣೆಗಳೂ ಇವೆ. ಅಂಥದ್ದರಲ್ಲಿ ಇಲ್ಲೊಂದು ಫೋಟೋಶೂಟ್ ಸಹಜವೆಂಬಂತೆ ನಗೆಯುಕ್ಕಿಸಿದ್ದು, ಸೀರಿಯಸ್ ಆಗಿ ಪರಿಣಮಿಸಬಹುದಾದ ಸನ್ನಿವೇಶವೊಂದು ನಗೆಗಡಲಲ್ಲೇ ಅಲೆಯಂತೆ ಮಾಯವಾಗುವಂತೆ ಮಾಡಿದೆ.
ಈ ಮದುವೆ ಎಲ್ಲಿ ನಡೆದಿದ್ದು, ಯಾವತ್ತು ನಡೆದಿದ್ದು ಎಂಬುದರ ಬಗ್ಗೆ ಈ ವಿಡಿಯೋದಲ್ಲಿ ಮಾಹಿತಿ ಇಲ್ಲವಾದರೂ, ಇದು ವೈರಲ್ ಆಗಿರುವುದಷ್ಟೇ ಅಲ್ಲ, ಇದನ್ನು ನೋಡಿದ ಹಲವರು ಕೂಡ ಬಿದ್ದುಬಿದ್ದು ನಕ್ಕಿದ್ದಾರೆ. ಮಾತ್ರವಲ್ಲ ವರನ ಮನಗೆದ್ದ ಈ ವಧು, ತನ್ನ ನಗುವಿನಿಂದಲೇ ಈಗ ಹಲವರ ಮನಗೆದ್ದಿದ್ದಾಳೆ. ಒಂದು ಗಂಭೀರ ಸನ್ನಿವೇಶ ಅತ್ಯಂತ ಹಾಸ್ಯಮಯ ಪ್ರಸಂಗವಾಗಿ ಪರಿಣಮಿಸುವಂತೆ ಮಾಡಿದ ವಧುವಿನ ಬಗ್ಗೆ ಅದೆಷ್ಟೋ ಮಂದಿ ಮೆಚ್ಚುವೆ ವ್ಯಕ್ತಪಡಿಸಿದ್ದಾರೆ.
ಇದನ್ನೂ ಓದಿ: ‘ಭಾರತೀಯನಾಗಿರುವುದೇ ಅದೃಷ್ಟ, ಭಾರತ ರತ್ನಕ್ಕಾಗಿ ಬೇಡ ಒತ್ತಾಯ..’; ರತ್ನದಂಥ ಮಾತಾಡಿದ ರತನ್ ಟಾಟಾ
ವಧು-ವರ ಇಬ್ಬರೂ ಕಲ್ಯಾಣ ಮಂಟಪದಲ್ಲಿ ಇರುವಾಗ ಫೋಟೋಗ್ರಾಫರ್ ವಧುವಿನ ಫೋಟೋಗಳನ್ನು ಕ್ಲಿಕ್ಕಿಸುತ್ತಿದ್ದ. ಒಳ್ಳೇ ಆ್ಯಂಗಲ್ನ ಉತ್ತಮ ಫೋಟೋಗಳಿಗಾಗಿ ಬೇರೆ ಬೇರೆ ಭಂಗಿಗಳಲ್ಲಿ ಕಾಣಿಸುವಂತೆ ಸೂಚನೆ ನೀಡುತ್ತಿದ್ದ ಫೋಟೋಗ್ರಾಫರ್ ಬಗ್ಗೆ ವರ ಅದಾಗಲೇ ಅಸಹನೆಗೊಂಡಿದ್ದ. ಕೆಲವೇ ಕ್ಷಣದಲ್ಲಿ ಫೋಟೋಗ್ರಾಫರ್ ಒಮ್ಮೆ ವಧುವಿನ ಹತ್ತಿರಕ್ಕೆ ತೆರಳಿ ‘ಹೀಗೆ ನಿಲ್ಲಿ’ ಎನ್ನುತ್ತಿದ್ದಂತೆ ತಾಳ್ಮೆಯನ್ನು ಕಳೆದುಕೊಂಡು ವರ ಕೈ ಎತ್ತಿ ಫೋಟೋಗ್ರಾಫರ್ಗೆ ಬಾರಿಸಿಯೇ ಬಿಟ್ಟಿದ್ದಾನೆ. ವಧು ಇದರಿಂದ ವಿಚಲಿತಳಾಗುವ ಬದಲಿಗೆ ಬಿದ್ದು ಬಿದ್ದು ನಕ್ಕುಬಿಟ್ಟಳು. ಮಾತ್ರವಲ್ಲ ಪೆಟ್ಟುತಿಂದ ಫೋಟೋಗ್ರಾಫರ್ ಮುಖದಲ್ಲಿ ಕೂಡ ನಗುಮೂಡಿದ್ದು ವಿಡಿಯೋದಲ್ಲಿ ಕಾಣಿಸಿತ್ತು. ಇದು ನೈಜ ಸನ್ನಿವೇಶವೋ ಅಥವಾ ಫೋಟೋಶೂಟ್ಗಾಗಿ ತಮಾಷೆಯಾಗಿ ಚಿತ್ರೀಕರಿಸಿದ ದೃಶ್ಯವೋ ಎಂಬ ಅನುಮಾನ ಮೂಡುವಂತಿದ್ದರೂ, ಈ ವಿಡಿಯೋ ನೋಡಿದ ಬಹುತೇಕ ಎಲ್ಲರೂ ನಗಲಾರಂಭಿಸುವುದಂತೂ ನಿಜ.
— Vijayavani (@VVani4U) February 6, 2021