ಬೆಂಗಳೂರು: ಮುಂಬರುವ ಟಿ20 ವಿಶ್ವಕಪ್ ಟೂರ್ನಿಗೆ ತಂಡಗಳನ್ನು ಅಂತಿಮಗೊಳಿಸುವ ದಿನ ಹತ್ತಿರ ಬರುತ್ತಿದೆ. ಐಸಿಸಿ ಮೇ 1ರವರೆಗೆ ಗಡುವು ನೀಡಿದ್ದರೂ, ಬಿಸಿಸಿಐ ಏಪ್ರಿಲ್ 28 ಅಥವಾ 29ರಂದೇ ತಂಡವನ್ನು ಅಂತಿಮಗೊಳಿಸುವ ನಿರೀಕ್ಷೆ ಇದೆ. ಅಂದರೆ ಐಪಿಎಲ್ 17ನೇ ಆವೃತ್ತಿಯ ಮೊದಲ 46-47 ಪಂದ್ಯಗಳ ನಿರ್ವಹಣೆಯ ಆಧಾರದಲ್ಲಿ ವಿಶ್ವಕಪ್ ತಂಡದ ಆಯ್ಕೆ ನಡೆಯಲಿದೆ. ಈ ಪೈಕಿ ನಾಯಕನ ಸಹಿತ ಬ್ಯಾಟಿಂಗ್-ಬೌಲಿಂಗ್ ವಿಭಾಗದ ಬಹುತೇಕ ಆಟಗಾರರ ಆಯ್ಕೆ ಈಗಾಗಲೆ ಅಂತಿಮವಾಗಿದ್ದರೂ, ವಿಕೆಟ್ ಕೀಪರ್ ಆಯ್ಕೆ ಮಾತ್ರ ಇನ್ನೂ ಸಾಕಷ್ಟು ಕುತೂಹಲಕಾರಿಯಾಗಿಯೇ ಉಳಿದಿದೆ. ಸದ್ಯಕ್ಕೆ ಐವರು ಆಟಗಾರರು ಭಾರತ ತಂಡದ ವಿಕೆಟ್ ಕೀಪರ್ ಸ್ಥಾನದ ರೇಸ್ನಲ್ಲಿ ಪೈಪೋಟಿಯಲ್ಲಿದ್ದು, ಅವರ ಆಯ್ಕೆ ಸಾಧ್ಯತೆಯ ಸಂಪ್ತ ಲೆಕ್ಕಾಚಾರ ಇಲ್ಲಿದೆ.
*ರಿಷಭ್ ಪಂತ್
ಭೀಕರ ಕಾರು ಅಪಘಾತದಿಂದ ಚೇತರಿಸಿಕೊಂಡು ಐಪಿಎಲ್ನಲ್ಲಿ ಯಶಸ್ವಿ ಪುನರಾಗಮನ ಕಂಡಿರುವ ರಿಷಭ್ ಪಂತ್ ಇದೇ ಆಧಾರದಲ್ಲಿ ಟೀಮ್ ಇಂಡಿಯಾಗೂ ಪ್ರವೇಶ ಪಡೆಯುವ ನಿರೀಕ್ಷೆಯಲ್ಲಿದ್ದಾರೆ. ಈ ಹಿಂದೆ ಟೆಸ್ಟ್-ಏಕದಿನಕ್ಕೆ ಹೋಲಿಸಿದರೆ, ಟಿ20ಯಲ್ಲಿ ಪಂತ್ ನಿರ್ವಹಣೆ ಅಷ್ಟೇನೂ ತೃಪ್ತಿಕರ ಎನಿಸಿರಲಿಲ್ಲ. 2022ರ ಟಿ20 ವಿಶ್ವಕಪ್ನಲ್ಲೂ ಅವರು ಮೊದಲ ಆಯ್ಕೆಯ ವಿಕೆಟ್ ಕೀಪರ್ ಆಗಿರಲಿಲ್ಲ. ಆದರೆ ಹಾಲಿ ಐಪಿಎಲ್ನಲ್ಲಿ ಗುಜರಾತ್ ವಿರುದ್ಧದ ಭರ್ಜರಿ ನಿರ್ವಹಣೆಯ ಬಳಿಕ ಕೀಪರ್ ಸ್ಥಾನಕ್ಕೆ ಅವರೇ ಫೇವರಿಟ್ ಆಗಿ ಹೊರಹೊಮ್ಮಿದ್ದಾರೆ.
ಹಾಲಿ ಐಪಿಎಲ್ ನಿರ್ವಹಣೆ: ಪಂದ್ಯ: 9, ರನ್: 342, ಅರ್ಧಶತಕ: 3, ಕ್ಯಾಚ್/ಸ್ಟಂಪಿಂಗ್: 10/3.
*ಕೆಎಲ್ ರಾಹುಲ್
ಕನ್ನಡಿಗ ಕೆಎಲ್ ರಾಹುಲ್ 2021&2022ರ ಟಿ20 ವಿಶ್ವಕಪ್ಗಳಲ್ಲಿ ಆಡಿದ್ದರೂ, ಆಗ ತಂಡದ ವಿಕೆಟ್ ಕೀಪರ್ ಆಗಿರಲಿಲ್ಲ. ಎಲ್ಲಕ್ಕಿಂತ ಮಿಗಿಲಾಗಿ 2022ರ ವಿಶ್ವಕಪ್ ನಂತರದಲ್ಲಿ ಅವರು ಭಾರತ ಪರ ಟಿ20 ಪಂದ್ಯವನ್ನೇ ಆಡಿಲ್ಲ. ಇದರ ಹೊರತಾಗಿಯೂ 2023ರ ಏಕದಿನ ವಿಶ್ವಕಪ್ನಲ್ಲಿ ವಿಕೆಟ್ ಕೀಪರ್ ಆಗಿ ಸಾಧಿಸಿದ ಯಶಸ್ಸಿನಿಂದಾಗಿ ಅವರು, ಐಪಿಎಲ್ನಲ್ಲೂ ಲಖನೌ ಪರ ವಿಕೆಟ್ ಕೀಪರ್ ಆಗಿ ಆಡುವ ಮೂಲಕ ಟಿ20 ವಿಶ್ವಕಪ್ ರೇಸ್ನಲ್ಲಿದ್ದಾರೆ. ಆರಂಭಿಕ-ಮಧ್ಯಮ ಕ್ರಮಾಂಕದ ಬ್ಯಾಟರ್ ಆಗಿ ಆಡುವ ಸಾಮರ್ಥ್ಯವಿದೆ. ಆದರೆ ಸಾಧಾರಣ ಸ್ಟ್ರೈಕ್ರೇಟ್ ಹಿನ್ನಡೆ ಎನಿಸಿದೆ.
*ಹಾಲಿ ಐಪಿಎಲ್ ನಿರ್ವಹಣೆ: ಪಂದ್ಯ: 8, ರನ್: 302, ಅರ್ಧಶತಕ: 2, ಕ್ಯಾಚ್/ಸ್ಟಂಪಿಂಗ್: 9/2.
*ಸಂಜು ಸ್ಯಾಮ್ಸನ್
ಐಪಿಎಲ್ನಲ್ಲಿ ರಾಜಸ್ಥಾನ ರಾಯಲ್ಸ್ ನಾಯಕ-ಬ್ಯಾಟರ್-ಕೀಪರ್ ಆಗಿ ಯಶಸ್ಸು ಕಂಡಿರುವುದು ಸಂಜು ಸ್ಯಾಮ್ಸನ್ ಆಯ್ಕೆಗೂ ಬಲ ತುಂಬಿದೆ. ಆದರೆ ಈ ಹಿಂದೆ ಭಾರತ ಪರ ಕೆಲ ಟಿ20 ಪಂದ್ಯ ಆಡಿದ್ದರೂ, ಆ ಅವಕಾಶಗಳನ್ನು ಸಮರ್ಥವಾಗಿ ಬಳಸಿಕೊಂಡಿಲ್ಲ. ಹೀಗಾಗಿ ಐಪಿಎಲ್ ನಿರ್ವಹಣೆ ಆಧಾರದಲ್ಲೇ ಅವರನ್ನು ಆರಿಸಲಾಗುವುದೇ ಎಂಬುದು ಖಚಿತವಿಲ್ಲ.
ಹಾಲಿ ಐಪಿಎಲ್ ನಿರ್ವಹಣೆ: ಪಂದ್ಯ: 8, ರನ್: 192, ಅರ್ಧಶತಕ: 1, ಕ್ಯಾಚ್/ಸ್ಟಂಪಿಂಗ್: 6/0.
*ಇಶಾನ್ ಕಿಶನ್
ಕಳೆದ ಚುಟುಕು ಕ್ರಿಕೆಟ್ ವಿಶ್ವಕಪ್ ನಂತರದಲ್ಲಿ ಭಾರತ ಪರ ಸರ್ವಾಧಿಕ 13 ಟಿ20 ಪಂದ್ಯವಾಡಿರುವ ವಿಕೆಟ್ ಕೀಪರ್ ಇಶಾನ್ ಕಿಶನ್. ಅದರಲ್ಲಿ ಉತ್ತಮ ನಿರ್ವಹಣೆಯನ್ನೂ ತೋರಿದ್ದರು. ಆದರೆ ಇತ್ತೀಚೆಗೆ ರಣಜಿ ಟ್ರೋಫಿಯಲ್ಲಿ ಆಡದೆ ದೇಶೀಯ ಕ್ರಿಕೆಟ್ ಕಡೆಗಣಿಸುವ ಮೂಲಕ ಬಿಸಿಸಿಐ ಕೆಂಗಣ್ಣಿಗೆ ಗುರಿಯಾಗಿರುವ ಕಿಶನ್ರನ್ನು ಆಯ್ಕೆಗೆ ಪರಿಗಣಿಸಲಾಗುವುದೇ ಎಂಬ ಪ್ರಶ್ನೆ ಇದೆ. ಐಪಿಎಲ್ನಲ್ಲೂ ಅವರ ನಿರ್ವಹಣೆ ಅಸ್ಥಿರವಾಗಿದೆ.
*ಹಾಲಿ ಐಪಿಎಲ್ ನಿರ್ವಹಣೆ: ಪಂದ್ಯ: 8, ರನ್: 254, ಅರ್ಧಶತಕ: 2, ಕ್ಯಾಚ್/ಸ್ಟಂಪಿಂಗ್: 8/3.
*ದಿನೇಶ್ ಕಾರ್ತಿಕ್
ಅನುಭವಿ ಆಟಗಾರ ದಿನೇಶ್ ಕಾರ್ತಿಕ್ 2022ರಂತೆ ಈ ಬಾರಿ ಮತ್ತೆ ಟಿ20 ವಿಶ್ವಕಪ್ ವರ್ಷದಲ್ಲಿ ಐಪಿಎಲ್ನಲ್ಲಿ ಗಮನಸೆಳೆಯುತ್ತಿದ್ದಾರೆ. ಕಳೆದ ಟಿ20 ವಿಶ್ವಕಪ್ನಲ್ಲಿ ಫಿನಿಷರ್ ಪಾತ್ರದೊಂದಿಗೆ ಅವರೇ ಮೊದಲ ಆಯ್ಕೆಯ ಕೀಪರ್ ಆಗಿದ್ದರು. ಈ ಸಲವೂ ಆರ್ಸಿಬಿ ವೈಫಲ್ಯದ ನಡುವೆ 38 ವರ್ಷದ ಕಾರ್ತಿಕ್ ಗರ್ಜಿಸುತ್ತಿದ್ದಾರೆ. ಆದರೆ ಆಯ್ಕೆಗಾರರು ಈ ಬಾರಿ ಮತ್ತೆ ಭವಿಷ್ಯದತ್ತ ಗಮನಹರಿಸುವ ಬದಲಾಗಿ, ಅನುಭವಕ್ಕೆ ಮಣೆ ಹಾಕುವರೇ ಎಂಬ ಕುತೂಹಲವಿದೆ.
ಹಾಲಿ ಐಪಿಎಲ್ ನಿರ್ವಹಣೆ: ಪಂದ್ಯ: 8, ರನ್: 251, ಅರ್ಧಶತಕ: 2, ಕ್ಯಾಚ್/ಸ್ಟಂಪಿಂಗ್: 1/0.
ಕ್ರಿಕೆಟ್ ದಿಗ್ಗಜ ಸಚಿನ್ ತೆಂಡುಲ್ಕರ್ಗೆ ಇಂದು 51ನೇ ಜನ್ಮದಿನದ ಸಂಭ್ರಮ; ಇಲ್ಲಿವೆ ಅವರ 51 ದಾಖಲೆಗಳ ಮೆಲುಕು…
IPL 2024: ಸಂದೀಪ್-ಯಶಸ್ವಿ ಸಾಹಸ; ಮುಂಬೈ ಎದುರು ರಾಜಸ್ಥಾನ ರಾಯಲ್ಸ್ಗೆ ಸುಲಭ ಜಯ, ಪ್ಲೇಆಫ್ಗೆ ಸನಿಹ